1 Anọng p'Ziph makebha Saul z'Gibea, maben-ẹ bẹ́, "Devid otubh kina egbe ch'Hakila ch'ekkerẹ Jeshimon."

2 Ofona nya o, Saul otima ajinọng pẹ nnọhna nchenọmfa okwuma arọbh ijobh p'otek ny'Israẹl, machina z'ibyi s'anọng nna arukọ s'Ziph bẹ́, mad-aror Devid za. 3 Saul osi ibhinga-byi sẹ z'egbe ch'Hakila ch'ening okikaan kw'eden ch'echin z'Jeshimon. Okenaka, wa Devid oninga ny'ibyi s'anọng nna arukọ. Ch'okwu oze bẹ́, Saul kk'ẹ orora opyirẹ nya, 4 ọtọhm anọng bẹ́, mad-ado abaana. Nya kw'makwu azonga bẹ́, Saul kk'opyira nya majijik.

5 Minna kw'Devid obin ozeng z'ibyi njo s'Saul obhingẹ. Oze ibyi s'Saul oyim ọmaana Abnẹr kw'ode ojinọngnwa kw'Nẹr, obir ode oso kw'agbongnọng p'Saul. Wa Saul oyim z'ẹtaanga kw'ibhinga-byi njo, agbongnọng pẹ mayima akọbh-ẹ ọkọbha.

6 Devid ọbọbh Ahimẹlẹk kw'ofon Het, ọmaana Abishayi kw'ode nnwa kw'Zeruya, kw'ode ọgbaanọkka kw'Joab bẹ́, "Anyi wọ mm'ọtọn ọta z'ibhinga-byi s'Saul?"

Abishayi oben bẹ́, "Kaam wọ mm'ọtọn ọta."

7 Ofona nya o, Devid ọmaana Abishayi mabina k'erungọ mazeng za ch'agbongnọng p'Saul mabhingẹ, maze Saul ch'oyim z'ẹtaanga ọttaabha ọda, ofu ọkọhn fẹ ny'izek ọnyọma eso chẹ. Abnẹr ọmaana agbongnọng mbo mayima akọbh-ẹ ọkọbha.

8 Abishayi oben Devid bẹ́, "Menda Ibinọkpaabyi kk'ọwawunanọng kwọ ọtọka ọkọ-ọ k'mbọhk. Tte ntima ọkọhn faam nkwum-ẹ ogbe mawanẹ mmaana z'izek. Kẹ igbedim ifa mìnkwum."

9 Okenaka, Devid oben Abishayi bẹ́, "Kẹ kàfhọ! Anyi wọ im'osi itama ọnang ọnọng kw'Ọvaar Ibinọkpaabyi ikk'ana obyenga k'eso pira oning k'epinẹ otto?" 10 Devid obira oben bẹ́, "K'ose kw'Ọvaar Ibinọkpaabyi orukọ akpen, Ọvaar Ibinọkpaabyi m'ozeng mmo ọfhẹ-ẹ, ńnòsi m'ope obo kw'ikẹ k'ifor, wanẹma m'oyin egbong ope za. 11 Tte Ọvaar Ibinọkpaabyi oning ocher bẹ́, ọbọhk kwaam otwu ọnọng kw'ikk'ẹ ana obyenga k'eso. Tọka ọkọhn ọttara esigbomma ch'ening etum-ẹ ny'eso, atima akwu mofona."

12 Minna kw'Devid ọtọk ọkọhn mvo ọttara esigbomma ch'ening ẹnyọma Saul ny'eso, matima afona. Ọnọng kw'oze bẹ kode, onọng kw'obira ozonga odik kw'od-oyin nya kode. Ọnọng kode kw'obir ọphyabha ọda. Bẹ maphyir machina ororo attaabha ọda, okurọ ch'Ọvaar Ibinọkpaabyi ikk'bẹ ọsa mattaabha amọm.

13 Nya o, Devid ojeka z'okwubha nwoza, od-obe z'ororo, k'ogbeso. Wa obhokọ kwiden oning bẹ ny'njeka. 14 Devid o, owon agbongnọng p'Saul ọmaana Abnẹr, kw'ode nnwa kw'Nẹr, oben bẹ́, "Abnẹr, kaam ẹmọng màsi o?" Abnẹr ọpọhn-ẹ bẹ́, "Kọ anyi wọ ad-awon ọvaarnọng o?"

15 Devid oben bẹ́, "Mba ade ojinọng o? Anyi wọ ode mach'ikọ m'Israẹl? Kayen kw'ina ttatta ọvaarnọng kwọ akkerẹ? Ọnọng wanẹ kk'ọkwa nya bẹ́, ọfhọ ttatta ọvaarnọng kwọ e. 16 Ọttọhk f'asi kojibhẹ. K'odik ọkkọkka, k'ose kw'Ọvaar Ibinọkpaabyi orukọ akpen, kọ ọttara ajinọng pọ mabaan k'obo, okurọ bẹ́, m'ttatta kwabọnga kw'Ọvaar Ibinọkpaabyi ikk'ana obyenga k'eso kakkerẹ. Màkkerẹ kọbha. Ọkọhn ọttara esigbomma ch'ọvaarnọng osokọ ọnyọma eso chẹ kẹ?"

17 Saul otin ẹmọng ch'Devid, oben bẹ́, "Nnwa kwaam Devid, ẹmọng chọ dọ o?" Devid ọpọhn-ẹ bẹ́, "Iye e, ọvaarnọng kwaam. Ẹmọng chaam dọ e." 18 Obir ọbọbh Saul bẹ́, "Ode yen kw'ikọ atte kwaam ad-akwubh kaam ọtọhmnọng kwọ o? Kaam nsi mbọng o? Mbira mpinẹ k'ambọng o? 19 Tte ttatta kwaam oyonga ọtọhmnọng kwẹ itọhng. Ó̱de Ọvaar Ibinọkpaabyi wọ ọsọ-ọ bẹ́, awun-m, tte ochera ọtọka ẹnanga. Okenaka, óde ofon k'ayokinọng, tte opyibh ọnang bẹ k'ititika s'Ọvaar Ibinọkpaabyi! Bẹ nkk'aam akwubha, maram-m okebh f'nyen k'Ọvaar Ibinọkpaabyi, mabira aben-m bẹ́, ‘Zọhng, ad-akpobha aka.’ 20 Kàchera bẹ́, izẹ saam ichebhẹ k'obhon kw'anọng p'nna Ọvaar Ibinọkpaabyi azong. Kọ ọvaarnọng kw'Israẹl ad-akwu aror kaam etitaana, mach'ọnọng oyinẹ ẹgbaaji ch'inọhn z'agbeso."

21 Nya o, Saul oben bẹ́, "Kaam kk'epyibha nsa. Nnwa kwaam Devid, kpa nnam. Menda kk'nza bẹ́, akpen paam abar-ọ odik. Kaam ọdọk kọ itama kpenamkpen mìnsi. K'odik ọkkọkka, kaam kk'etwurọ nsa, mbir mpinẹ ma tamatama."

22 Devid ọpọhn-ẹ bẹ́, "Kirẹ ọkọhn f'ọvaarnọng ma. Tte ogbongnọng wanẹ kwọ okwu ọtọka. 23 Ọvaar Ibinọkpaabyi ọd-ọtaam ọnọng kpenamkpen k'ose kw'ọnọng otorọ, obir ọsaka eso otuma. Menda Ọvaar Ibinọkpaabyi kk'ọ ọtọka oke-m k'mbọhk. Okenaka, kaam ọnọng kw'Ọvaar Ibinọkpaabyi ikk'ana obyenga k'eso ọbọhk mìntwu k'itama. 24 K'ose kw'akpen pọ mabar-m odik menda, tte akpen paam mabar Ọvaar Ibinọkpaabyi odik, obira ọrọbh-m k'damadama kpenamkpen."

25 Nya o, Saul oben Devid bẹ́, "Nnwa kwaam Devid, tte ojibh ọnang-ọ. Kọ m'asi iga-idik. K'odik ọkkọkka, okpenamkpen f'atwu ọbọhk m'ojibh ọnang-ọ."

Minna kw'Devid obin ofona, Saul ọkpa nnam ọbhana.