Atos 16

10 Bu’ka pa Pauli kugabona makowe gayambi' go twaamwile kwibi’ka wiso yenda Makedonia kiyu’ngu’ya, twakwipwi panga kakape Nnu’ngu' atukemite twaali Abali Inannoga ku’lu'.

U’bi’lya kwa Lidia

11 Bu’ka Tiloa twayi’i kwa meli ntawalia mpaka Samotilake na pammalau' yake ngatuyi’ma Neapoli. 12 Bu’ka kwo, ngatuyenda mpaka Filipi, simo sa kilambo kiku’lu' sa Makedonia, kai' nga koloni lya Roma. Twaatami mukilambo so kwa masu’ba nsi’si'. 13 Sabato ya Ayahudi twapitike panja ya kilambo na twayi’i mbwega ya libi’ndi', tukitage panga nga pandu po sali. Twatetama no longela na alwawa babaakongolekine pandu po. 14 Nkati ya balu' babatupi’kaniage aai nnwawa yumo ywankilikitya Nnu’ngu' ywakemelwage Lidia mwenekaya wa Tiatila ywabile nsulusi wa ngu’bo ya katani ya lukanda lwa sambalau. Bwana aauyu’wi mwoyo wake ata api’kani no pokya galu' mayi’gi’yo gaagalongei Pauli. 15 Bu’ka pa aywo nnwawa pamope na alongobe pata ubatiso, aatitukoka kabaya, "Manaitei kakape mwibona panga nenga nimwu’bi’li Bwana, ninkemyanga kaya mukatame." Aatuli’ndi’ndi’li tuyende.

Pauli na Sila bendaboyolwa

16 Lisu’ba limo patwaabile katuyenda pandu po sali, mwi’nja yumo mmanda ywaabile na moka go londwa aakwembine na twenga. Kwa ulondoli wa mwi’nja ywo matayili bake bapatage mbanje yambone. 17 Bai, aywo mwi’nja aankotiye Pauli na twenga kapanga ndu’ti no baya, "Aba atumisi ba Nnu’ngu' Nku’lu'. Bammakianga ndi’la ya ukosopoli."