1 Mushule mwezwo wakabhuda muAtenisi akenda kuKolinte. 2 Wakawana unJuda unowhi Akwila, chizwalwa chokuPontasi, echinoswika eva kuItali, nonkaji uwe unowhi Pulisila, nokuti Kilaudiyasi wakaba alayila baJuda bose kuti bebhude muRoma. Iye wakenda kunobabona, 3 nokuti bakaba beta unshingo umwempela naiye, wakagala nabo, akale bakashinga bose nokuti bose bakaba belibafhumi bamatente. 4 Wakanyenyejana nabo nezhuba lyeSabata lyogalyoga musinagogi, ekweja kubabweta baJuda nabaGiliki.

5 Pakaswika Timoti naSailasi beva kuMasedoniya, Paulu wakaba ekabhatikana nokubhaunula, nokusumikija kubaJuda kuti Kristo ndiye Jesu. 6 Asi pabakonshunda nokuntuka, iye wakakuhumula zwimbalo zwizwe, akati kwabali, "Ilopa lyenu libe pamisholo yenu! Imi andina undandu. Kuvila nasi ndimunda kunaBokuzhe." 7 Wakabhuda yopo, akenda kungumba yonhulume unowhi Taitasi Jusitasi, unonamata Mwali, ingumba yiye yakabakabakijana nesinagogi. 8 Kilisipusi, unkulwana wesinagogi, wakadimbwa munaShe pamwempela nemhuli yiye yose, nabanji baKolinte bakawha Paulu bakadimbwa bakabhabhatizwa.

9 Bumwe busiku muchibono, She wakati kuna Paulu, "Usitye, koga lebeleka akale usinyalale, 10 nokuti ndinanawi, akale apana unhu uchakuzizinga nokukulwajisa, nokuti ndinabanhu banji muneli iguta." 11 Iye wakagala igole lina myeji mishanu nomwempela, elayija iwhi lyaMwali mukati mwabo.

12 Kwakati Galiyo eli untongi weAkeya, baJuda bakabhatana kumukila Paulu, bakombuza mbeli kwegota 13 beti, "Yoyu unhulume, umukwekweteja banhu kuti benamate Mwali nenzila isimo mumulawo!" 14 Paulu paakada kushamula undomo uwe, Galiyo wakati kubaJuda, "Ngana ilinyaya yokuchinya, kana yondandu umbi ndaluba nendangalilo yokumuwhilila, amwe baJuda, 15 koga nokuti yeyi inyaya yemibhuzo yendebo akale namazina nemilawo yenu, zwiboneleni imwi nokwenu, imi ndalamba kuba untongi wezwi zwinhu." 16 Wakava abatatamila pegota lyobutongi. 17 Ibo bose bakabhata Sositenesi, untongi wesinagogi, bakondoba mbeli kwegota. Koga Galiyo aajakaba neni nazwo yezwi.

18 Mushule mwezwi Paulu wakagala mazhuba manji, ndipo paakakonekana nabanakwaina akangwina mubwato enda kuSiliya, eli naPulisila naAkwila. Eli kuKenkiliya wakagusa masusu, nokuti wakata ikowhe. 19 Pabakati baswika kuEfesu, wakasiyana nabamwe babe yopo, kova iye engwina musinagogi akanyenyejana nabaJuda. 20 Pabakonkumbila kuti egale nabo kwonshaji undefu, iye wakalamba, 21 koga paakabakoneka iye wakati, "Imi ndinoobuya kwamuli, kana kuli kuda kwaMwali," akangwina mubwato ebhuda muEfesu.

22 Paakaswika kuKesaliya, wakenda kunomusa igubungano, akale akenda kuAntiyoki. 23 Agala unshaji kwakaleko, iye wakanyamuka akenda kubugalo bulosiyanasiyana mushango IyeGalatiya neFilijiya esimisa balayijwa bose.

24 Ngweno unJuda unowhi Apolosi, chizwalwa chokuAlekizandiliya wakezha kuEfesu. Iye wakaba eli unhulume unachipo chokulebeleka, noluzibo lwamakwalo machena, elinoluzibo lwewhalo inchena. 25 Iye wakaba akalayijwa munzila jaShe akale episikana mumpepo, iye wakabelebeleka akale elayija nechokomende nezwaJesu, kojoba wakaba eziba lubhabhatizo lwaJoni chete. 26 Wakatanga kulebeleka esinotya musinagogi, koga Pulisila naAkwila bakonwha iye, bakontola, bakombhaunulila inzila yaMwali edondomeka. 27 Paakada kutaluka enda kuAkeya, banakwaina bakonsungwaja, akale bakakwalila balayijwa kuti bontambule. Paakaswika, wakabhancha kasa neshe jaMwali kunabo bakabadimbwa, 28 nokuti iye wakanyenyejana nabaJuda elineshungu pebunga lyabanhu, etondejela mumakwalo machena kuti Kristo ndiye Jesu.