1 Palyakaswika izhuba lyePentekositi, bakagala pabugalo bumwempela. 2 Pakalepo kwakawhikana untimbo uva kudenga, sebhepo, ukazhala ingumba yose mubakabeligele. 3 Bakabona isasi jomoto jikagala pana umwe noumwe. 4 Bose bakazhajwa noMpepo uNchena, bakatanga kulebeleka nejimwe indimi, sokupiwa kwabo noMpepo kuti belebeleke.

5 KuJelusalema kwakabegala maJuda, bakalulama, bakabeva kunyika jose, jopasi pedenga. 6 Pakuwhikana kwontimbo yoyu, luvute lwabanhu lwakezha pamwempela, kukaba negangakanga, nokuti umwe noumwe wakabawha belebeleka lulimi lulwe. 7 Bose bakachenama nokushama, bakati kunoumwe noumwe, "Bose yaba bakumulebeleka abatova kuGalili na? 8 Feno, ini kuti umwe noumwe wedu tibawha mululimi lulwe? 9 BaPatiya nabaMidi nabaElamaiti, nabagali bokuMesopotamiya, nokuJudiya, nabokuKapadosia, kuPontusi akale neEzhiya, 10 Filijiya nePamfiliya, Ijipiti nobumwe bugalo bweLibhiya bweSayilini, nabashanyi banova kuRoma, nabamwe bokuzhe bakashandukila kuchiJuda, 11 baKiletani namaAlabhu timubawha belebeleka indimi jedu, bebanda mishingo mikulwana yaMwali." 12 Akale bose bakashama akale bakakankamala, beti kunoumwe noumwe, "Yezwi zwinolebani biya!"

13 Bamwe bakaseka beti, "Yaba balokolwa newaini impya."

14 Koga Pita, elimile nabaligumi linaumwe, wakanyamula iwhi lilye akati kwabali, "Matate bokuJudiya nabagali bose bomuJelusalema, izibani yezwi, akale muwhisise mawhi angu. 15 Yaba banhulume abajilokolwa, sezwamumuyeya, ngweno zwichizhingwanangwana, iawa yatatu yezhuba, 16 Koga yezwi ndizwo zwakalebwa nondebambeli waMwali, Jowelo," eti,

17 "Mwali unoti yezwi zwichatikana mumazhuba opejeleja,

ndichadila uMpepo wangu penyama yose,

bana benu banhulumyana nabana benu banhukajana banoopolofita zwaMwali,

akale bazhuzha benu banoobona mibono,

nenhutana jenu jinoolota maloto.

18 Kasa munayomazhuba ndinoodila uMpepo wangu pezhulu pabalanda nabalandakaji,

ibo banoopolofita.

19 Ndinootondejela zwichenamiso pezhulu kudenga,

nezwitondejelo pasi munyika,

ilopa nomoto nobusi,

20 izhuba linooshandulwa libe inhilima,

nomweji ubelopa,

kusanhu kwaswika izhuba lyaShe, izhuba igulwana lilye

21 Akale zwinooba kuti yoyo unoshomeja izina lyaShe unoochijwa.

22 "Banhu bomuIzilayeli, iwhani mawhi yaya, Jesu wokuNazaleta, uNhulume umwakapiwa naMwali wakaba nezwishamiso, zwichenamiso nezwitondejelo, Mwali zwaakashinga naye mukati mwenu, sezwamunoziba bo. 23 Iye yoyu Jesu wakapilwa sokulonga kwaMwali muluzibo lulwe lwambeli, wakapilwa mumaboko abokuzhe kuzhe komulawo kuti muunkahamile panchinjikwa ebulayiwe, 24 Koga Mwali wakomusa mubafi, akonsupula mubugalo bwolufu, nokuti azwijakabetubukana kuti angakomwa nolufu. 25 Davidi unoti pezhulu pape,

"Ndakombona Tezi wangu elimbeli kwangu unshaji wose,

eli kululyi lwangu kuti ndisizungunuke,

26 nokudalo moyo wangu wakashanta, nolulimi lwangu lunonakilwa,

nenyama yangu inoogala mulubimbo.

27 Iwi autoonsiya moyo wangu mubugalo bwolufu,

akale autoonsiya Unchena uwo kuti ebole.

28 Wakandilaya inzila yobupenyu,

unoondizhaja nolushanto pakubona chiso chicho."

29 "Banakwaina, lekejani ndilebeleke pachena nezwatategulu bedu Davidi, kuti iye wakafa akale akajikwa, negumbu lilye tinanalyo kuswikila nasi. 30 Nokudalo, elimpolofeti, akale eziba ikowhe lyaMwali kunaiye, lyokuti kuchava munchelo wombili uwe, uchagala pechigalo chiche chobushe. 31 Nokudalo iye, mukubona zwambeli yezwi, wakalebeleka nezwokumuka kwaKristo kuti,

"Aajakasiyiwa mubugalo bwabakafa,

nombili uwe aujakabola."

32 Yoyu Jesu wakamuswa naMwali mubafi, isu tose tibasumikiji. 33 Nokudalo ulonyamulwa, ugele kuluboko lolulyi lwaMwali, nokutambula kunaTate chibimbiso choMpepo uNchena, ndiye wadila yezwi zwimubweni nokuwha. 34 Davidi iye aajakenda kudenga, koga unoti,

"Tezi wakati kunaTezi wangu,

Gala kuluboko lwangu lwokululyi,

35 kujine ndite babengi babo bebe chibhula chamakumbo awo."

36 "Nokudalo bujani ingumba yaIzilayeli yose kuti izibe ichokomende kuti, Mwali, wakata kuti yoyu Jesu wamwakakahamila, ebe Tezi akale Mesiya."

37 Ngweno pabakawha yezwi, zwakababhaya mumyoyo, bakati kuna Pita nabamwe bapositoli bose, "Banakwaina titeni na!"

38 Pita akati kwabali, "Shandukani, mubhabhatizwe umwe nomwe muzina lyaJesu Kristo kuti luchinyo lwenu lulekejelwe, akale mutambule chipo choMpepo uNchena. 39 Chibimbiso chatiwa kunamwi nokubana benu, nabanji bachikokule, banoshobwa naMwali She wedu."

40 Wakalebeleka ebasungwaja namamwe mawhi manji eti, "Zwichijeni munechi chizekululu chisakalulama." 41 Pakalepo yabo bakatambula mawhi awe nolushanto bakabhabhatizwa, nelyo izhuba mipepo zwiulu zwitatu yakashanduka ikapamhijwa kwabali. 42 Akale bakendila mbeli besungwalila kulayija lwabapositoli nokukamujana, nokumedula chinkwa nokunamata.

43 Lutyo lwakangwina mubanhu bose, nokuti zwichenamiso nezwitondejelo zwinji zwakatiwa nabapositoli. 44 Akale bose bakadimbwa bakaba pamwempela, zwose zwabo zwaluba zwonhu wose, 45 akale bakatengesa ifuma nezwibya zwabo, bakakobelana bose umwe noumwe sokushayiwa kwabo. 46 Izhuba nezhuba bakabeshangana mutempeli nomwoyo umwempela, bemedula chinkwa mujingumba jabo, belya kulya kwabo mulushanto akale nomwoyonchena, 47 bekuja Mwali akale bediwa nabanhu bose. She wakapamhija buwandi bwaabo bakabechijwa izhuba nezhuba.