1 Pakwakatiwa chisimiso chokuti tinde kuItali nobwato, bakasenga Paulu nabamwe basungwa kuntungamili wezana lyabalwi, "Wegapo lyamaAgasitani," unowhi Juliyasi. 2 Tangwina mubwato bokuAdilimitiumu, bwakaba bwalebokwenda bunda kuzwito, mumapambo eEzhiya, takakwenda mugungwa, tipelekejwa naAlisitakasi uMasedoniya unova kuTesalonika. 3 Muchimuka takangwina muSidoni, kwaakatilwa ishe Paulu naJuliyasi, kuumvumila kuti ende kubakwaina babe kuti bombanche. 4 Patakangwina mugungwa nobwato, takakwendela mulubavu lweSaipulasi, nokuti ibhepo lyakabeva kwatakabenda. 5 Tendila mbeli tikwenda takataluka igungwa liko kumbali kweSilisiya nePamfiliya, tikanoswika kuMila imomuLisiya. 6 Yopo untungamili wezana lyabalwi wakawana bwato bwokuAlekizandiliya bunda kuItali, akatitanisa mwakale. 7 Takakwenda polepole kwamazhuba, tikaswika nobulemu kule neKinidasi akale nebhepo alijakativumila kuti tindile mbeli, tikakwenda takasikatilwa neKileti kule neSalimoni. 8 Takwenda nobulemu mubhambo lyeKileti, tikaswika kubugalo bunowhi Malo Mabuya, pelyo neguta lyeLasiya. 9 Sezwo takabalashikilwa nonshaji unji, igole lyeenda kwaswika unshaji unengozi kukwenda mugungwa. Akale izhuba lyolulekelelo lyakabapinda, Paulu wakabachenjeja eti, 10 "Makulukuta, imi ndabona kuti lwendo yolu lunoba nokulwajiswa akale nokulashikilwa kukulwana, zwisi zwezwibiya nobwato chete, koga nobupenyu bwedu." 11 Koga unkulwana wezana lyabalwi, wakawhilila unkulwana wobwato nomweni kunazwakalebwa naPaulu. 12 Nokuti pechito paluba pesakalulama kugalwa nonshaji wemhepo, banji babo bakayeya kuti kukwendwe, kuti umwe unshaji nemazha baluswika kuFonikisi, kuchito chokuKileti, chilolinga kuchaloba kulolelekela kubuvezhuba nechamhembe ilolelekela kubuvezhuba, begale yoko nonshaji wemhepo.

13 Palyakapunga zwinyolonyolo ibhepo lyechamhembe, bakabona kuti zwababeyeya zwingatikana, bakava banyamula ingobyo yobwato bakakwenda betobeleja ibhambo lyeKileti. 14 Koga mushule mwonshaji unshomanana kwakaswika ibhepo igulwana linova kuchaloba lyakalelekela kubuvezhuba liva kunyika, 15 bwato pabwakangwina mubhepo abujakatubula kumilana nalyo, bwakasusumwa. 16 Akale patakasitwa nechibongo chitukutuku chinowhi Kauda, takatubula nobulemu kusunga kato, 17 mushule mwokukanyamula, bakasunga zwokusimisa idako lyobwato, pakalepo betya kuti bungalobelelwa pebhambo lyeSailitisi, bakambweja ingobyo, bakasundwa nebhepo. 18 Sezwo takabesundilwa yokunoku nebhepo, muchimuka, bakatangisa kulashila zwibiya mugungwa, 19 kooti nezhuba lyatatu bakalasha zwishingiso zwobwato namaboko abo. 20 Pakwakatola mazhuba manji tisinobona izhuba kana inyenyeji, akale nebhepo igulwana kasakasa lindila mbeli lipunga, takava tabola myoyo kuti atitoomunulwa. 21 Bakaba nonshaji besina zwokulya, Paulu wakezha mbeli kunaibo akati, "Matate angu, ngana mwakangondiwhilila, tisakanyamuka kuva kuKileti amujalulwajiswa nokulashikilwa ali. 22 Ngweno ndinoti ibani nemyoyo misimu, nokuti apana uchalashikilwa nobupenyu, koga bwato chete. 23 Ndinodalo nokuti busiku bwanasi, ingilozi yaMwali, Iye wandili uwe akale wandinonamata, yandizhila, 24 ikati, ‘Usitye Paulu, iwi unokwelela kunoma mbeli kwaKesali, akale chokomende, Mwali wakupa bose baumukwenda nabo.’ 25 Nokudalo matate angu, simani, imi ndodimbwa munaMwali kuti zwinooba sokubujwa kwangu. 26 Koga tolashilwa panechimwe chibongo." 27 Pabwakaswika busiku bwegumi linabuna, tili mukukunguluka mugungwa lyeAdiliyatiki, pakati pobusiku bakwendesi bobwato bakayeyelela kuti bangaba pelyo nokumbali kwenyika. 28 Bakakwela kumila kwevula bakawana kuti kunokwana makumi matatu anamashanu nemwempela amamita, bakwenda kashizho kafupi bakakwela akale, bakawana makumi mabili anamashanu namabili amamita. 29 Mukutya kuti tingangwina mumabwe, bakadeleja ingobyo ina mushule mobwato, bakanamata kuti kuje, 30 bakwendesi bobwato bakaba bepota inzila yokutizha mubwato, bakabadeleja kato mugungwa, benyepejela sabanhu bamudeleja ingobyo mbeli kobwato, 31 Paulu wakati kuntungamili wezana lyabalwi, "Bangasogala mubwato yaba banhu, amungachijwe." 32 Pakalepo balwi bakadumula minchili yakato, bakakalekeja kenda.

33 Kwaleboba kumijelo, Paulu wakabasungilija bose kuti belye eti, "Nasi izhuba lyegumi lina mana musilogajikana mumyoyo, akale musinolya, pesina chamwalabila. 34 Nokudalo imi ndomukumbila kuti mulye, yezwi zwinomupa masimba, sezwo pesina uchalashikilwa kana nakanyala pakati penu." 35 Wakati aleba yezwi, iye wakatola chinkwa, akaboka kunaMwali, pambeli pabo bose, akachimedula akatanga kulya. 36 Pakalepo bose bakawha basungwajika ndokuva balyabo. 37 Isu tose mubwato takaba tili mazana mabili, namakumi mashanu ana mabili, nashanu nomwempela. 38 Akale balya bakaguta, bakalelupisa bwato, bakalashila ikoloni mugungwa.

39 Pakwakeja, bakabona inyika koga abajakaiziba, bakangobona unsundila unejelenchele, bakalonga kuti bwato bunde pebhambo. 40 Bakasupula ingobyo bakajisiya mugungwa, nonshaji wakaleyo besupula minchili yakabakasunga inhando, pakalepo benyamula isaili lyambeli kubhepo benda kujelenchele. 41 Koga pabangwina pabugalo businomila mbeli kobwato kwakabhatilila busichinokwenda, akale ishule lyabwo lyakavunaulwa namapitu,

42 Chilongwa chabalwi chakaba chili chokubulaya basungwa, kuti pesibe uchadwaya etizha, 43 koga untungamili wezana lyabalwi, eda kuchija Paulu, wakabajibisa kuta zwabakabeyeya. Wakabuja bakabetubula kudwaya kuti beshotokele muvula kutanga bende kunyika, 44 asi bamwe bose bebhatilile pamapulanga kana pezwibabi zwobwato. Ndizwo zwakatisa kuti bose bevubuke beswike penyika.