1 Apolosi echikuKolinte, Paulu wakapinda zhezhulu kwenyika akaswika kuEfesu. Yoko wakawana bamwe balayijwa. 2 Wakati kwabali, "Mwakatambula uMpepo uNchena na pamwakadimbwa?" Ibo ndikokuti, "Pe, atijanhu tawha kuti kuna uMpepo uNchena." 3 Iye wakati, "Imwi mwakatambula umbhabhatizo wakata chini?" Ibo bakati, "Mumbhabhatizo waJoni." 4 Paulu akati, "Joni wakabhabhatiza nombhabhatizo wokushanduka, ebuja banhu kuti bedimbwe kunooyo uchoozha mushule mumwe, yoyo eliJesu." 5 Pabakawha yezwi bakabhabhatizwa muzina lyaShe Jesu. 6 Paulu paakati abiga maboko awe pezhulu pabo, uMpepo Nchena wakabhulukila pabali, ibo bakalebeleka mundimi akale bakapolofita 7 Ibo bose bakabeli igumi nababili. 8 Iye wakangwina musinagogi akale kwemyeji mitatu wakalebeleka esina lutyo, enyenyejana akale ebhaunula zwinyolonyolo nezwobushe bwaMwali, 9 koga bamwe bakaba beli nobundulundulu akale besinodimbwa, belebeleka bubi nozweNzila mbeli kwegubungano, iye wakabhuda mwabali akatola balayijwa, akale mazhuba ose wakaba ebalayija mungumbehulu yaTailanusi. 10 Yezwi zwakandila mbeli kwamakole mabili, zwokuti bose bagali bomuEzhiya bakaliwha iwhi lyaShe, bose baJuda nabaGiliki. 11 Mwali wakata zwishamiso zwikulwana namaboko aPaulu, 12 zwokuti tutaulu kana inhako zwaakabeshingisa pambili uwe zwakazwisengwa kubalwaji, malwaji epela nemipepo mibi ibhuda mwabali. 13 Bamwe bakabekwendenda bebhisa mipepo mibi bechiJuda, bakakweja kushingisa izina lyaShe Jesu kunabo bana mipepo mibi, beti "Ndomulayila imwi muzina lyaJesu umupupulwa naPaulu." 14 Bana banhulumyana bashanu banababili bontebuji unkulwana wechiJuda unowhi Sikeva ndibo bakaba bezwita yezwi. 15 Koga umpepo umbi wakabashandula ibo, "Jesu ndinounziba, naPaulu ndonziba, koga iwi ndiwi aani?" 16 Unhulume wakaba eli nompepo umbi wakabashotokela, wakabakoma akabazunda bose, zwokuti bakabhuda muneyo ingumba bakatizha beli chinkuna akale balwajiswa. 17 Yezwi zwakazibwa nabaJuda nabaGiliki nabagali bose bomuEfesu, nolutyo lukaba munaibo bose, nokudalo izina lyaShe Jesu lyakakujwa zwikulwana kasa. 18 Banji babo nabakabadimbwa pakalepo bakezha belebulula akale nokubhisila pachena zwito zwabo. 19 Nabanji babo baluta zwamasalamusi, bakabuza iwhalo jabo pamwempela jikapiswa mbeli kwabo bose, yakalabwa imali yajo jose ikaswika zwiulu makumi mashanu esiliva. 20 Nokudalo iwhi lyaTezi lyakakubuka akale likazunda zwinamasimba makulwana.

21 Mushule mwezwi zwitiko, Paulu wakazwimisila mumpepo uwe kupinda kuMasedoniya nomuAkeya enda kuJelusalema eti, "Mushule mokuswika kwangu yoko, imi ndokwelela kunobona iRoma." 22 Mushule mwokutuma Timoti naElasitusi babhanchi babe babili, kuMasedoniya, iye emene wakagala muEzhiya kwonshaji.

23 Noyo unshaji kwakamuka iditi igulwana pezhulu peNzila yeyo. 24 Nokuti unhulume waluwhi Demetriyasi, umfhuli wesiliva wakabebumba zwibumbwa zwaAtemisi, zwakaba zwibuza mishingo isimishoma kubafhuli. 25 Yaba wakababuza pamwempela, nabanhulume yaba baluta unshingo umwempela akati, "Matate mwoziba kuti ifuma yedu yabeva munshingo yoyu. 26 Mubweni akale muwhile yezwi kuti akutoba kuEfesu chete, koga iEzhiya yose, yoyu Paulu wabweta akale akashandula banhu banji, eti zwimwali zwinotiwa namaboko abatoba Mwali. 27 Kuchaba negubanji kunshingo wedu unoolingilwa pasi, netempeli lyaMwali wedu unkulugulu, chimwalikaji Atemisi, chinooba chisichinoleba chinhu, akale iye angabhiswa mububuya bubwe, iye unonamatwa neEzhiya nepasi lyose." 28 Pabakawha yezwi bakanyema kasakasa bakashomeja beti, "Unkulugulu Atemisi waba Efesu!" 29 Nokudalo iguta lyakazhala inyonganyonga akale ibo bakalabuka bose pamwempela bengwina mungumba yemizano, bekulunta Gayasi naAlisitakasi, baMasedoniya bakabekwenda naPaulu. 30 Paulu wakada kungwina pakati poluvute, koga balayijwa bakondambija, 31 nabamwe bakulwana beshango yeEzhiya bakababeli bakwaina babe, bakatumila kwaali akale bakombweta kuti eleke kungwina mubugalo bwemizano. 32 Bamwe bakakongoloka chimwe chinhu, bamwe chimwe, nokuti igubungano lyakaba inyonganyonga, bunji bwabo abajakaziba kuti zwababuza pamwempela ini. 33 Bamwe boluvute bakasungilija Alekizanda, wakatungamijwa nabaJuda. Alekizanda wakamilija luboko eda kuti elebeleke etabilija. 34 Koga pabakaziba kuti unJuda, ibo bose bakakongoloka, kwonshaji ungaba maawa mabili, newhi limwempela beti, "Unkulwana Atemisi weEfeso!" 35 Unkwali weguta paakanyalaja luvute wakati, "Banakwaina bomuEfeso, ndiyani unhu yomuno usinoziba kuti iguta lyeEfeso ndilyo undondoti wetempeli lyaAtemisi unkulwana webwe lyechitondejelo lyakawa liva kudenga? 36 Sezwazwinoboneka ngweno kuti yezwi zwinhu zwisinonyenyejekwa, imwi mokwelela kuti munyalale akale musite zwinhu zwokambija 37 Sezwo imwi mwabuza banhulume yaba yopano, ibo basata undandu wokuzanisa kana kutuka mwalikaji. 38 Kana Demetriyasi nabafhuli bananaye belina chililijiko kana nani, makota obeteka alozhulwa, akale pana batongi, ngebebuze ibo milandu ilonangana nomwe noumwe. 39 Koga kana imwi mupyanga zwimwe zwinopinda yezwi, zwinopejwa nenzila yamazhuba ose mugota. 40 Nokuti isu timo mugubaji lyokupiwa undandu webhilimanyondo nasi, sezwo pesina zwatingalulamisa neli igwilakwila." 41 Paakati iye alebeleka yezwi, iye wakalimwayisa igubungano.