Tite 20

Ibǝrayim swarki Murǝm Abimelek

1 Pǝlǝa Ibǝrayim tùro nying Mamǝre umnǝ Pǝɗanban Negev, sǝ kya do kǝla bǝri a ɓè ban à tunǝki ama Gera, a nre Kadesh andǝ Shur.*20:1 Ɓalli gbal aɓa: Tite 26:1,6. 2 Ibǝrayim ne aɓwana mala là mǝno ama māmí Saratu ka, mǝ’eambi na. Nda Abimelek, murǝm Gera, túrban à kya yinǝì wì nǝ Saratu a baní a palta male.*20:2 Ɓalli gbal aɓa: Tite 12:13; 26:7.

3 Sǝama nǝ dù ka, Ɓakuli yiu aban Abimelek aɓa lòrǝo sǝ ne wi ama, <<A nda lú ɓwa, acemǝnana ɓwama mana a twali ka, mā-ala na.>> 4 Sǝ Abimelek ka malaká sungŋo abani peatu ɗàng, nda bang ama, <<Ɓakuli, awu nǝ twalta aɓwapǝndǝa mǝnana à pàk kǝ cauɓikea raka lè? 5 Ibǝrayim nǝ nggearǝì banggam ama Saratu ka mǝ’eambi na, sǝ yì Saratu gbal ka anggo sǝ banggam. Ən pak gìr mǝnana ǝn pak ka nǝ ɓabum mǝpwat-pwati andǝ kunpwasǝa.>>

6 Pǝlǝa Ɓakuli ne wi aɓa mǝno yì lòrǝo ka ama, <<E, ǝn sǝlǝna ama ɓabumo na pwat-pwat, nda gìr mǝnana tsǝa sǝ ǝn tamsǝo arǝ pakkam cauɓikea ka; ǝn ɗekio wu kúmsǝí ɗàng. 7 Ado ka, nyesǝ ɓwame kyane kya pê burí, acemǝnana yì burí ka mǝɓangnǝa na. Yì ka nǝ̀ pakko hiwi sǝ awu nǝ dum nǝyilǝmu. Sǝ ɓǝ̀a nyesǝi wi māmí raka, awu nǝ sǝlǝa ama ɓafo we wunǝ amǝ’ɓala mò puppup ka, wun nǝ̀ wǔ.>>

8 Abimelek lo nǝ dǝmbari ɗiɗyal, tunǝ amǝ’túró-ɓala male kat sǝ nea wia gìr mǝnana kat kumban ngga. Lang à ok cê ka, ɓangciu bwalia. 9 Pǝlǝa Abimelek túrban à tunǝ Ibǝrayim ɓǝ̀ yiu a baní, sǝ ɗì ama, <<Mana mǝnia a pakka sǝm ani ka? Ya cauɓikea na ǝn pakko mǝnana nǝ̀ tsǝa sǝ a nǝ yinǝ ulang mǝnia yì gìr’mur’mwana amuram andǝ nzali-murǝm mem ngga? A pàngŋǝ́nàm gìr mǝnana ɓoaro ɓwa ɓǝ̀ pè raka.>>*20:9 Ɓalli gbal aɓa: Tite 12:19. 10 Osso Abimelek ɗì Ibǝrayim ama, <<Mana nda ɗenyicau mò sǝ a pak mǝnia yì gìr ka?>>

11 Ibǝrayim eari wi ama, <<Ən pê anggo acemǝnana ɗenyicau mem ngga nda mana ama, kǝɓwa pà kàm a ban mǝnia mǝnana kǝ ɓanggi Ɓakuli ka ɗàng, sǝ à nǝ̀ wal-luem ace mǝnana à nǝ̀ ak māmám ngga. 12 Sǝ ɓafo ka, yì, yì Saratu ka mǝ’eambam na. Sǝm nda eambuta-tárrú sǝni, nggea sǝm na pà mwashat raka. Sǝ ǝn ali duk māmám. 13 Lang Ɓakuli tunǝam ɓǝ̀n nying ɓala mala tárrám sǝ mǝ nggǝ gya arǝ abân ngga,*20:13 Ɓalli gbal aɓa: Tite 12:1. ǝn banggi wi nǝma, <Mǝnia ka nda pěmǝɓoarne mǝnana awu nǝ lǝmdǝàm ngga: Ban mǝnana kat sǝm nǝ̀ ká kàm ngga, banggi aɓwana ama mǝ nda mǝ’eambo.> >>*20:13 Ɓalli gbal aɓa: Tite 12:13.

14 Abimelek pǝlǝa yinǝ anzur andǝ andá, andǝ aguro aburana andǝ amamǝna, pè Ibǝrayim. Sǝ nyesǝî Ibǝrayim māmí, Saratu. 15 Pǝlǝa Abimelek ne Ibǝrayim ama, <<Sǝni, nzali mem ngga, ndya a ɓadǝmbo ka. Ban mana kat wariò a mǝsǝo ka, duk kàm.>>

16 Ne Saratu ama, <<Mǝ ndya ǝn nggǝ pè <mǝ’eambo> agbatali bolo azǝrfa á-mwashat (1,000) ka. Mǝnia ka mbweban na a bano ace ɓekǝ mǝɓane mǝnana yakǝla ǝn pangnò, sǝ ace lǝmdǝì aɓwana mana atò ka ama kǝ mǝɓane pà kàm a rǝò ɗàng.>>

17,18 Acemǝnana Murǝm Abimelek twal Saratu, mālá Ibǝrayim ngga, Mǝtalabangŋo tamsǝ ɓǝlmuna mala koya ɓwama a palta mala Abimelek. Nda Ibǝrayim pàk hiwi aban Ɓakuli ace Abimelek, sǝ Ɓakuli sonzǝi. Ɗǝm ngga sonzǝ mālá Abimelek andǝ amā-guro male sǝ à kum ɓǝlmuna.