Tite 48

Yakupu tsǝkî Ifǝrem andǝ Manasa bù

1 A ɓè pwari, anzǝm mǝnia ka, ɓeɓwa banggi Yisǝfu ama, <<Tárró ka rǝì eari wi ɗàng.>> Nda Yisǝfu wari a sǝn tárrí, atārǝia andǝ amuna-burana male ɓari, Manasa andǝ Ifǝrem.

2 Lang Yisǝfu yi bwalǝna ka, ɓeɓwa banggi Yakupu ama, <<Muna-ɓwabura mô Yisǝfu nya yiua sǝno ka.>> Pǝlǝa Yakupu candǝki amǝsǝi lo, do a kún gyangŋan-nongŋo male.

3 Yakupu banggi Yisǝfu ama, <<Ɓakuli mana Karban nǝ Gulo Kat ka, pusǝrǝi abanam a Luz, a nzali Kan’ana, tsǝkam bù.*48:3 Ɓalli gbal aɓa: Tite 28:13,19; 35:6,9. 4 Banggam ama, <Mǝ nǝ tsǝo, awu nǝ ɓǝl amuna pas, sǝ awu nǝ hatǝki. Mǝ nǝ tsǝk tàu mò nǝ̀ gulo nǝ̀ pǝlǝ aɓwapǝndǝa mala anzali.*48:4 Ɓalli gbal aɓa: Tite 17:4,8; 28:3-4; 35:11-12. Sǝ mǝ nǝ pè tàu mò mǝnia yi nzali Kan’ana ka, ɓǝ̀ duk malea, girkuma malea mǝnana málá male pà kàm raka.> >>

5 Pǝlǝa Yakupu lidǝmba nǝ cau ama, <<Adyan ngga, amuna-burana mô ɓari, Ifǝrem andǝ Manasa, mǝnana a ɓǝlia kani a nzali Masar ka, à dumǝna amunem. Yia ka à dumǝna kǝla Ruben andǝ Shimiyon, amuna-burana mem. 6 Sǝama amuna mana à nǝ̀ ɓǝ̀lô wia nǝnzǝ́mò ka, à dumǝna amô; à nǝ̀ kum liɓala mala nzali nǝban amǝ’eambia, kǝla Ifǝrem andǝ Manasa.

7 <<A pwarian, mana mǝ ndarǝ nyari Padan Aram ngga, nggò Rahila yi wú a nkanggariam a nzali Kan’ana. Sǝm nda peatu amur njar, sappi Efǝrat (mǝnana à tunǝi gbal ama Betalami ka) ɗàng. Nǝ bumkiɗikea, sǝ ǝn tsǝk luí a kǝ ban mǝnana wù kàm ngga, a nkanggari njargula ká Efǝrat.>>*48:7 Ɓalli gbal aɓa: Tite 35:16-19.

8 Pǝlǝa Yakupu pǝlǝ mǝsǝi sǝn amuna-burana mala Yisǝfu, sǝ ɗì ama, <<Ayana mǝnia ka?>>

9 Yisǝfu pè tárrí eare ama, <<Amuna-burana mǝnana Ɓakuli pam kani a Masar ka, à nda.>>

Tárrí banggi wi ama, <<Ida, yinǝia abanam tù ace mǝnana ɓǝ̀n tsǝkia wia bù ka.>>

10 Yakupu ka, ena, kǝ sǝnban pepè ɗàng. Nda Yisǝfu yinǝ amuna a baní tù, sǝ Yakupu mǝn abui, sǝ kùria arǝì bwalia kàngkàng. 11 Yakupu pǝlǝa aban Yisǝfu sǝ ne wi ama, <<Ən sǝlǝa nǝma mǝ nǝ sǝn ɓamǝsǝo ɗǝm ɗàng, sǝ ado ka, Ɓakuli earǝ́nàm ǝn sǝnǝna nggearǝ amunio!>>

12 Pǝlǝa Yisǝfu pusǝ amuna a nre ka ankūnǝ keâ, sǝ ɓunno a ɓadǝmbi nǝ ɓamǝsǝi a nzali.

13 Pǝlǝa Yisǝfu yinǝ amuna man nǝ mbup-ɓàriá tù aban tárrí Isǝrayila. Bwal muni mǝkyauwe Ifǝrem a buì mǝlì sǝ tsǝì atà bu mǝ’nggare mala Yakupu, sǝ muni mǝgule Manasa ka bwali a buì mǝ’nggare tsǝì atà bu mǝlì mala Isǝrayila.

14 Sǝ Yakupu ka, sárǝ́ abui a nkāɓe rǝarǝia, tsǝk buì mǝlì a ɓamur Ifǝrem, kat andǝ amani ama yì nda muna mǝkyauwe ka, sǝ buì mǝ’nggare ka tsǝì a ɓamur Manasa, kat andǝ amani ama Manasa nda muna-dǝmba ka.

15 Pǝlǝa tsǝkî Yisǝfu bù nǝ na ama,

<<Ɓǝ̀ Ɓakuli mǝnana kâ Ibǝrayim andǝ tárrám Ishaku

kpata njar male ka, tsǝkî amuna man bù.

Ɓǝ̀ Ɓakuli mǝnana yálǎm aɓa do mem kat,

bà yalung ngga,

tsǝkia wia bù.

16 Ɓǝ̀ mǝturonjar mǝnana akmúrám amsǝam a ɓabù ɓealɓikea kat ka,

tsǝki amuna mǝnia ka bù.

Ɓǝ̀ do ama yìa ka à nǝ̀ kánǝ lullǝàm,

andǝ lullǝ kèm Ibǝrayim,

andǝ lullǝ tárrám Ishaku a dǝmba.

Ɓǝ̀ Ɓakuli pea wia amuna andǝ amǝkau

ɓǝà hatǝki ɓǝà pǝlǝ aɓwabundǝa a ɓanza.>>

17 Yisǝfu ka, earce gìr mǝno tárrí pè ka ɗàng, mǝnana tsǝk buì mǝlì amur muni mǝkyauwe ka. Nda ɓariki nǝ̀ loasǝ bù-mǝlì mala tárrí amur Ifǝrem nǝ̀ kánǝí amur Manasa. 18 Banggi tárrí ama, <<Dàdá, kǝa pè anggo ɗàng. Mǝnia ka, nda muna-dǝmba. Tsǝk buo mǝlì amurí.>>

19 Tárrí ɓinǝe, pǝlǝi wi ama, <<Ən sǝlǝna, munem, ǝn súrǝ̀ gir mǝnana ǝn pakki ka. Mǝsǝcau na, Manasa ka, nǝ̀ nggá duk ɓwabundǝa mala nzali mǝgule. Sǝ ko ɓǝ̀ lang le ka, mǝkyauwe Ifǝrem ngga, nǝ̀ kútì nǝ gulo. Acemǝnana amǝkè nǝ̀ nggá duk ɓwabundǝa mala anzali.>>

20 Nda Yakupu tsǝki amuna-burana mǝno bù a pwari mǝno, kǝ na ama,

<<Amǝ Isǝrayila nǝ̀ paktúró nǝ alullǝ wun,

ɓǝ̀ à nǝ̀ tsǝki aɓwana bù ka. À nǝ̀ bang ama,

<Ɓǝ̀ Ɓakuli tsǝk wun wu dum nǝ kume mala lidǝmba, kǝla mala Ifǝrem andǝ Manasa.> >>

Anggo sǝ Yakupu tsǝk Ifǝrem amur Manasa.

21 Pǝlǝa Isǝrayila yì Yakupu ne Yisǝfu ama, <<Sǝni, málá mǝ nǝ wǔ, sǝ Ɓakuli ka nda atà wun. Yì ka nǝ̀ nyesǝ wun a nzali mala aká wun, yì nzali Kan’ana. 22 Sǝ we mǝnana a nda amur amǝ’eambo ka, mǝ nda ban po nzali mǝɓoarne mala pal nkono mǝnana a Shekem ngga.*48:22 Ɓalli gbal aɓa: Jes 24:32. Nzali mǝno ka ǝn é nǝ â arǝ amǝ’Amor a lwa nǝ nggeabyau mem andǝ nta mem.>>