Gênesis 38

Tamar ɓosǝki Yahuda

1 A ɓè bàkú ka, Yahuda nying amǝ’eambi pǝlǝa kutio o nǝ̀ nggá do atà ɓè ɓwabura ɓwa Adulam lùllǝì ama Hira. 2 A ban mǝno ka Yahuda je andǝ ɓè muna-ɓwama Kan’ana lùllǝ tárrí ama Shua. Al muna-ɓwame 3 sǝ ɓǝlî wi muna-ɓwabura. Tsǝkî munê lullǝu ama Er. 4 Nyare muna kpa a bumi sǝ ɓǝl ɓè muna-ɓwabura tsǝki wi lullǝu ama Onan. 5 Nyar ɗǝm ɓǝl ɓè muna-ɓwabura, sǝ tsǝki wi lullǝu ama Shela. Mǝnia ka a Kezip sǝ à ɓǝli.

6 Lang Er, yì muna-dǝmba mala Yahuda gulna ka, tárrí alì wi ɓwama. Lullǝ ɓwame ama Tamar. 7 Sǝ Er ka pàk gìr mǝnana mǝɓike na aban Mǝtalabangŋo ka; nda Mǝtalabangŋo wal-luí ka.

8 Anzǝm lú mala Er ka, Yahuda ne Onan ama, <<Kúti aban mā-lú mala mǝguleo. Lùmsǝ túró mô abani kǝla mǝ’eam burí, ace mǝnana mǝ’eambo ɓǝ̀ kum amuna nǝbano.>> 9 Sǝ Onan ngga earnǝ mǝno ka ɗàng acemǝnana sǝlǝna ama amunè ka à pà nǝ̀ duk amale ɗàng. Acemani ka ɓǝ̀ nda rǝ nongnǝ mā-lú mala mǝ’eambi ka nǝ̀ sukki mùr-ɓwabura a nza. Kǝ pê anggo ace mǝnana ɓwame ɓǝ̀ kǝa kum muna a bumi ɓǝ̀ ɓǝlî mǝ’eambi raka. 10 Gìr mǝno Onan pè ka, gìr mǝɓike na aban Mǝtalabangŋo; nda Mǝtalabangŋo walì wú gbal ka.

11 Yahuda pǝlǝa ne nkili Tamar ama, <<Nyar a ɓala aban tárró kya duk kàm kǝla mā-lú sheɓǝ̀ munem Shela gulna ka.>> Yahuda bang mǝno ka acemǝnana ɓangciu pàkki wi ama Shela nǝ̀ wú kǝla mǝnana amǝ’eambi wù ka. Nda Tamar o kya do a ɓala mala tárrí ka.

12 Anzǝm aɓea apǝlǝa ka mālá Yahuda, muna-ɓwama mala Shua, wú. Anzǝm mana Yahuda kumǝna girikiban ngga,*38:12 Ɓalli gbal aɓa: Tite 24:67; 37:35. lo wari a Timna, a ban mǝnana à kǝ mwaki wi nyang anzur male ka. Gyajam male Hira ɓwa Adulam wari atè.

13 Ɓè ɓwa banggi Tamar ama, <<Nkilo na a njar aban o a Timna nǝ̀ nggá bwalì aburana mana à kǝ mwaki wi nyang anzur male ka.>> 14 Tamar pǝlǝa swár anggūbyau-mā-lú male sǝ kùmsǝ nggubyau-koarǝu amurí ace ɓosǝki rǝì. Yi do a kún njarkutio a Enayim, ɓè là a njargula ká Timna. Yì ka sǝlǝna ama muna mǝkyauwe mala Yahuda, yì Shela ka gulna dumǝna ɓwabura, sǝ Yahuda pàk kǝgìr ace yinǝi ɓǝ̀ yi duk mālá Shela ɗàng.

15 Lang Yahuda nǝ̀ yia kutio sǝ sǝni ka, twali ama ɓè mā-gyatarǝu na, acemǝnana kùmsǝ ɓamǝsǝi. 16 Yahuda ka gandǝ sǝlǝa ama nkili na ɗang, pǝlǝa kàra abani a gírí njargula, sǝ ne wi ama, <<Ida, yiu mǝ kya kútí a bano.>>

Pǝlǝa ɗì ama, <<Mana awu nǝ pam ace mǝnana wu kútí a banam ngga?>>

17 Bang ama, <<Mǝ nǝ túròban nǝ muna-mbul atà ambul mala domwan mem.>>

Pǝlǝa ɗì ama, <<Sǝ ya gìr’kùrban na awu nǝ tsǝì mǝ bwali a buam bà a túrnaban nǝ muna-mbulni ka?>>

18 Yahuda bang ama, <<Ya ulang gìr’kùrban na a earce mǝ tsǝk ka?>>

Eari wi ama, <<Pam gìrparbu mò andǝ nggurrì mǝnana gyar arǝì a myalo ka, andǝ gara-gya mò mǝnana a buo ka.>> Yahuda pè wi agir man.

Pǝlǝa kútí a baní, sǝ muna kpa a bumi. 19 Tamar lo o a ɓala, kya swár lagìr koarǝu male sǝ oasǝ anggūbyau-mā-lú male ɗǝm.

20 Lang Yahuda nyarna a là ka, kya túr gyajam male Hira, ɓwa Adulam, nǝ muna-mbul ɓǝ̀ kyan nǝi ɓǝ̀ pè ɓwame sǝ ɓǝ̀ aki wi agir mǝnana pà ka. Sǝ lang Hira wari ka, kya kum ɓwame ɗàng. 21 Pǝlǝa ɗì ka aɓwana mǝnana à do a ban mǝno ka ama, <<Mā-gyatarǝu mǝnana dukiyi kani a kún njarkutio a Enayim ngga, nda ake?>>

Sǝ yia ka à eari wi ama, <<Sǝm pànǝ ɓekǝ mā-gyatarǝu kani ɗang.>>

22 Nda Hira nyare sǝ banggi Yahuda ama, <<Ən kumi ɗàng, sǝ aɓwana mǝnana à duk kano ka à bang ama, ɓekǝ mā-gyatarǝu pà kàm a banì ɗàng.>>

23 Yahuda pǝlǝa bang ama, <<Ɗeki ɓǝ̀ bwal agirnì a buì. Ɓǝ̀ sǝm lidǝmba nǝ alte ka, sǝm nǝ̀ pǝlǝ gìr’oalban aban aɓwana. Mim ngga ǝn túrnì wi ban nǝ muna-mbul, a warina sǝ a kumi ɗàng.>>

24 Anzǝm zongŋo tàrú ka aɓwana yi banggi Yahuda ama, <<Nkilo Tamar ka kutina gyatarǝì, sǝ ado ka ndanǝ muna a bumi.>>

Yahuda bang ama, <<Wu pusǝì ɓǝà pisǝì ɓǝ̀ wú!>>

25 Lang aɓwana wario à nǝ̀ pusǝì ka, Tamar túr ɓeɓwa aban nkili, nǝ cau ama, <<Ɓwabura mǝnana twàlâm muna ka nda mǝtala agir mǝnia ka. Ida, pelǝki wu sǝni ko a nǝ súrǝ̀ yana nda mǝtala gìrparbu andǝ nggurrì andǝ gara-gya mǝnia ka.>>

26 Yahuda yi súrǝ̀ agirnì sǝ na ama, <<Cau male ɓoaro kútì mem, acemǝnana ǝn pak ɓè kǝgìr ace mǝnana ɓǝ̀ yiu a ɓala aban munem Shela, ɓǝ̀ yi duk māmí kǝla mǝnana ǝn pacau ace ka ɗàng.>> Yahuda nyare nongnǝ Tamar ɗǝm ɗàng.

27 Lang zongŋo gbáshí bingŋǝna ka, amuna-pasa na mǝnana a bumi ka. 28 Lang nda rǝ gbáshí ka, mwashat atà pasa pusǝ bui a nza; mǝ’bwal-gbáshí pǝlǝa kùrî wi nkonggúr mǝbangŋe a garabui sǝ bang ama, <<Mǝnia ka nda tita puro ka.>> 29 Sǝ lang nyesǝ bui ka, mǝ’eambi yi puro. Mǝ’bwal-gbáshí pǝlǝa bang ama, <<Ani sǝ a yi sanban a puro!>> Nda tsǝki wi lullǝu ama Perez.*38:29 Perez ka ɓālǝi nda Sanban puro. 30 Nǝnzǝ́mò ka mǝ’eambi mǝnana nǝ nkonggúr mǝbangŋe a garabui ka yi puro sǝ à tsǝki wi lullǝu ama Zera.*38:30 Zera ka ɓālǝi nda bángŋá mala pwari a tita puro male nǝ dǝmbari. *38:30 Ɓalli gbal aɓa: Rut 4:12; 1Acau 2:3-4; Mat 1:3.