Tite 49

Yakupu tsǝki amuni bù

1 Yakupu pǝlǝa tunǝ amuna-burana male sǝ bang ama, <<Wu yiu wu yi ramba abanam mǝ bangga wun gìr mǝnana nǝ̀ yia kum wun arǝ anza mǝnana à nǝ̀ yiu ka.

2 <<Wu yi ramba wu ǒ,

wun amuna-burana mala Yakupu;

wu kwakikir wun

arǝ tár wun Isǝrayila.

3 <<We Ruben, a nda muna-dǝmba mem,

ǝn ɓǝ́ló aɓa rǝcandǝa mala lo-ɓwa mem;

arǝò sǝ tita ɓwabura-ɓwa mem lǝmdǝa.

Aɓa gulo ka a nda mǝdǝmba mala amunem,

a kútiǎ kat nǝ rǝcandǝa.

4 Sǝ acemǝnana a ɗwanyi bwal ɓamuro,

a songnǝo kǝla nggeamùr ka,

a pà nǝ duk mǝdǝmba ɗǝm ɗàng.

Acemǝnana a kutio a ndà-nongŋo mala tárró,

a nongnǝ māmí.

We, a eauwe a gyangŋan-nongŋo mem

a pǝndǝki! *49:4 ɓalli aɓa: Tite 35:22.

5 <<Shimiyon andǝ Lawi ka,

njar malea mwashat aɓa ɓealɓikea.

Anggea-byau malea ka,

agirbura mala lúllô na. *49:5 Ɓalli aɓa: Tite 34:25,30.

6 Yilǝmem, kǝa kútí aɓa kùrkún ɓa-sǝmbǝrǝa malea ɗàng,

bangŋo mem, kǝa oasǝ ɓamuro aɓa dapi malea ɗàng,

acemǝnana à wal-lú aɓa bumlulla malea.

À gbakǝri ajamnda ace pakkiɗire.

7 Bumlulla malea ka mala ɓìkìbura na;

ɓǝ̀ súban sulǝo amurí.

Bumkpǝmna malea ka mala pàkkiagir ɗwanyi sǝn mǝsǝswatǝr na.

Mǝ nǝ mesǝkia aɓa nzali Isǝrayila.

Mǝ nǝ mesǝkia aɓalǝ aɓwana mala Yakupu. *49:7 Ɓalli gbal aɓa: Tite 32:28.

8 <<Yahuda, amǝ’eambo nǝ̀ ɓwangsǝo;

buo nǝ̀ kpa myal aɓio amǝbura;

amuna-burana mala tárró nǝ̀ ɓun a nzali a ɓadǝmbo.

9 Munem Yahuda, a ndà muna-im,

mǝnana nǝ̀ ɓangŋatà nyama nǝ̀ wali

sǝ nǝ̀ nyare a mpù male ka.

Kǝla im awu nǝ sarǝa a nǝ nongŋo,

kǝla nggeàɓwaná im,

yana ɓwe nǝ̀ kum ɓabumcandǝa nǝ̀ zorǝǒ?

10 Gara-murǝm pà nǝ̀ purî bù Yahuda ɗàng,

yálmúr aɓwana ka nǝ̀ pà a tàu male

bà yiu mala ɓwa mǝnana garè ka male na ka,

sǝ aɓwapǝndǝa ka à nǝ̀ ɓun a ɓadǝmbi,

à nǝ̀ oki wi.

11 Nǝ̀ kùr mǝdambǝriso male arǝ nggun-anap,

muna-mǝdambǝriso male ka nǝ̀ kùrì

arǝ bu nggun-anap mǝɓoarne mala aɓî;

nǝ̀ lákkí adaura male aɓa mùr-ɓǝlanggun anap,

adaura-múrɓì male ka nǝ̀ lákkia

nǝ mùr-ɓǝlanggun anap mǝbangŋe.

12 Amǝsǝì nǝ̀ bang bìng-bìng ace nu mùr-ɓǝlanggun anap,

aminǝi nǝ pwasǝ pwat-pwat ace nu kiura.

13 <<Zebulu ka nǝ̀ do a kún nggeamùr

sǝ ban male nǝ̀ duk ban kpasha mala awaru-mur;

nzong-nzali male nǝ̀ bik nggea-là Sidon.

14 <<Isaka ka mǝdambǝriso mǝ’ɓiki twal twalo na.

Nǝ̀ nongŋo a nzali ace ak twalo mǝdǝmbǝre a nzǝmi.

15 Ɓǝ̀ sǝn ɓoaro mala ban usǝlǝo male,

sǝ ɓǝ̀ nzali-do male pwasǝbumi ka,

nǝ̀ eare nǝ̀ twalki atwalo mǝdǝmbǝre a kwàrì.

Nǝ̀ eare nǝ̀ pak túró guro.

16 <<Dan ngga nǝ̀ duk mǝ’ɓashi mǝ’mǝsǝcaunì

amur aɓwana male kǝla mana acili atau mala Isǝrayila nǝ̀ pàk ka.

17 Dan nǝ̀ do kǝla n’yau a nkanggari njargula,

kǝla n’yau-barya aban nongŋo a gírí njarkusǝu.

Nǝ̀ kwar pǝr mana kǝ kútí ka a kusǝì

sǝ mǝkwak pǝr nǝ̀ puro nǝ̀ kpa nǝ nzǝmi.

18 <<We Mǝtalabangŋo, ǝn nggǝ soa mǝsǝam arǝò

ace kum amsǝban mò.

19 <<Amǝ’iuban nǝ agirbura a buià à nǝ̀ eau amúr Gad hǝrkit nǝ kiɗikiban,

sǝ yì ka nǝ̀ pǝlǝ arǝia nǝ munǝo nǝ̀ pǝrtea.

20 <<Asha ka nǝ̀ lìli, lǐ mala agirlina mǝɓoarne,

sǝ nǝ̀ pusǝ girlina mǝnana ndanǝ ɓoaro ace amurǝma ka.

21 <<Naftali ka nda kǝla mbamba mǝnana nda atarǝì ka;

nǝ̀ ɓangŋa aban ká a ban mǝnana bumi earce ka.

Nǝ̀ ɓǝlki amuna amǝɓoarsǝne.

22 <<Yisǝfu ka nggun anap mǝ’pa ɓǝle na,

mǝnana à pandǝi a kún mgbeɗe mùr ka;

abui to à eauwe amur sheran.

23 Amǝ ɓinǝmǝsǝì soa munǝo arǝì nǝ lúllô mǝkǝ̀rkǝ́rnì.

À pǝrte nǝ anta andǝ amundi malea.

24 Sǝama nta male ue ɓandang,

anggwarbui cam kàngkàng,

atàcau mala bu Mǝ’rǝcandǝa mala Yakupu,

atàcau mala Yálgír, Tali mala Isǝrayila,

25 atàcau mala Ɓakuli mala tárró,

yì Ɓakuli mǝnana bwalkiyio kàm ngga.

Ɓakuli mǝnana Kàrban Kat nǝ Gulo ka nǝ̀ tsǝko bù mala nya mbulo nǝ kuli;

nǝ̀ tsǝko bù nǝ pô mùr a tà-nzali;

nǝ̀ tsǝko bù mǝnana we wunǝ agirkusǝu mô ka

wun nǝ̀ ɓǝl nyangsang.

26 Atsǝkbu mǝnana ǝn earce Ɓakuli ɓǝ̀ pò ka amǝgulke na.

À gulo à kútì atsǝkbu mala tárrám andǝ mala kèm;

à kútì atsǝkbu mala ankono share ɓanza;

à kútì agǝna mala amgbang-ban mana à nda tàtǝ́k ka.

Yia kat ɓǝà sulǝo amuro, we Yisǝfu,

acemǝnana a nda murǝm aɓalǝ amǝ’eambo.

27 <<Benjami ka nvwa-bondo mǝ’ɓiki pak-nzal nyam-pǝra na;

nǝ dǝmbari ka nǝ̀ wal nyam-pǝra male,

nǝ pwarikpǝra ka nǝ̀ sàngi nyami.>>

28 Amǝnia kat ka à nda ka tàu lum-nong-ɓari mala amǝ Isǝrayila, sǝ amǝnia yì acau ka à nda ka cau mǝnana tárrià banggia wia mana ndarǝ tsǝkia wia bù, kǝ pè koyan ateà ka tsǝkbu mǝnana kārǝa arǝì ka.

Lú mala Yakupu andǝ tsǝkban male

29 Pǝlǝa Yakupu pè amuni amǝnia yì akwarkiru ka ama: <<Mǝ ndo mǝ nǝ wǔ mǝ nǝ o atà akêm mǝnana à akàm dǝmba à wuna ka. Wu tsǝk luem a ban mǝnana à tsǝk aɓea akêm kàm, a gumi-ɓa’tali a ɓaban mǝnana ɗiɗyal ka mala Efǝron ɓwa Hitti na ka. 30 Mǝno yì gumi-ɓa’tali a ɓaban a Makpela, tù nǝban là Mamǝre, a nzali Kan’ana ka, Ibǝrayim kúrí atārǝia andǝ ɓabanì a bu Efǝron ɓwa Hitti, ɓǝ̀ do nda ban tsǝk alú male.*49:30 Ɓalli aɓa: Tite 23:3-20. 31 A banì sǝ à tsǝk lú Ibǝrayim andǝ lú māmí Saratu; a banì sǝ à tsǝk lú Ishaku andǝ lú māmí Rabeka, sǝ a banì sǝ ǝn tsǝk lú Liya. 32 Ɓabanì andǝ gumi-ɓa’tali mana aɓalǝi ka à kúrí a bu amǝ’Hitti.>>

33 Lang Yakupu malna pa amǝnia yì akwarkiru aban amuni amuna-burana ka, nyare sarǝa akusǝi amur gyangŋan-nongŋo, lin’ueo male kasǝa, à kpapì atà akê.