1 Bechinolebeleka nabanhu, batebuji, nonkulwana wabalindi betempeli akale nabaSadusi bakezha kwabali, 2 bakabakanyema, nokuti bakaba belayija nezwo kumuka kwaJesu munabakafa. 3 Bakabasunga bakababiga muntolongo, sezwo kwakababa madeko. 4 Koga, banji bakawha iwhi bakadimbwa, banhulume bakashanduka bakabeswika kuzwiulu zwingaba zwishanu.

5 Muchimuka, batongi babo, bakulwana bobugalo, nabakwali bakabaka bungana muJelusalema, 6 naAnasi untebuji unkulwana wakabelipo naKefasi naJoni naAlekizanda, nabanji bemhuli yobutebuji bukulwana. 7 Pabakabamisa pakati pabo, bakababhuza beti, "Yezwi zwinhu mwazwita namasimba ani kana kuti muzina lyani!"

8 Pita, azhajwa noMpepo Nchena, wakabashandula eti, "Imwi batongi babanhu akale namwi bakulwana, 9 kana isu nasi titongeselwa kuta chinhu chibuya, chakatilwa unhu igosha, kuti wakachijwa neni, 10 ngezwizibikane kwamuli mose, akale nokubanhu bose baIzilayeli, kuti muzina lyaJesu Kristo wokuNazaleta, umwakakahamila panchinjikwa, wakamuswa naMwali kubafi, ndiye watubulisa kuti yoyu unhulume eme mbeli kwenu eliumpenyu. 11 Yeli ndilyo ibwe lyakalambwa namwi babaki."

"Koga ndilyo lyaba ibwe linodikana pamabwe wose."

12 "Apana umwe unowanisa luchijo, akale akuna limwe izina pasi pedenga, lyakapiwa banhu kuti bewane kuchijwa."

13 Ngweno pabakabona myoyo isina lutyo yaPita naJoni, akale bakabona kuti, abajakabakabelinendayijo, belibanhu zwabo, bakachenama akale bakabaziba kuti bakabeli naJesu. 14 Koga pabakabona unhulume wakabachijwa elimile nabo, bakashayiwa indebo yokunyenyeja. 15 Koga pabakababhisa mugota kuti bende kuzhe, ibo bakasala begowana chabo chabo, 16 beti, "Totani nabanhulume yaba? Ichokomende kuti chishamiso chikulwana chatiwa naibo akale bagali bomu Jelusalema bose banozwiziba, akale isu atingalambe. 17 Koga kuti zwisizhalilane mubanhu, ngatibatyisijileni nesimba kuti kuva nasi besilebeleke nezina lyaJesu kubanhu."

18 Nokudalo bakabashoba bakaba kalalila bebabuja kuti besilebeleke kana kulayija muzina lyaJesu. 19 Koga Pita naJoni bakabashandula beti, "Zwiyeyeleni mwoga kuti zwibuya ngezwipi, mbeli kwaMwali, kuwhilila imwi kana kuwhilila Mwali, pasunulani imwi, 20 isu apana zwatingalebeleke kuzhe kwezwatakabona akale nezwatakawha." 21 Pabakabatyisijila kabili, bakabasungunula kuti bende, bashayiwa inzila yokubalanga, betya banhu, nokuti banhu bose bakabekuja Mwali nezwakabatikana. 22 Unhulume wakachijwa wakabeli namakole anopinda makumi mana.

23 Pabakasungunulwa, bakenda kubakwaina babo bakabalondejela zwose zwabakabujwa nabatebuji bakulwana akale nabakulugulu. 24 Pabakazwiwha yezwi bakabuya pamwempela bakanyamula mawhi abo pamwempela kuna Mwali bakati, "She, uli Mwali wakabumba idenga, nenyika akale negungwa, naizwo zwose zwili mwazwili. 25 Nondomo watate bedu Davidi, undanda uwo wakati muMpepo uNchena, ini zwanyeteja bokuzhe, akale nabanhu, beyeya zwinhu zwisinanshingo!"

26 Mashe enyika bakashangana nabatongi bakawhanana kulwisa She akale naKristo uwe.

27 "Chokomende muguta yeli bakabaka bungana belwisa undanda uwo Jesu unchena, iwi uwakaguba, bose Helodi naPonsiyo Pilato pamwempela naBokuzhe akale nabanhu bokwaIzilayeli, 28 bakata zwiwakalonganya namaboko awo kuvila ntolo kutila kuti zwitikane. 29 Ngweno, She, ilinga kutyisijila kwabo, ipa bashingi babo myoyo isina lutyo kuti bepupule iwhi lilyo. 30 Kuti noluboko lulo lutandabujwe mukuchilisa, akale zwitondejelo nezwichenamiso zwitiwe muzina lyondanda uwo unchena Jesu." 31 Pabakapeja kunamata, bugalo bubakabeligele bwakadengunuka, bose bakazhajwa noMpepo Nchena akale bakapupula iwhi lyaMwali pesina kutya.

32 Ngweno ibunga lyabanhu lyakadimbwa likaba nomwoyo umwempela nompepo umwempela, apana unhu wakabeli nechiche, koga zwose zwakabeli zwabo bose. 33 Akale nesimba igulwana bapositoli bakapa busumikiji bwokumuka kwaShe Jesu munabakafa akale ishe jaMwali ihulwana jakaba kunaibo bose. 34 Apana wakabeshayiwa pakati pabo, nokuti bose bakababeli nemiminda nejingumba bakatengesa bakabuza imali yezwakabatengeswa, 35 ikapilwa mumaboko abapositoli, ikakobanywa kuna umwe noumwe sokushayiwa kwabo. 36 Josefa wakapiwa untupo nabapositoli wokuti Bhanabhasi, (zwileba kuti mwananhulumyana woNsungwaji), unLevi unova kunyika yeSaipulasi, 37 wakatengesa uminda uwe, akatola imali, akaibiga mumaboko abapositoli.