1 Ewu danẹ, matek Devid bẹ́, "Kirẹ e, aPhilistiya aning za arim obhon kw'Keyila ábẹ̀, mabir afu achimọma p'mad-apha."

2 Ofona nya o, Devid ọbọbh Ọvaar Ibinọkpaabyi bẹ́, "Ma, nd-nrima aPhilistiya mba ábẹ̀ yirẹ?" Ọvaar Ibinọkpaabyi ọpọhn-ẹ bẹ́, "Zọhng rima bẹ ábẹ̀, akaam obhon kw'Keyila."

3 Okenaka, ajinọng p'Devid aben-ẹ bẹ́, "M'Juda ojor mina ojora, z'Keyila azang kw'mm'okpo od-orima agbongnọng p'Philistiya ábẹ̀!"

4 Devid obir ọbọbh Ọvaar Ibinọkpaabyi. Ọvaar Ibinọkpaabyi ọpọhn-ẹ bẹ́, "Bina, zọhng z'Keyila. Kaam m'ntọka aPhilistiya mbo nkọ-ọ k'mbọhk."

5 Minna kw'Devid ọmaana ajinọng pẹ mazengẹ z'Keyila, mad-arima aPhilistiya ábẹ̀, mabira ana bẹ etirakpo pyabẹ atima akwuna. Mamuma aPhilistiya mbo ekpo mawuriji, mabira afhọ bẹ k'ọsaabh. Minna kw'Devid ọkkaan obhon kw'Keyila.

6 M'ogbe nwa, wa Abiyata kw'ode ojinọngnwa kw'Ahimẹlẹk kk'ẹphọd otima ny'ọbọhk ọrọbh okebha Devid z'Keyila.

7 Wa matek Saul bẹ́, Devid kk'ochina z'Keyila. Saul oben bẹ́, "Ibinọkpaabyi kk'ẹ ọtọka oke-m k'mbọhk okurọ bẹ́, Devid kk'ifor sẹ ozeng mmo oke mgbakkọhbhọ, okurọ ch'odimẹ k'obhon kw'oyen mmumma ọmaana abaaka."

8 Nya o, Saul oyerẹ agbongnọng pẹ maphyir bẹ́, mayin egbong z'Keyila, makọbha Devid ọttara ajinọng pẹ ake k'ettem.

9 Ch'Devid ozong bẹ́, Saul ọkam-ẹ ọkam, oben Abiyata kw'ode ọfọhn-nja bẹ́, "Tima ẹphọd kwu."

10 Devid obir oze njọm oben bẹ́, "O Ọvaar Ibinọkpaabyi kw'ode Ibinọkpaabyi kw'Israẹl, kaam ọtọhmnọng kwọ kk'mmaanga majijik bẹ́, Saul ọkamẹ bẹ́, okwu k'Keyila okwu okibhẹ obhon kibung-kibungọ okurọ kaam. 11 Ma, anọng p'Keyila m'atte-m ọbọhk anang-ẹ o? Ma, Saul m'okwu k'ose kw'mmaang o? O Ọvaar Ibinọkpaabyi, Ibinọkpaabyi kw'Israẹl, ototo, tek kaam kw'nde ọtọhmnọng kwọ."

Ọvaar Ibinọkpaabyi ọpọhn-ẹ bẹ́, "Kẹ m'okw-okwu e."

12 Devid obir ọbọbh bẹ́, "Ma, anọng p'Keyila mm'atte kaam ọttara ajinọng paam ọbọhk anang Saul o?"

Ọvaar Ibinọkpaabyi ọpọhn-ẹ bẹ́, "Mm'atte bọnga ọbọhk otte e."

13 Nya o, Devid otima ajinọng pẹ p'mm'apyirẹ ẹnọhna okwuma arọbh ijobh, obina ny'Keyila, mazenga achina k'ibyi k'ibyi. K'ogbe kw'matek Saul bẹ́, Devid kk'ọrọbha z'Keyila, Saul ọkpọka za otita.

14 Minna kw'Devid oning ny'atakpamma mbo p'ibyi s'anọng nna arukọ, z'ẹkọma ch'Ziph ch'eyen agbe. K'ewu k'ewu, Saul oror-ẹ, okenaka, Ibinọkpaabyi Devid ọbọhk kotte ọnang-ẹ.

15 Ch'iwa Devid otim oning z'Horẹsh z'ibyi s'anọng nna arukọ z'Ziph, oze bẹ́, Saul kk'ọkwa bẹ́, ọfhẹ-ẹ. 16 Jonatan kw'ode ojinọngnwa kw'Saul, ofona okebha Devid z'Horẹsh, ọd-ọkẹ-ẹ ettem bẹ́, ophe nnam k'Ibinọkpaabyi. 17 Oben-ẹ bẹ́, "Oning-ọ ojor. Saul kw'ode atte kwaam kọ ọbọhk mòtwu. Kwuna kọ m'ade ọvaarnọng kw'Israẹl, kaam nde odukwa kwọ. Ozeng k'atte kwaam Saul, ozong odik nwa ma." 18 Bẹ anọng afa machekẹ anang ayok ny'ititika s'Ọvaar Ibinọkpaabyi. Jonatan ọbhana, Devid oninga ny'Horẹsh.

19 Wa anọng p'Ziph mabina akebha Saul z'Gibea, maben-ẹ bẹ́, "Devid otubh m'atakpamma pamina m'Horẹsh, m'agbe p'Hakila kw'ode ẹwọn-ẹwọna kw'Jeshimon. 20 Ọvaarnọng, kwu k'ogbe kpenamkpen kw'ọdaak-ọ. Mina mm'ozeng mmo ọbọk-ẹ ọnang-ọ."

21 Saul ọpọhna bẹ bẹ́, "Tte Ọvaar Ibinọkpaabyi odo bọnga ch'machibhẹ ejibha amaan-m. 22 Màzọhng baana mawuriji, mabira aror k'ose kw'mm'azonga ibyi s'ọd-ọkọhng otita, ọmaana ọnọng kw'ọd-ọzẹ-ẹ nya. Matek-m bẹ́, kẹ odongọ mawuriji. 23 Màror k'ose kw'mm'azonga obyi mvo f'od-otubha, pira makpa nnam akwu atek-m ẹkkaabha bẹ́ gbẹẹng. Nya wọ kw'kaam mm'ọtọn. Ó̱de oning ny'ẹbhaakẹ ndo, kaam m'nnor-ẹ m'nkọma s'Juda maphyir, mbọk-ẹ."

24 Minna kw'machi Saul eden machina z'Ziph. Ny'ogbe nwo, wa Devid ọmaana ajinọng pẹ maning z'ibyi s'anọng nna arukọ, z'Maọn, z'ẹbhaakẹ ch'Araba, z'ẹwọn-ẹwọna kw'Jeshimon. 25 Saul ọmaana ajinọng pẹ mabina mad-aror-ẹ. K'ose kw'matek Devid odik nwo nya, obina od-oninga k'ẹtakpa z'Maọn. Saul ọbhaang nya o, od-oror-ẹ z'Maọn.

26 Wa Saul od-ozenga k'ẹbhaakẹ danẹ ch'egbe ndo, Devid ọttara ajinọng pẹ mazenga z'ẹbhaakẹ ndoza. Devid ọmaana ajinọng pẹ maduka k'ose kw'Saul ina bẹ mọ̀bọka. K'ose kw'Saul ọttara agbongnọng pẹ manyọm Devid ọmaana ajinọng pẹ bẹ́, mabọka bẹ, 27 itọhmọ janẹ ikwu tek Saul bẹ́, "Sẹr-ọsẹr kwu, kirẹ aPhilistiya aning ka arim Israẹl ábẹ̀ e."

28 Minna kw'Saul ottik Devid okwu-kwubh, ofona od-orima aPhilistiya ábẹ̀. Nya wọ osi mayerẹ ibyi nja bẹ́, Ẹtakpa ch'Ẹrọbh-anaanga. 29 Devid o, obina nya od-otubha z'atakpamma p'Ẹn-Gẹdi.