1 Agilipa wakati kunaPaulu, "Unemvumo yokuti uzwilebelekele iwi nokuko." Pakalepo Paulu wakanyamula luboko akatanga kuzwilandula. 2 "Imi nokwangu ndozwibona ndili nemazha, kuti ndime mbeli kuko She Agilipa, ndilimukuzwilwila nasi, ndakanangana nemilandu yose yandimupomelwa nabaJuda, 3 nokuti iwi unaluzibo nongalilo akale nokunyenyejana kwabaJuda, nokudalo ndokukumbila kuti undiwhilile nomwoyo undefu.

4 "Inzila yobupenyu bwangu kuvila ndichili umbisana, unshaji wose ndili munaboluji lwangu akale muJelusalema, yezwi zwinozibwa nabaJuda bose. 5 Ibo bagala banozwiziba kwonshaji undefu, kana beli nechido chokusumikija, kuti bupenyu bwangu bwabetobela kukudimbwa inzila inazwisungo zwilemu, ndabeli umFalisi. 6 Ngweno yopa ndimile nditongeswa chibimbiso chakatiwa naMwali kumatategulu edu, 7 chili icho chilolingililwa nenduji jedu igumi nembili kuti jibuwane, sezwo zwibanonamata nesimba busiku namasikati. Pezhulu pezwi, imi ndimupomelwa undandu nabaJuda. Eya She! 8 Ini zwinolangalisisa kuti azwitotubulika kuti Mwali emuse bakafa!

9 "Imi nokwangu ndakabwetekeja, kuti ndokwelela kuti ndite zwinhu zwinji zwinonyenyejana nezina lyaJesu wokuNazaleta. 10 Yezwi ndakazwita muJelusalema, andijakakonyela chete bachena muntolongo, asi nesimba lyabatebuji bakulwana, pabakabebulayiwa imi ndakavumilana nazwo. 11 Ndakabajiija tunji mumasinagogo wose akale ndikweja kuti betuke Mwali, akale nokubanyetelela zwikulwana ibo, imi ndakabayabisa nomumakuta enyika jabamwe."

12 "Nokudalo ndakatola lwendo lwokunda kuDamasikasi, nesimba nokusungulwa nabatebuji bakulwana. 13 Nonshaji wamasikati makulwana, Eya she, imi ndili munzila ndakabona lupenyo luva kudenga, lwakapenya kupinda izhuba, lwakatutuma pandili nopanabo bakabekwenda nami. 14 Patakati tose tawila pasi, ndakawha iwhi liti kwandili mululimi lwechiHebhelu, ‘Saulu, Saulu ini undishetesa? Zwinokulwajisa iwi kubhakala lushoma.’ 15 Imi ndakati, ‘Ndiwi aani Tezi?’ Tezi wakati, ‘Ndimi Jesu, waumuyabisa. 16 Koga inyamuka ume namakumbo awo, nokuti ndazwitondejela kwauli nechinangwa yechi, kukuponcha kuti ushinge, ube unsumikiji kunezwawabona, akale nezwimwe zwichatobela ndizwitondejela kwauli, 17 ndikusungunula kubanhu nokuna Bokuzhe kwandinokutuma 18 kunozhula mesho abo, kuti ibo beshanduke bebhude munhilima benda kumwenje akale beve mumasimba aGuluzhanje bebuye kunaMwali, kutila kuti betambule kulekejelwa kwoluchinyo, akale nobugalo mukati mwaabo bakacheneswa nokudimbwa kwandili.’

19 "She Agilipa, andijakanyenyejana nechibono chokudenga, 20 koga ndakazibisa kutanga bokuDamasikasi, kukoozha bokuJelusalema akale nomunyika yose yeJudiya, akale nokunaBokuzhe, kuti ibo beshanduke akale bebuye kunaMwali betukota mishingo inokwelela yabo bakashanduka. 21 Yechi ndicho chisoko, chabakandibhatila baJuda ndili mutempeli bekweja kundibulaya. 22 Kuswikila yeli izhuba, imi ndimuwana lubhancho lunova kunaMwali, akale ndimile yopano kusumikija kunaibo bose batukutuku nabakulwana, ndileba chete zwakalebwa nabapolofeti naMozesi beti zwinootikana, 23 kuti Kristo unokwelela kujiijwa, akale kuti unooba wotanga kumuka kwabakafa, Iye unoopupula lumuniko kubaJuda akale nokunaBokuzhe."

24 Echinozwilwila, Fesitasi wakati newhi lyopezhulu, "Paulu, unopenga, indayijo yiyo yopezhulu imukupengesa."

25 Koga Paulu wakati, "Anditopenga, unolemekejwa Fesitasi, koga ndimulebeleka ichokomende chipo pachena. 26 Iye she unozwiziba yezwi zwinhu, nokudalo imi ndolebeleka ndakasungunuka kwaali, nokuti nokubona kwangu apana zwinhu zwatikana esazwibona nokuti yezwi azwijakatikana mwakasisika. 27 She Agilipa, munodimbwa bapolofeti na? Ndinozwiziba kuti unodimbwa."

28 Agilipa wakati kuna Paulu, "Nonshaji unshoma umuyeya kundita unKristo!"

29 Paulu wakati, "Ungaba umfupi kana undefu, imi ndinoti Mwali ngate kuti kusibe iwi chete koga naibo bose bandiwha nasi yelino bebe sami, kuzhe kwamaketani yaya." 30 Pakalepo she wakanyamuka, pamwempela nagavena, Bhenisi, naibo bose baakabeligele nabo, 31 pabakati babhuda yomo, bakati kunoumwe noumwe, "Yoyu unhulume apana chaamuta chinokwelela kuti ebulayiwe kana kuti ebigwe muntolongo." 32 Agilipa wakati kuna Fesitasi, "Yoyu unhulume walusungunulwa ngana asabakumbila kusengwa kunaKesali."