1 Bamwe banhulume bakezha beva kuJudiya, akale bakalayija banakwaina beti, "Kuzhe kwokuti mumhalajwe sengalilo yaMozesi, amutochijwa" 2 Paulu naBhanabhasi pabakanyenyejana nabo kasakasa, nokudalo kwakashalujwa Paulu naBhanabhasi nabamwe kuti bende kuJelusalema kubapositoli nabakulwana pezhulu penyaya yeyi. 3 Sezwo bakatumwa negubungano, bakapinda muFonisiya nomuSamaliya bepa lusumo nezwokushanduka kwaBokuzhe, inyaya yeyi yakashantisa bose banakwaina 4 Pabakaswika kuJelusalema, bakatambulwa negubungano nabapositoli akale nabakulwana, ndokuva babazibisa zwose Mwali zwaakata nabo. 5 Bamwe bavumili begapo lyabaFalisi, bakanyamuka bakati, "Zwilokwelela kuti tibamhalaje, akale tibalaye kuti belondote milawu yaMozesi."

6 Bapositoli akale nabakulwana bakashangana kulingisisa inyaya yeyi. 7 Akale kwabana kukota kukulwana, Pita wakanyamuka akati kwabali, "Banakwaina, imwi mwoziba kuti mumazhuba otanga Mwali wakashala mukati mwedu, kuti Bokuzhe bewhe nondomo wangu, iNdebo iMbuya akale bedimbwe. 8 Mwali, iye unoziba zwimo mumwoyo, wakapa busumikiji kwabali, wakabapa uMpepo Nchena sezwaakatipa isu, 9 akale aajakasiyanisa pakati pedu naibo, koga wakashampuluja mimwoyo yabo nokudimbwa. 10 Ngweno, nokudalo ini mukweja Mwali, nokubiga ijogwe mumichibha yabalayijwa lisakatubulwa namatate edu kana nasu? 11 Koga todimbwa kuti neshe jaTezi Jesu, tichachijwa nenzila ilokwelana naibo."

12 Akale bose bakabaka bungana bakawhilijila, akale bakawhilila Bhanabhasi naPaulu bebhaunula zwitondejelo nezwishamiso zwakatiwa naMwali eshingisa ibo kunaBokuzhe. 13 Pabakapeja kulebeleka, Jemusi wakalebeleka eti, "Banakwaina ndiwhilileni, 14 Simiyoni watibuja kuti Mwali wakatanga chini kushanyila Bokuzhe, kuzwishalila banhu bezina lilye. 15 Akale mawhi abapolofeti anovumilana nezwi sezwakulokwalwa muwhalo."

16 "Mushule mwezwi, imi ndinoobuya,

ndinoobakulula bugalo bwaDavidi, bwakawa,

imi ndinoobakulula iwo matongo,

ndinoamusilija akale,

17 kuti bose banhu bompote Tezi,

akale naBokuzhe bose banoshobwa nezina lyangu,

18 unodalo Tezi, iye wakata kuti yezwi zwizibike kuvila ntolo."

19 Nokudalo, kutonga kwangu ndinoti, tisinyaje Bokuzhe bamushandukila kuna Mwali, 20 koga atibakwalileni ibo kuti belekeje kuswibhiswa nezwibezhwa, akale nobusangu akale, nozwasinwa akale nelopa. 21 Kuvila chizekululu chokumatangilo, Mozesi wakaba elina banompupula mumakuta ose, nokuti iye unobalwa iSabata lyogalyoga mumasinagogo.

22 Ngweno zwakaboneka zwilizwibuya kubapositoli akale nabakulwana, negubungano lyose, kushala banhulume mukati mwabo kuti bebatume kuAntiyoki naPaulu pamwempela naBhanabhasi.Bakatuma Judasi waluwhi Bhasabhasi, naSailasi, baluba banhulume bakulwana pakati pabanakwaina. 23 Bakakwala lukwalo lunotobela:

"Isu bapositoli nabakulwana, kubanakwaina Bokuzhe kuAntiyoki akale kuSiliya nokuSilisiya, momuswa. 24 Patakawha kuti bamwe banhu bokunasu bakabemunyaja namawhi, bemujiija mundangalilo, kojoba tisakabatuma, 25 zwaboneka zwikakwelela kwatili, tikaswika pendangalilo imwempela, kushala banhulume akale tibatuma kwamuli nabanodikana bedu Bhanabhasi naPaulu, 26 ibo beli banhulume bakapila bupenyu bwabo nokuda kwezina lyaShe wedu Jesu Kristo. 27 Nokudalo isu tatuma Judasi naSailasi, bali ibo bachamubuja yezwo zwinhu. 28 Nokudalo zwaboneka zwilizwibuya kuMpepo Nchena nokunasu kuti tisimutwigise untolo undemu kupinda zwilokwelela, 29 kuti imwi muleke kulya zwilopilwa kuzwibezhwa, nelopa, kunezwakasinwa akale nobupombwe. Kana imwi mungosozwita yezwi, munobata zwibuyanana. Musale zwibuyanana."

30 Nezwo pabakakonekwa bakanyamuka kunda kwabakabatumwa, bakenda kuAntiyoki, akale pabakabunganisa igubungano pamwempela, bakabapa lukwalo. 31 Pabakalubala, bakashantilwa nokusungwajwa yoko. 32 Judasi naSailasi, ibo bakabeli bapolofeti nokwabo, bakasungwaja banakwaina namawhi manji akale bebasimisa. 33 Bakati bagala unshaji belinabo, bakakonekana mulunyalalo nabanakwaina kuti bebwilile kunabo bakabatuma. 34 Akale zwakaboneka zwili zwibuya kunaSilasi kuti esale kwakale.

35 Koga Paulu naBhanabhasi bakendila mbeli beli muAntiyoki, belayija akale bebhaunula iwhi lyaShe belinabamwe banji bo.

36 Pakwakapinda mazhuba, Paulu wakati kuna Bhanabhasi, "Izha, ngatibwilile tishanyile banakwaina mumakuta ose mwatakapupula iwhi lyaShe, akale tibone kuti balichini." 37 Bhanabhasi wakada kuti etole Joni unowhi ndiMako. 38 Koga Paulu wakayeya zwilizwibuya kuti besiuntole nokuti wakabasiya pabakabeli kuPamfiliya akale aajakaba ata unshingo nabo. 39 Kwakamuka kusowhanana, zwakatisa kuti bepambukane, Bhanabhasi wakatola Mako akenda naye bakangwina mubwato benda kuSaipulasi, 40 asi Paulu wakashala Sailasi bakanyamuka, mushule mwokukumbililwa ishe jaMwali nabanakwaina. 41 Wakapinda muSiliya nomuSilisiya, esimisa makubungano.