1 Ny'ogbese nwo, Boaz obina ochina z'ebhumma ch'obhon, oninga ẹwọr nya. K'ogbe kw'ọkkaan kw'echimma nwo kw'Boaz okkikken opyi ẹmọng okwu nya, Boaz oben-ẹ bẹ́, "Ayi, kwuna ka, kwu ninga ẹwọr ma." Minna kw'obin od-oninga ẹwọr nya.

2 Boaz otéka adidennọng ijobh p'obhon nwo, obenẹ bẹ bẹ́, "Màninga ma." Makwu aninga nya. 3 Pira Boaz oben ọkkaan nwo kw'echimma bẹ́, "Naomi kw'okwun z'ẹkọma ch'Moab min'okpe izek s'Ẹlimẹlẹk kw'ode ọgbaanotte kwamina. 4 Kẹ wọ osi nchibhẹ bẹ́, nsọ-ọ azonga, mbir mben-ọ bẹ́, adebh sẹ m'ititika s'anọng mba p'aning ma, ọmaana m'ititika s'adidennọng p'anọng paam. Ó̱de ọ́daak-ọ bẹ́, m'abhek sẹ, tek-m. Ini kọ ọdaakẹ, tek-m, ọfha nzonga. Ọnọng kode kw'm'obhek sẹ kw'ọkpanẹ kọ. Ọnọng kw'otor-ọ k'nnam ode kaam."

Ọkkaan kw'echimma nwo ọpọhn-ẹ bẹ́, "Iye, m'mbhek-obhek e."

5 Nya o, Boaz oben bẹ, "Ny'ewu ch'im'adebh izek nja ny'Naomi k'mbọhk, m'abir atọka Rut nwa kw'ode opokwa kw'ofon Moab, ọfha eche ch'odim ọttara oyena kwẹ, ening edimẹ."

6 Nya o, ọkkaan kw'echimma nwo ọpọhn-ẹ bẹ́, "Ó̱de ode minna, kaam ọdọk mìmbhek, okurọ bẹ́, óde mbhekẹ, m'nyerẹ itama nnang oyena kwaam e. Kọ tọka eninga chaam, azeng mmo abhek. Kaam mìmbhek e."

7 Wa z'ogbe nwo, ẹmmaana ch'anọng p'Israẹl ede bẹ́, ọ́nọ́ng ọkamẹ bẹ́, obhek ọttọhk, ọnọng wanẹ m'ọwọra ọtọk-obho wanẹ kwẹ ọnang oyok. Eden ch'iwa anọng p'Israẹl mad-atima abhek, mabir abhona ekpo k'ayok k'mbọhk dọ nya.

8 Nya o, k'ose kw'ọkkaan kw'echimma nwo obenẹ Boaz bẹ́, "Kọ zeng mmo bhek," ọwọra ọtọk-obho kwẹ ọnang Boaz.

9 Boaz oben adidennọng mbo ọttara anọng mboza maphyir p'aning nya bẹ́, "M'ewu ch'menda, bọnga bọ made anttẹsẹ paam bẹ́, kk'ekpo py'Ẹlimẹlẹk maphyir mbheka z'Naomi k'mbọhk, ọttara ọttọhk kpenamkpen f'ode f'Kiliyọn ọmaana f'Malọn. 10 Kaam mbir mbhek Rut kw'ofon Moab, opokwa kw'Malọn, ntọk-ẹ mach'kwanọng kwaam, ọfha eche ch'ikẹ kw'ikk'ọpa, ọttara oyena kwẹ, ening edimẹ ny'efona chẹ, ọttara ny'obhon kwẹ. Bọnga bọ made anttẹsẹ paam m'ewu ch'menda."

11 Adidennọng mbo ọttara anọng mboza p'aning ny'ebhumma, maben-ẹ bẹ́, "Iye, mina bọ mode anttẹsẹ e. Tte Ọvaar Ibinọkpaabyi osi kwanọngnwa kw'im'odim m'ọsọhm kwọ ode mach'Rachẹl ọmaana Lea, p'magbak mbọhk masi efona ch'Israẹl ẹbar. Tte kọ akwu ade odidennọng m'Ẹphrat, abir ayena eche mawuriji m'Bẹtẹlẹhẹm. 12 Tte Ọvaar Ibinọkpaabyi otima iva p'kwanọng nwa m'ọmaan, osi efona chọ ẹbar mach'ndo ch'Pẹrẹz kw'uwa Tamar ọmaanẹ ọnang Juda."

13 Ofona nya o, Boaz ọtọka Rut k'ọbada. Matọn ayim nya o, Ọvaar Ibinọkpaabyi ọsẹ-ẹ otima ibhọr, ọmaan ojinọngnwa. 14 Panọng p'obhon nwo maben Naomi bẹ́, "Mọ̀tọhnga Ọvaar Ibinọkpaabyi kw'menda ikk'ọ ọkkaan kw'echimma ọnanga. Tte nnwa nwoma okwu ode ọnọng kw'im'oyena eche m'Israẹl maphyir. 15 Kẹ m'obhona akpen pọ, m'okker-ọ k'ogbe kw'ikk'atama. Ọnyẹ kwọ kw'adaak-ẹ, kw'obir ojibh ọtam ọyọhnga ajinọngva achenọmfa, kk'nnwa ọmaana ọnang-ọ."

16 Pira Naomi ọtọka nnwa nwo ọnana ny'ikẹ k'ntaak, ọrọk-ẹ. 17 Panọng p'arukọ nya aben bẹ́, "Naomi kk'ojinọngnwa oyena e!" Makpẹ-ẹ Ọbẹd. Ọbẹd wọ ode otte kw'Jẹsẹ. Jẹsẹ okwu ode otte kw'Devid.

18 Ofona nya, efona ch'Pẹrẹz ede bẹ́:

Pẹrẹz wọ wa obhonọ Hẹzrọn,

19 Hẹzrọn obhon Ram,

Ram obhon Aminadab,

20 Aminadab obhon Nashọn,

Nashọn obhon Salmọn,

21 Salmọn obhon Boaz,

Boaz obhon Ọbẹd,

22 Ọbẹd obhon Jẹsẹ,

pira Jẹsẹ node otte kw'Devid.