1 Wakasikabo kuDebhi nokuLisita. Undayijwa wakabelimo yomo unowhi Timoti, mwananhulumyana wamai bechiJuda baluba umvumili, koga tate babe baluba unGiliki 2 Wakabelebwa zwibuyanana nabanakwaina bomuLisita akale nabomuAikoniyumu. 3 Paulu wakada kuti Timoti ompelekeje, nokudalo wakontola akomhalaja nenyaya yabaJuda bakaba beli mubugalo yobo, nokuti bakaba beziba kuti tate babe unGiliki. 4 Pabakenda mulwendo lwabo bepinda mumakuta, bakabebanyeulila kuti belondote zwisungo zwakabatiwa nabapositoli nabakulwana bakaba beli kuJelusalema 5 Nokudalo makubungano akasimiswa mukudimbwa, akale akawanda izhuba nezhuba.

6 Bakapinda munyika yeFilijiya nomuGalatiya, nokuti bakaba bajibiswa noMpepo Nchena kuleba iwhi muEzhiya. 7 Pabakaswika pakalingana neMisiya, bakakweja kunda kuBhitiniya, koga uMpepo waJesu aujakabavumila, 8 nokudalo bakabapinda muMisiya, bakenda kuTulowasi. 9 Pakaboneka umbono kunaPaulu busiku, unhulume wokuMasedoniya elimile ombweta eti, "Izha kuMasedoniya utibhanche." 10 Paakabona chibono, pakalepo takalonganyila kunda kuMasedoniya kuti tinobhaunula iNdebo iMbuya kwabali.

11 Takangwina mubwato tikakwenda kuva muTolowasi, tikananga kuSamotilasi akale nezhuba linotobela tikaswika kuNiyapolisi, 12 kuva yoko takaswika kuFilipi, lili ilyo iguta lyotanga kana ungwina mushango yeMasedoniya, akale ilinyika ili pasi pabaRoma. Takagala muneli iguta kwamazhuba, 13 nezhuba lyeSabata takenda kuzhe kweshubo kumbali kwolwizi, kwatakayeyela kuti kungaba nobugalo bonamatila, takagala pasi tikalebeleka nabanhukaji bakabaka bungana. 14 Umwe wakatiwha wakabeli unhukaji wakaba ewhi Lidiya, weguta lyeTiyatila, walutengesa ingubo jensulubele, akale enamata Mwali. She Mwali wakazhula moyo uwe kuti etambule zwakaba zwilebelekwa naPaulu. 15 Paakabhabhatizwa, nengumba iye yose, wakati kwekweteja eti, "Kana mwandibona kuti ndinobimbika kuna She, izhani mogala kungumba yangu." Wakabhudilila kutibweta kuti tigale naye.

16 Patakaba tinda kubugalo bwokunamatila, takashangamijwa nonsichana unzike akale wakaba elinejimu lyokukandila, akale wakabebuzila beni babe ifuma inji nokuleba mbeli. 17 Iye wakatobela Paulu nasu, eshomeja eti, "Yaba banhulume zwishingi zwaMwali upezhuluzhulu, bamumubhaunulila inzila yoluchijo." 18 Yezwi iye wakazwita kwamazhuba manji. Koga Paulu wakanyala, akachingunuka eti kunjimu, "Ndokulaya, muzina lyaJesu Kristo bhuda muna yiye." Iwo wakabhuda muna iye nonshaji wakaleyo. 19 Koga matezi awe pabakabona kuti inzila yabo yokuwana ifuma yapalajwa, ibo bakabhata Paulu naSayilasi bakabakuluntila kubugalo bokushambajila, mbeli kwabatongi, 20 Pabakababuza ibo mbeli kwabatongi bomulawo bakati, "Yaba banhulume ngabechiJuda, akale bamuzoza iguta lyedu. 21 Ibo bamulebeleka bekuja ingalilo ikokuzhe kwomulawu, iyo isinokwelela kutiwa nasu maRoma" 22 Luvute lwakangwinila mukubalwisa, nokudalo batongi bomulawo bakabambula zwimbalo bakalaya kuti belobwe nemizato. 23 Pabakati babanabha kasakasa bakabaposela muntolongo, bakalaya undindi wejele kuti ebalondote. 24 Awana kulayiwa yoku, iye wakababiga muntolongo lyomukatikati akale akabasungilila makumbo kuzwitanda.

25 Kwaba pakati pobusiku Paulu naSilasi benamata nokukwimba jimbo kunaMwali, bamwe basungwa bakabakawhilila, 26 pakalepo kwakaba chidedemo chikulwana chenyika, zwakata kuti chimisikilo chentolongo chidengede, pakalepo matendele ejele ose akazhulika, maketani akabakabasunga bose akasungunuka. 27 Paakamuka undindi wejele wakabona mikoba yejele yakashama, wakabhisa igwabalaza lilye eda kuzwibulaya, eyeya kuti basungwa batizha. 28 Koga Paulu wakashomeja newhi lipo pezhulu eti, "Usuzwikubaje, tose tipo."

29 Wakashomeja kuti zwimuniko zwitutumiswe, akangwina elabuka akale eluluma nolutyo akawila mbeli kwaPaulu naSailasi, 30 akababhisila pazhe akati, "Matate ini zwandingate kuti ndichijwe!"

31 Ibo bakati, "Dimbwa muna She Jesu, unoochijwa, iwi nemhuli yiyo." 32 Ibo bakabhaunula iwhi lyaShe kwaali nokuna ibo bose bakaba beli mungumba yiye. 33 Iye wakabatola nonshaji wakaleyo wobusiku, akashambisa zwilonda zwabo, kova ebhabhatizwa pakalepo, nemhuli yiye yose. 34 Pakalepo wakabasenga kungumba yiye, akabiga zwokulya mbeli kwabo, iye wakashantilwa nemhuli yiye yose nokuti wakabadimbwa kunaMwali.

35 Pakwakeja, batongi bomulawo bakatuma mapolisa beti, "Lekejani banhulume yabo bende."

36 Undindi wejele wakabuja Paulu eti, "Batongi bomulawo batumila iwhi kuti musungunulwe, nokudalo ibhudani ngweno munde mulunyalalo."

37 Koga Paulu wakati kwabali, "Ibo bakatiloba mbeli kwonhu wose, tisina undandu, isu tili banhulume akale tili banizi bechiRoma, bakatiposela muntolongo, ngweno bamuda kutibhisa zwesiswa? Mane! Ibo bomene ngebezhe bootibhisa."

38 Mapolisa bakabuja batongi bomulawo yaya mawhi, ibo bakatya pabakawha kuti tibanizi bechiRoma, 39 nokudalo bakezha bakokumbila lulekejelo kwabali. Bakababhisa bakabakumbila kuti bebhude muguta. 40 Nokudalo ibo pabakabhuda muntolongo, bakashanyila iLidiya, pabakati babona banakwaina, bakabasungwaja ndokuva benda.