1 Wa oyen ojinọng wanẹ kw'ofon k'efona ch'Bẹnjamin kw'oyinẹ eche mawuriji. Ojinọng nwo okpen Kish, kw'ode nnwa kw'Abiyẹl, kw'ode nnwa kw'Zẹrọ, kw'ode nnwa kw'Bekorat, kw'ode nnwa kw'Aphiya kw'ofon Bẹnjamin. 2 Wa oyen ojinọngnwa ọkkọkka kw'okpen Saul kw'ina okerim oyen ny'Israẹl. Kẹ oyen ebe ọyọhnga anọng maphyir p'abe nya, tọma ny'mbubaang.

3 Nnyanya s'Kish kw'ode otte kw'Saul ikwu idimẹ, oben nnwa kwẹ Saul bẹ́, "Tima ọtọhmnọng wanẹ màzọhng ror nnyanya njo." 4 Minna kw'ozeng ny'ogbe-bhon kw'Ephraim ọmaana ny'ẹbhaakẹ ch'Shalisha, m'bẹ kaze. Machina z'ẹbhaakẹ ch'Shaalim, okenaka, nnyanya njo nya kide. Nya o, ozenga z'ẹbhaakẹ ch'Bẹnjamin, okenaka, m'jẹ kaze.

5 K'ogbe kw'mapyirẹ z'ẹbhaakẹ ch'Zuph, Saul oben ọtọhmnọng kw'oning ọmaana bẹ́, "Tte mọkpa nnam z'oter; ini minna ode, atte kwaam m'ọzaama odik kw'nnyanya njo, otera ọyọhn ettem k'amina e."

6 Ọtọhmnọng nwo ọpọhn-ẹ bẹ́, "Kirẹ e, oyen ọnọng wanẹ kw'Ibinọkpaabyi kw'orukọ m'obhon nwoma, makpobh-ẹ mawuriji. Odik kpenamkpen kw'ọgbaakẹ od-oyin mach'obenẹ. Tte mọd-ọzẹ-ẹ. Ṉ́nòsi, m'otek minna ose kw'mm'otima ochina."

7 Saul ọbọbh-ẹ bẹ́, "Ó̱de m'ọd-ọzẹ-ẹ, mm'ọnang-ẹ mbọng? Ọchattọhk ọdọk k'amina k'ẹkpa korikẹ, m'ọttọhk kobir oyena f'mm'ọnang-ẹ. Ma, m'oyen za yirẹ?"

8 Ọtọhmnọng nwo ọpọhna bẹ́, "Kaam nyen ibhaaka s'shẹkẹl ma e. M'nnang ọnọng nwo kw'Ibinọkpaabyi, ọfha otek mina eden ch'mm'ochina." 9 (Wa z'Israẹl, óde ọnọng ọkamẹ bẹ́, oror odik ọbọbh Ibinọkpaabyi, kẹ m'oben bẹ́, "Màkwu mod-oze ọnọng kw'oze iyaan," okurọ bẹ́, agbaak-ettem ch'Ibinọkpaabyi p'maamba wa mad-ayerẹ bẹ bẹ́, aze-iyaan.)

10 Saul oben ọtọhmnọng kwẹ bẹ́, "Ojibh-ojibh, kwu mofona." Minna kw'mabin ozenga machina z'obhon kw'ọnọng nwo kw'Ibinọkpaabyi oning.

11 K'ose kw'mad-avura egbe bẹ́, madim z'obhon, mattema ọmaana aminava p'akwu bẹ́, makaabha asi, mabọbh bẹ bẹ́, "Ma, oze-iyaan oning ma o?"

12 Mapọhn-ẹ bẹ́, "Iye e, oning ma e. Kk'ọ eden ọcha. Sẹr-ọsẹr, kirẹ kẹ kk'ọkwa m'amina k'obhon menda okurọ bẹ́, anọng p'obhon nwa mm'afọhnọ ẹja z'ija-byi. 13 K'ose kw'adimẹ ny'obhon, m'azẹ-ẹ pira od-ochi ọttọhk z'ija-byi. Anọng m'ọttọhk màtọma ochichi, oyebẹ kk'ọkwa, okurọ bẹ́, m'okwu odo ẹja ndo. Ó̱de ikk'ọda maphyir pira anọng p'nkk'aphya, machi. Zọhng madidaanma, m'azẹ-ẹ yina-yina ma."

14 Minna kw'machin z'obhon. K'ose kw'mad-adim odim z'obhon, nya kw'maze Samwẹl ch'od-ozenga ọnyọma bẹ, od-ochina z'ija-byi.

15 Nya ch'ewu esobh, pira Saul okwu, Ọvaar Ibinọkpaabyi kk'ọyaaka ọnang Samwẹl bẹ́, 16 "Ophyinẹ ogbese nwa, m'ntọhm ojinọng wanẹ kw'ofon obhon kw'Bẹnjamin nchen-ọ. M'abyeng-ẹ ana k'eso mach'ọnọng kw'im'ọbaabha anọng paam, Israẹl. Kẹ wọ im'ọrọbha anọng paam z'mbọhk s'aPhilistiya. Kaam kk'anọng paam otum nka, okurọ bẹ́, ẹmọng chabẹ kk'aam epyira."

17 K'ogbe kw'Samwẹl oze Saul, Ọvaar Ibinọkpaabyi oben-ẹ bẹ́, "Ọnọng kw'ntek-ọ wọ ma e. Kẹ wọ im'ọbaabha anọng paam e."

18 Minna kw'Saul ozeng okebha Samwẹl ny'ebhumma, ọbọbh-ẹ bẹ́, "Ototo, tibh-m ọsọhm kw'oze-iyaan."

19 Samwẹl ọpọhn-ẹ bẹ́, "Kaam wọ nde oze-iyaan nwo. Kọ chi-m eden china z'ibyi s'ẹja, okurọ bẹ́, bọnga mm'achi ọttọhk amaan-m menda. Ophyinẹ k'ekpebha kw'im'ntek-ọ okpenamkpen f'oning-ọ ny'ettem. 20 Ṉ́nòde nnyanya njo s'ikk'idima k'iwu ittaan ma, ọdọk ettem nya kàyọhn, nkk'jẹ aza. Ettem ch'Israẹl maphyir neyik k'ikọ ọttara efona ch'atte maphyir."

21 Saul ọpọhna bẹ́, "Kaam mfon k'efona ch'Bẹnjamin ch'ẹchamẹ ọtam ny'Israẹl, ẹnọmma chaam ebir ẹchamẹ ẹyọhnga ayok maphyir. Osempira agbaak odikse nwo anang-m?"

22 Nya o, Samwẹl otima Saul ọttara ọtọhmnọng kwẹ odim ny'ọsọhm nwo, okebha anọng mboza ẹrọbh okwuma ijobh p'nkk'aphya, osok bẹ ny'ititika sabẹ. 23 Samwẹl oben oyok kw'ọwọhnọ ọttọhk bẹ, "Chen-m eten ndo ch'iwura nnang-ọ bẹ́, akọm asok."

24 Minna kw'oyok kw'ọwọhnọ ọttọhk ọtọk otentaak nwo kibungọ ọjẹ Saul ny'ititika. Samwẹl oben-ẹ bẹ́, "Ma wọ ode ọttọhk f'masok-ọ. Chi, okurọ bẹ́, wura makọm asok kọ okurọ eninga nda, tọma z'ogbe kw'mbenẹ bẹ́, kk'anọng eninga mphya." Minna kw'Saul ochi ọttọhk ọmaana Samwẹl ny'ewu ndo.

25 K'ogbe kw'nkk'abina z'ija-byi njo makwuna k'obhon, Samwẹl oninga z'ọsọhm ẹrọng, ọgbaak odik ọmaana Saul. 26 Ch'maphyabh ny'ekpebha, Samwẹl oyerẹ Saul kw'oning z'ọsọhm ẹrọng, oben-ẹ bẹ́, "Do ifor, nd-nrik-ọ z'eden, abhana." K'ogbe kw'Saul kk'ifor ọda, kẹ ọmaana Samwẹl matọn ayin k'iyaan. 27 K'ose kw'nkk'azenga anyọma z'ẹkpọka ch'obhon nwo, Samwẹl oben Saul bẹ́, "Ben ọtọhmnọng nwo ochi mina eden ofona." Ọtọhmnọng nwo osi k'ose kw'oben-ẹ. Pira Samwẹl obenẹ Saul bẹ́, "Kọ ninga ma maan-m, ọfha nnang-ọ ẹkkaabha ch'efon z'Ibinọkpaabyi."