1 Wa Naomi oyen ochinọng wanẹ kw'ode ofonanọng kw'odim kwẹ, Ẹlimẹlẹk. Ojinọng nwo okpen Boaz, obir ode ọnọng kw'oyinẹ eche mawuriji.

2 Ewu danẹ, Rut oben Naomi bẹ́, "Tte nyin ichorọ s'abarli-mọma z'anọng k'iwonọ, óde m'nze ọnọng kw'im'ochera bẹ́, nchorọ owonọ kwẹ."

Naomi ọpọhn-ẹ bẹ́, "Nnwa kwaam, china ororo, si k'ose kw'abenẹ nya."

3 Minna kw'Rut obin oyin, otor atọhmnọng nnam-nnam, ọd-ọpara abarli-mọma p'atto za. Kẹ kozong bẹ́, z'owonọ kw'Boaz kw'ode ofonanọng kw'Ẹlimẹlẹk wọ kw'od-oter ochorọ nya.Ọraasi-kira kw'mayerẹ, barli

4 Ogbe kobhirẹ, Boaz obina z'Bẹtẹlẹhẹm okwu okebha atọhmnọng mbo nya, ozima bẹ bẹ́, "Tte Ọvaar Ibinọkpaabyi odo bọnga!" Bẹ mapọhn-ẹ bẹ́, "Tte Ọvaar Ibinọkpaabyi obir odo kọ ọdọk."

5 Boaz okwu ọbọbh okker-atọhmnọng bẹ́, "Ominanwa kw'anyi wọ kina?"

6 Okker-atọhmnọng nwo ọpọhn-ẹ bẹ́, "Kẹ ode ominanwa kw'otorọ Naomi mabina z'ẹkọma ch'Moab makwuna. 7 Ophyem-m bẹ́, nttẹ-ẹ ọbọhk otor atọhmnọng mba nnam-nnam ọd-ọpara abarli-mọma. Tọma k'ekpebha osi ọtọhm mach'osi nya, kw'ọkpanẹ ẹwọhngkwoka biribirẹ ch'iwura oyen z'ofokodo."

8 Minna kw'Boaz oben Rut bẹ́, "Nnwa kwaam, yong-m itọhng. Ninga ma maana mina, ọdọk k'owonọ kpenamkpen kayin kw'ọkpanẹ owonọ kwaam. Tor panọngva mba masi ọtọhm m'kaam k'owonọ. 9 Ibyi kpenamkpen s'bẹ masi ipha, tor bẹ masi. Kk'ajinọng mbo itọhng ntọra bẹ́, maning-ọ itama asi. Ó̱de asi adaak-ọ, zọhng gwo z'njọ s'ajinọng nkk'asi akaabha ake."

10 Nya o, Rut ọraka otwu ititika ny'izek, ozim-ẹ mawuriji, oben-ẹ bẹ́, "Kaam nde okikennọng; nsi mbọng kw'asi ọphyaamse mva anang-m?"

11 Boaz ọpọhn-ẹ bẹ, "Nkk'aam ejibha kpenamkpen ch'asi anang akka kw'odim ateka, tọma za ch'odim kwọ ope, ọttara ose kw'abin arik atte, ọmaana akka, ọttara ọmmaana-obhon kwọ, akwu aruk amaana anọng p'ẹkọma ch'ina azong. 12 Tte Ọvaar Ibinọkpaabyi ọnwọhnga ejibha ch'ikk'asa ọnang-ọ. Tte Ọvaar Ibinọkpaabyi kw'anọng p'Israẹl akpobh, kw'ikọ abir arọbh ajena, ọtaam-ọ mawuriji."

13 Rut ọpọhn-ẹ bẹ́, "Ttatta kwaam, tte nchina ororo ndaak-ọ idik. Kọ kk'aam nttem afoka, agbaak odik anang-m k'eden ọkkọkka, chibhẹ ch'ina ọtọhmnọng kwọ nde."

14 Otum k'ogbe kw'ọchattọhk, Boaz oyerẹ Rut bẹ́, okwu ochi ọttọhk, oben-ẹ bẹ́, "Tọka brẹd, bọhnga ny'atuk mbo, achi."

K'ose kw'Rut oning ẹwọr ọmaana atọhmnọng, Boaz ọtọka abarli-mọma p'nkk'abhaabha ọnang-ẹ. Rut ochi maa ọdọhbh, mabek. 15 K'ogbe kw'Rut obin bẹ́, ochina ororo ogbenga abarli-mọma, Boaz oben atọhmnọng pẹ bẹ́, "Za wura ogbeng mbyo py'ening ny'ake, m'ikẹ kàlẹkẹ. 16 Màtera rọbha aso banẹ z'akkin p'nkk'atobha, manang-ẹ bẹ́, ogbenga. Tte ọnọng oning-ẹ ọgbọbhọ o!"

17 Minna kw'Rut ogbeng abarli-mọma mbo maa, ẹsọhka etto. Abarli-mọma mbo p'odukọ mafu ọgbangbang kwiden! 18 Ọtọka abarli-mọma mbo, otima okwuna z'obhon, ọkọhka ọkka kw'odim. Obir ọnang-ẹ ọchattọhk f'ochi orik. 19 Ọkka kw'odim ọbọbh-ẹ bẹ́, "Memma kw'ayinẹ menda? K'owonọ kw'anyi kw'asi ọtọhm menda? Tte Ibinọkpaabyi odo ọnọng nwo kw'ọkọ-ọ otum."

Rut ọpọhna Naomi bẹ́, "Nsi ọtọhm z'owonọ kw'ọnọng kw'okpen Boaz." 20 Naomi oben ọnyẹ kwẹ bẹ́, "Tte Ọvaar Ibinọkpaabyi odo Boaz mawuriji! Ọvaar Ibinọkpaabyi ejibha otim ọkpọka osisi ọnang anọng p'arukọ akpen ọttara p'nkk'apa." Naomi obir oben-ẹ bẹ́, "Boaz ode ochinọng wanẹ kwamina kw'ode ọkkaan kw'echimma."

21 Rut, kw'ofon Moab, ọpọhn-ẹ bẹ́, "Kẹ Boaz oter oben-m bẹ́, nchina ororo nsi ọtọhm mmaana atọhmnọng pẹ maa, ipha sẹ isa."

22 Naomi oben Rut bẹ́, "Ojibh-ojibh bẹ́, achina ororo asi ọtọhm amaana aminava mbo ny'Boaz k'owonọ, okurọ bẹ́, óde achin k'owonọ kw'ọnọng ọdọk-ọdọk, mm'alẹk-ọ ọlẹkẹ."

23 Minna kw'Rut osi ọtọhm ọmaana aminava mbo p'Boaz maa, ipha njo s'barli ọmaana s'wit, isa. Wa Rut orukọ ọmaana ọkka kw'odim kwẹ.Ọraasi-kira kw'mayerẹ wit