1 Akale takapambukana nabo, takakwenda mubwato, tikalingisa twisi tikanoswika kuKosi, muchimuka takaswika kuRodesi kuva yopo takenda kuPatala. 2 Patakawana bwato bunodubula bunda kuFonisiya, takangwina mwakale tikakwenda. 3 Patakaba panoboneka iSayipulasi, takayisiya kuchesho, tikalingisa kuSiliya, tikanoma kuTayi, nokuti yopa bwato bwakaba budeluja zwibya. 4 Patakashangana nabalayijwa, takagala nabo mazhuba mashanu ana mabili. Betungamililwa noMpepo ibo bakabuja Paulu kuti esinde kuJelusalema. 5 Paakati apela mazhuba edu, takendila mbeli nolwendo wedu, ibo bose, nabakaji nabana bakatipelekeja bakatiswincha kuzhe kweguta, takafhigama pebhazu lyegungwa tinamata kova tikonekana umwe noumwe. 6 Pakalepo takangwina mubwato, ibo bakabwilila kumisha yabo.

7 Patakati tapeja lwendo lwomugungwa kuva kuTayi, takaswika kuTolemayisi, takamusa banakwaina tikagala nabo kwezhuba limwempela. 8 Muchimuka takanyamuka tikanoswika kuKesaliya, kwatakangwina mungumba yaFilipu umvangeli, wakaba eli umwe wabashanu banababili tikagala naye. 9 Iye wakaba eli nabana banhukajana bana, bakabepolofita. 10 Tichigele kwamazhuba, umpolofeti unowhi Agabhasi waluva kuJudiya. 11 Wakezha kwatili, akatola ibhanti lyaPaulu akazwisunga iye nokukwe makumbo namaboko, kova eti, "Unodalo uMpepo uNchena unoti: BaJuda bokuJelusalema bachasunga mweni webhanti yeli akale bompile kunaBokuzhe."

12 Patakazwiwha yezwi, isu pamwempela nabanhu bopakalepo takombweta iye kuti esinde kuJelusalema. 13 Pakalepo Paulu wakadabila eti, "Mumutani na, mulila ali mulwajisa moyo wangu? Imi ndilozwimisila kuti ndisungwe kana kufa zwako kuJelusalema, pezhulu pezina lyaTezi Jesu."

14 Paakalamba kukombelelwa nasu, takawhilijila tikati, "Chido chaTezi ngechitiwe."

15 Kwakati kwapinda mazhuba yaya, isu takazwibambanyila tikenda kuJelusalema. 16 Bamwe babalayijwa banova kuKesaliya bakenda nasu, betisenga kungumba yaMunasoni wokuSaipulasi, undayijwa wantolo, watalunogala naye.

17 Patakati taswika muJelusalema, banakwaina bakatitambula nolushanto. 18 Muchimuka, Paulu wakenda nasu kunaJemusi, nabakulwana bakaba belipo. 19 Patakapeja kumusana nabo, wakalondejela chimwe nechimwe chezwinhu zwakatiwa naMwali mukati mwaBokuzhe nokushinga kukwe. 20 Pabakazwiwha yezwi, ibo bakakuja Mwali. Bakati kwaali, "Iwi ubweni mwanakwaina, kuti zwiulu zwinji chini zwabanovumila mukati mwabaJuda, ibo bose balosungwalila zwomulawu, 21 akale ibo balobujwa nezwizwo iwi kuti umubalayija bose bechiJuda bagele naBokuzhe kuti belashe Mozesi, ubabuja ibo kuti besimhalaje bana babo kana kutobela ungalilo yoyo. 22 Tota chini ngweno? Ibo bose bachawha kuti iwi wezha. 23 Nokudalo ita zwatinokubuja. Isu tina banhulume bana balosungwa nekowhe, 24 tola banhulume yaba uzwichenese pamwempela nabo, ubalipile indipo yabo, kutila kuti beguswe misholo yabo. Yezwi zwinota kuti bose bebone kuti yezwi zwabakabujwa nezwizwo azwitoba izwo, koga iwi unosokwenda ulondota mulawo. 25 Kana zwili zwaBokuzhe bakadimbwa, isu tatumija lukwalo luna untongo wedu kuti belekeje kulya zwapilwa kuzwibezhwa akale nelopa nezwasinwa akale nobupomboli." 26 Pakalepo Paulu wakatola banhulume yabo, muchimuka iye wakazwichenesa pamwempela nabo, ndipo pabakangwina mutempeli, benopa chizibiso chokuti mazhuba okuzwichenesa anozhajikijwa lini akale nompilo womwe nomwe.

27 Alobopela mazhuba mashanu ana mabili, baJuda bokuEzhiya, bakombona eli mutempeli, bakakunijila luvute lwose, ndokuva bombhata iye, 28 beshomeja beti, "Banhu bomuIzilayeli, bhanchani! Yoyu ndiye unhulume umulayija banhu kwosekwose zwisinokwendelana nabanhu, nomulawu akale nobugalo bwedu yobuno, pezhulu pezwi iye wakangwinisa baGiliki mutempeli, nokudalo wakaswibhisa bugalo buchena yobu." 29 Bakadalo nokuti ibo bakababona Tolofinasi wokuEfesu elinaye muguta, akale bakayeyela kuti Paulu wakongwinisa mutempeli.

30 Pakalepo iguta lyose lyakanyandulwa, banhu bakalabuka pamwempela, bakombhata Paulu bakonkulunta, iye bombhisa mutempeli, pakalepo mashubo akakonywa. 31 Bechinokweja kuumbulaya iye, iwhi lyakaswika kuntungamili wegapo lyabalwi kuti yose iJelusalema yaba inyonganyonga. 32 Iye pakalepo wakatola balwi nabatungamili bamazana, bakalabuka benda kwaabali, pabakabona untungamili nabalwi, bakalekeja kundoba Paulu. 33 Pakalepo untungamili wabalwi wakenda kwaali akonsunga iye kova elayila, kuti esungwe namaketani mabili. Wakombhuza kuti iye ndiyani akale kuti wakaba atani. 34 Bamwe mudupwa bakaba bekongoloka zwimwe zwinhu, bamwe zwimwe bo, sezwo aajakawana ichokomende nenyonganyonga, iye wakalaya kuti ebuzwe mungumba yabalwi. 35 Paakaswika pamitambiliko bakonyamula nokuti idupwa lyakabanyema nolunya, 36 luvute lwabanhu lwakatobela lushomeja luti, "Ngebulayiwe!"

37 Paulu alobongwiniswa mungumba yabalwi, iye wakati kuntungamili wabalwi, "Ndimukumbila kulebeleka chimwe chinhu kwauli?" .Iye akati, "Unoziba chiGiliki na? 38 Autoba iwi uNjipiti yondya wakada kusungilija banhu ngwenongweno kuti bepanduke akale akatungamila bapanduki bakabulaya banhu zwiulu zwina, mugwegulu!"

39 Paulu wakashandula eti, "Imi ndinJuda unova kuTasusi muSilisiya, ungali weguta lisidukutuku, ndimukumbila, undivumile ndilebeleke kubanhu."

40 Paakompa imvumo, Paulu elimile pontobelo, wakanyamula luboko kubanhu, kwakaba nokunyalala kukulwana, wakalebeleka kwabali mululimi lwechiHebhelu.