1 Wa oyen ojinọng wanẹ kw'okpen Ẹlkana, kw'ofon z'Rama, z'ẹbhaakẹ ch'Zuph, z'ẹkọma ch'Ephraim ch'eyen agbe. Ẹlkana nwo wa ode nnwa kw'Jeroham, kw'ode nnwa kw'Elihu, kw'ode nnwa kw'Tohu, kw'ode nnwa kw'Zuph, kw'ofon Ephraim. 2 Ẹlkana ọtọk panọng afa p'akpen Hana ọmaana Pẹnina. Pẹnina ọmaan-ẹ iva, Hana nnwa kọmaanẹ.

3 K'icho k'icho, Ẹlkana od-obina ny'ikẹ k'obhon ochina z'Shilo bẹ́, od-okpobha Ọvaar Ibinọkpaabyi kw'Ẹfa maphyir, obir ọfọhnọ ẹja ọnang-ẹ. Wa ny'ogbe nwo, iva afa p'Ẹli p'ade Hophni ọmaana Phinẹhas made afọhn-nja p'Ibinọkpaabyi z'Shilo.

4 Ó̱pyirẹ k'ogbe kw'Ẹlkana ọd-ọfọhnọ ẹja, ọd-ọtọka okebh f'eten ọnang kwanọng kwẹ Pẹnina, ọmaana iva pẹ k'ejinọng ọttara k'ẹpanọng. 5 Okenaka, ọd-ọnang Hana okebh f'ode igbedim ifa okurọ ch'Hana ọdaak-ẹ ọdaak, ọttara bẹ́, Ọvaar Ibinọkpaabyi kk'ẹ ọsa ọkpaana. 6 Ch'Ọvaar Ibinọkpaabyi ikk'ẹ ọsa ọkpaana, oyok-bhọbha kwẹ od-olok-ẹ, ọfha osi ettem epyibh-ẹ. 7 Odik nwo ochina ororo k'icho k'icho. Ogbe kpenamkpen kw'Hana ochin z'ọsọhm kw'Ọvaar Ibinọkpaabyi, oyok-bhọbha kwẹ m'olok-ẹ maa, osi ettem epyibh-ẹ, ọsọrọ asen, ọttọhk mòbira ochi. 8 Ẹlkana kw'ode odim kwẹ, ọd-ọbọbh-ẹ bẹ́, "Hana, ad-abhom mbọng? Osempira ọttọhk kacher achi? Osempira aninga k'oforpyibha minna? Ma, kaam kọ odik kimbarẹ nyọhnga ajinọngva ijobh yirẹ?"

9 K'ogbe wanẹ ch'maning z'Shilo, ch'nkk'ọchattọhk ọmaana igwagwa achera, Hana obina obobe. Ny'ogbese nwo, Ẹli kw'ode ọfọhn-nja oning ẹwọr k'ogbera ny'ọsọhm kw'Ọvaar Ibinọkpaabyi ọnyọma ẹmmakwukden. 10 Ettem ẹyakẹ Hana odik matẹtẹmaa, obhom ẹmọng, obir oze njọm ọnang Ọvaar Ibinọkpaabyi. 11 Ọtọka nwọhngọ, oben bẹ́, "O Ọvaar Ibinọkpaabyi kw'Ẹfa maphyir, wura m'akenaka aze irem s'kaam ọtọhmnọng kwọ, ajim-m, aning-m abir azaama, akenaka anang-m ojinọngnwa, kaam m'nttẹ-ẹ ọbọhk nnang Ọvaar Ibinọkpaabyi k'akpen pẹ maphyir, kwuna ẹgọhbha ny'ikẹ k'eso mẹ̀twu*."

12 K'ose kw'Hana ochin ororo oze njọm ọnang Ọvaar Ibinọkpaabyi, Ẹli ọkẹ-ẹ otum ny'ẹmma. 13 Wa Hana od-oze njọm z'ettem, ẹmmakpa chẹ ed-ewonga ebubha, okenaka, ẹmọng chẹ k'iyaan keyinẹ. Ẹli ọsẹ-ẹ bẹ́, kk'atuk obuma. 14 Ofona nya o, okwu oben-ẹ bẹ́, "Kọ m'abuma atuk atuma yen? Kpọ̀ka atuk ogwugwo."

15 Hana ọpọhn-ẹ bẹ́, "Atte kwaam, minna kode, kaam nde kwanọng kw'ettem ẹyakẹ odik mawuriji. Kaam atuk kid-ngwo; kaam nd-mmom ẹmọng z'ettem chaam nnang Ọvaar Ibinọkpaabyi. 16 Ototo, kaam ọtọhmnọng kwọ mach'kwanọngtama kàtọka. Nd-nze njọm minna okurọ isen ọmaana ikwosisi saam."

17 Ẹli ọpọhn-ẹ bẹ́, "Zọ̀hng k'ẹmẹm, tte Ibinọkpaabyi kw'Israẹl ọnang-ọ ọttọhk f'aphyem-ẹ."

18 Hana ọpọhn-ẹ bẹ́, "Tte kaam ọtọhmnọng kwọ, nze ọphyaam k'ititika sọ." Nya o, ofona od-ochi ọttọhk, ititika sẹ ibir ipyira.

19 Ewu esobh nya, k'ekpikpebha, mabina makpobha Ọvaar Ibinọkpaabyi, pira nnakpa nnam z'abẹ k'obhon z'Rama. Ẹlkana okwu oyima ọmaana Hana, Ọvaar Ibinọkpaabyi ọbhaanga njọm sẹ. 20 Nya o, otum k'ogbe, Hana otima ibhọr, ọmaan ojinọngnwa, ọkpẹ-ẹ Samwẹl*, oben bẹ́, "Mphyem-ẹ z'Ọvaar Ibinọkpaabyi."

21 Ch'ogbe obir obenga kw'Ẹlkana m'otima ẹsọhmmọr chẹ maphyir ọd-ọfọhnọ ẹja ch'mad-afọhnọ z'Shilọ k'icho k'icho, obir osok nwọhngọ sẹ, 22 Hana kọta. Oben odim bẹ́, "K'ogbe kw'nnwa nwoma ikk'okwura, kaam m'ntọk-ẹ nnang Ọvaar Ibinọkpaabyi, oruk ọmaan-ẹ k'akpen pẹ maphyir."

23 Ẹlkana ọpọhn-ẹ, bẹ́, "Si k'ose kw'abenẹ. Ninga ma maa, akwur-ẹ; tte Ọvaar Ibinọkpaabyi ọkkaan-ọ asi k'ose kw'ikk'anwọhnga."

Ofona nya, Hana oninga ny'ọsọhm ọgwọkọ ojinọngnwa kwẹ maa, okwurọ.

24 Ch'ikk'nnwa nwo okwura, ọtọk-ẹ ny'ẹvava ndo, obir ọtọka ọbhaamnwa kw'icho ittaan, ọttara ọgbangbang kwiden kw'agwubuma, ọmaana atuk k'ogberenwa, otim-ẹ ochina z'ọsọhm kw'Ọvaar Ibinọkpaabyi z'Shilo. 25 K'ogbe kw'nkk'ẹbhaam ndo atima afọhnọ ẹja, matọka nnwa nwo achena Ẹli. 26 Hana oben-ẹ bẹ́, "Ttatta kwaam, k'odik ọkkọkka, kaam wọ nde kwanọng nwo kw'uwa obe ma ọmaan-ọ, oze njọm ọnang Ọvaar Ibinọkpaabyi. 27 Kaam nze njọm s'nnwa nwoma, Ọvaar Ibinọkpaabyi ọnang-m f'mphyem-ẹ. 28 Ma, n'nttẹ-ẹ ọbọhk nnang Ọvaar Ibinọkpaabyi k'akpen pẹ maphyir." Nya o, maraka nso, makpobha Ọvaar Ibinọkpaabyi nya.