1 Kwakati kwapinda mazhuba mashanu, untebuji unkukwana Ananiyasi, wakadelela nabamwe bakulwana nondebelekeli, unowhi Tetulasi. Bakatula undandu waPaulu mbeli kwontongi, 2 paakati ashobwa, Tetulasi wakatanga kuumpomela iye undandu eti, "Nokushinga kwenu isu timushantilwa nolunyalalo lukulwana, akale, mwakabuza inshanduko muluji yolu, 3 munzila jose, kwose kwose, kasa Felekisi, tozwitambula yezwi namaboko mabili. 4 Koga ndisinondila mbeli ndimucheleja, imi ndokukumbila mushe jenu kuti mutiwhe pashomanana. 5 Isu tawana yoyu unhulume eli umpalaji, unsungiliji pakati pabaJuda pasi pose, akale untungamili unkulwana wakakapo kamaNazalini. 6 Iye wakakweja kuswibhisa itempeli, koga takombhata. 7 Koga kwakoswika Lisiyasi untungamili wabalwi wakomvupula kwatili 8 Mungompenyengula iye imwi nokwenu mungaba nechokomende chemilandu yatimumpomela." 9 BaJuda naibo bakabhatana kumpomela undandu, besimisa kuti zwose yezwi ichokomende.

10 Akale untongi paakonkobola kuti elebeleke, Paulu wakashandula.

"Sokuziba kwangu kuti kwamakole manji mwaba muli untongi wolu luji, imi ndozwilwila ndakashanta. 11 Nokuti mungawana kuti imi andina mazhuba anopinda igumi namabili ndenda kunonamata kuJelusalema, 12 ibo abajakandiwana ndinyajana nonhu kana ndikovonga luvute, mutempeli kana musinagogi, kana muguta. 13 Ibo abatotubula kusimatija kwauli yezwi zwabamundipomela ngweno. 14 Koga imi ndinovuma mbeli kwenu kuti ndinonamata Mwali wamatategulu edu, neNzila yeyi, yabanoshoba kuti kakapo, ndidimbwa zwose zwilobigwa pasi mumulawo kana zwilokwalwa mubapolofeti, 15 ndili nechibimbo munaMwali, zwili izwo zwabanovuma yaba, kuti kunooba nokumuka kwabakafa kwayabo balolulama akale nababi. 16 Nezwo imi unshaji wose ndosoba noluyeyo lubuyanana kunaMwali nokubanhu.

17 "Kwakati kwapinda makole, ndakezha kobuza zwipo nompilo wemitebulo kuluji lwangu. 18 Pandakaba ndita yezwi, ibo bakandiwana ndakacheneswa ndili mutempeli, ndisina luvute kana ibhesupesu. 19 Koga bamwe baJuda banova kuEzhiya, ndibo balokwelela kuba yopano mbeli kwenu, bendipa undandu, kana beli nechimwe chibakumundipomela. 20 Kana ibo banhu yaba, belebe kuti ini zwabakawana ndikachinya ndili mbeli kwegota, 21 kuzhe kwewhi lyandakashomeja pakati kwabo, ‘Imi ndimutongeswa mbeli kwenu pezhulu pezwokumuka kwabakafa.’"

22 Asi Felekisi, eli noluzibo lulodondomeka nezweNzila, wakamisa undandu yoyo eti, "Paachadelela angoswika untungamili Lisiyasi ndipo pandichatonga inyaya yiyo." 23 Pakalepo wakalaya untungamilili wezana lyabalwi, kuti Paulu unokwelela kuti egale mubusungwa, koga ebe nolusungunuko, akale bakwaina babe besijibiswe kuntila zwidikano zwizwe.

24 Kwakati kwapinda mazhuba, Felekisi wakezha nonkaji uwe Dulusila, wakaba elinhukaji wechiJuda, kova akatumila kuti Paulu ebuzwe kwaali kuti onwhe elebeleka nezwo kudimbwa kukwe munaKristo Jesu. 25 Paakaba enyenyeja nozwendulamo nokuzwibhata akale nezwokutonga kuchootika, Felekisi wakakatamuka akale akati, "Indaazwo kwangweno, pandichawana unshaji, imi ndookushoba." 26 Nonshaji wakaleyo iye wakayeya kuti pamwe Paulu angoompa imali. Nokudalo wakabonshoba tunjinji ekwejisa naye. 27 Koga pakwakapinda makole mabili, Posiasi Fesitasi wakatola chigalo chaFelekisi, nokuda kushantisa baJuda, Felekisi wakasiya Paulu elimuntolongo.