LUKA 2

Yesu abi’ki’lwa nnu’ngi' ya Nnu’ngu'

22 Pagaikite masu’ba go peleteyelwa Yusupu na Malia kati mwaipalilwage na salya ya Musa, abelei bo bampu’twi mwana no yenda nakwe ku Yelusalemu li’nga bampiye kwa Nnu’ngu'. 23 Musalya ya Bwana Nnu’ngu' iandikilwe, "Kila mwana mmele nnalu’me abaulilwe kwa Bwana." 24 Kai', baayi’i li’nga bapiye salaka ngunda abi’li' au mabunda gabi’li' ga ngunda, kati mwaipalikwage musalya ya Bwana.

25 Pamasu’ba go akwo Yelusalemu, kwai na mundu yumo mwene aki na ywankilikitya Nnu’ngu' lina lyake akemelwage Simioni, ywembe ali’ndage kwa kilu’lu' kosopolelwa kwa Isilaili. Loo Mpeleteu aabile pamope nakwe. 26 Loo Mpeleteu aamumukuli panga kiwo kinkolyali pangali kummona Kilisitu wa Bwana, Nkulungwa ywalondolilwe. 27 Bai, kalongoyelwa na Loo Mpeleteu, Simioni aayingi mulua lwa Nyumba ya Nnu’ngu'. Abelei ba Yesu pabannetike mwana wabe mulua lwa Nyumba ya Nnu’ngu', bampangi kati mwaipalikwage na salya, 28 Simioni aampoki mwana Yesu mumaboko gake ku’no kankwi’ya Nnu’ngu', kabaya,

29 "Nambi’yambi' Bwana utimisike malagano gako,

unnyi’ki’ti’ye ntumisi wako ayende kwa amani.

30 Mwanjaa kwa minyo gangu' niubweni ukosopoli wauuletike

31 waubi’i wiso ubonekane na mili’ma yoti.

32 Bweya wawaalu’a kwamulikya bandu ba panja,

na utukupu kwa bandu bako Isilaili."

33 Tati' na mau' bake Yesu baatisangala kwa makowe gaalongei Simioni kwa abali ya mwana. 34 Simioni aatikwayalya, ammakiye Malia mau' bake, "Mwana yu' alu’a panga kitumbu so oba no kosopolelwa kwa bandu baingi mu Isilaili. Nembe alu’a panga kati mwasu wo kanilwa na bandu, 35 li’nga gabagania bandu baingi kwo iya gaumukulwe. Na wenga wamwene, lwu’ngu' lwalubile kati lipanga linola lwalu’a kuoma pamwoyo wako."

36 Kwaabile na nnondoli wa Nnu’ngu' nnwawa nng’oi muno lina lyake Ana, biti Fanueli wa kabila lya Asheli. Bu’ka ku’nda, aatami na nsengowe myaka saba bai. 37 Kai', aatami pangali nnalu’me mpaka paikiye upi’ndo wa myaka samanini na nsese. Nsimu awo woti, aatami palua lwa Nyumba ya Nnu’ngu' kwo punga no lu’ba kilo na muntwekati. 38 Popopo ngaisa Ana na kunnumba Nnu’ngu' no baya makowe ga mwana ywo kwa bandu boti babalolelage kombolelwa kwa Yelusalemu.