1 Wa ọvaar Nahash kw'ọbaabh ẹkọma ch'Amọn otim agbongnọng pẹ ọd-ọkọbha obhon kw'Jabẹsh-Gilead oke k'ettem. Anọng p'Jabẹsh maben Nahash bẹ́, "Si echekẹ ọmaana mina, mfha mina mm'oninga izek-izek kwọ."

2 Okenaka, Nahash ọpọhna bẹ́, "Kaam m'nsi echekẹ mmaana bọnga óde nkk'achera bẹ́, nnọbha idimbọhk-chen s'ọnọng-ọnọng, ọfha ntima nlẹkẹ Israẹl kibungọ."

3 Asonọng p'Jabesh maben-ẹ bẹ́, "Tte mina ọbọhk k'iwu ichenọmfa, ọfha m'ọtọhm azeng-eden pamina z'Israẹl maphyir. Ó̱de nna ọnọng oze kw'ọkkaan mina, mm'otte ifor samina ọbọhk ọnang-ọ."

4 K'ose kw'azeng-eden mbo makwu atek anọng ẹkkaabha ndo z'Gibea, kw'ode obhon kw'Saul, bẹ maphyir mabhom ẹmọng ẹkpa-ẹkpa. 5 Ny'ogbese nwo, Saul ọyakẹ abhaam pẹ nnam, od-okwun-okwuna z'owonọ kwẹ, ọbọbh bẹ bẹ́, "Bọng-odik wọ oyinẹ ọmaana anọng o? Bọng-ọttọhk vọ f'anọng mad-abhom?" Minna kw'mabira agbaak-ẹ odik kw'anọng p'Jabesh nkk'agbaaka.

6 Saul ọbhaang idik sabẹ nya o, Egwugwuma ch'Ibinọkpaabyi ẹsaka k'ẹfa, ẹnwẹ-ẹ k'ifor, ẹsẹ-ẹ ettem epyibh-ẹ mawuriji. 7 Minna kw'ọtọk abhaam afa ọjọhkọ ma zẹkẹzẹkẹ, ọnang azeng-eden matima awon ẹmọng akọbha Israẹl maphyir, mad-aben bẹ́, "Minna kw'im'ode ọmaana abhaam p'ọnọng kpenamkpen kw'obhumọ Saul ọmaana Samwẹl otitor." Ofona nya o, ojora f'Ibinọkpaabyi odim anọng mbo, bẹ maphyir makwu azenga ẹkaan madanẹ. 8 Ch'Saul otobh bẹ k'ibyi majanẹ z'Bẹzẹk, agbongnọng p'Israẹl ade nnọhna ẹnọhna okwuma nnọhna arọbh ichi kkamfa okwuma ijobh, ayok p'Juda made nnọhna arọbh attaan okwuma ichi.

9 Maben azeng-eden mbo p'abin z'Jabẹsh-Gilead bẹ́, "Màtek ajinọng p'Jabẹsh-Gilead bẹ́, ‘Ophyinẹ k'ogbe kw'echekira kk'ẹgaanga, bọnga mm'ayena ẹnaanga.’ " Ch'azeng-eden mbo mad-agbaak ajinọng p'Jabẹsh ẹkkaabha ndo, nttem ilebh bẹ mawuriji. 10 Maben anọng p'Ammọn bẹ́, "Ophyinẹ mm'otte ifor samina ọbọhk ọnang bọnga, masi mina k'ose kw'ọdaakẹ bọnga."

11 Ewu esobh nya, Saul okebh agbongnọng pẹ k'nkwurọ ittaan. K'ekpikpebha erungọ, madim z'ibhinga-byi s'anọng p'Ammọn, mafhọ bẹ maa, ewu ẹgaangẹ. Ayok p'arọbhọ anaanga, maraamẹ k'ibyi k'ibyi. Anọng afa kade p'abir aninga k'ibyi majanẹ.

12 Ny'ogbe nwo, anọng banẹ nabenẹ Samwẹl bẹ́, "Bọng-anọng bọ wendo mad-abọbh bẹ́, ‘Saul ọdọk mobir ọbaabh mina o?’ Màtima ajinọng mbo yin ka, mọfhọ bẹ."

13 Okenaka, Saul oben bẹ́, "Menda m'ọnọng mafhọ, okurọ bẹ́, ewu nda dọ ch'Ọvaar Ibinọkpaabyi ọkkaan Israẹl."

14 Nya o, Samwẹl oben anọng mbo bẹ́, "Màkwu mochina z'Gilgal, mọd-ọtaam ẹvaar ndo." 15 Minna kw'anọng mbo maphyir mabin, mad-asi Saul ẹvaar z'Gilgal, ny'ititika s'Ọvaar Ibinọkpaabyi. Mafọhnọ ẹja ch'nnanga s'eforgbaka nya, manang Ọvaar Ibinọkpaabyi. Saul ọmaana anọng p'Israẹl maphyir masi odidaama kwiden.