1 Wa m'ogbe nwa, aPhilistiya matobha agbongnọng pabẹ bẹ́, marima egbong. Mattonga z'Soko, z'ẹkọma ch'Juda. Mabhing z'Ẹphẹs-Damim kw'oning k'njeka kw'Soko ọmaana Azeka. 2 Saul ọmaana anọng p'Israẹl matobha ayok, mad-abhing z'ilokodo s'Ẹla. Mado ifor k'ose kw'mm'arima aPhilistiya ábẹ̀. 3 Wa aPhilistiya aning k'egbe danẹ, anọng p'Israẹl maninga k'egbe ndoza, ilokodo ininga bẹ ny'njeka.

4 Okem wanẹ kw'okpen Golayat, kw'ofon Gat, obina z'ibhinga-byi s'aPhilistiya, oyin k'iyaan. Wa ebe chẹ ẹyọhng ntọkọ osowanẹ. 5 Z'eso ọfọr igbangbangkpo, z'ifor ọfọra ogbong-nọhma kw'ode bronz, kw'adọhbhiji pẹ made nnọhna ijobh kkamfa okwuma arọbh ijobh p'shẹkẹl. 6 Z'mmo, oke ogbongttọhk f'ode bronz, z'nnam ọbhaaka ọkọhn f'ode bronz. 7 Wa ọkọhn fẹ odinẹ mach'ẹgbaka ch'anọng pad-ayok ọbara mad-atima. Adọhbhiji p'ẹkọhnma ndo, made ẹnọhna okwuma arọbh ijobh p'shẹkẹl. Otim-ogbongtegba kwẹ ọchẹ-ẹ eden.

8 Golayat okwu obe ọkwọhrọ agbongnọng p'Israẹl bẹ́, "Osempira mayin k'iyaan bẹ́, marima egbong? Kaam nde oPhilistiyanọng, bọnga made atọhmnọng p'Saul. Màrọbha ọnọng okebh-m ma. 9 Ó̱de okpo orim-m ábẹ̀, ọfhọ-m, mina mm'ode abira pabọnga; okenaka, óde kaam mfhẹ-ẹ, bọnga mm'ade abira pamina, mabira aninga izek-izek kwamina." 10 Nya o, oPhilistiyanọng nwo oben bẹ́, "Menda, nsi ọmmakkaarẹ nnanag agbongnọng p'Israẹl! Mànang-m ọnọng kw'mm'orima ayok ábẹ̀!" 11 K'ose kw'Saul ọmaana anọng p'Israẹl maphyir mabhaang idik s'oPhilistiyanọng nwo ọgbaakẹ, ojora fiden ọbọka bẹ ẹkpa-ẹkpa.

12 Wa Devid ode nnwa kw'Jẹsẹ kw'ofon Ẹphrat, z'Bẹtẹlẹhẹm, z'ẹkọma ch'Juda. Jẹsẹ oyen ajinọngva ochenọnttaan. Ny'ogbe kw'Saul ọbaabh, wa Jẹsẹ kk'ọtama mawuriji. 13 Wa ajinọngva attaan p'Jẹsẹ p'nkk'akkọhra ayọhnga ayok, kk'Saul atora mayin egbong. Wa ocheden ode Eliyab, ttong afa ode Abinadab, ttong attaan ode Shama. 14 Devid wọ uwa ode okpongannam. Ayok mbo attaan p'abarẹ ọtam, mator Saul. 15 Okenaka, wa Devid od-ochina za ch'Saul oning, obir ọkpa nnam za ch'okkerẹ arọkimaan p'otte z'Bẹtẹlẹhẹm.

16 K'iwu arọbh afa, oPhilistiyanọng nwo od-okwu obe k'ekpebha ọmaana k'ẹsọhka, osi ẹmma.

17 Nya o, Jẹsẹ oben nnwa kwẹ Devid bẹ́, "Tọka ọzangnwa nwa kw'agwu p'nkk'abhaabha, ọttara abrẹd-duk ijobh, asẹr-ọsẹr achena ivotte pọ za ch'mabhingẹ. 18 Bir tọka ayokpa mba ijobh chena oso kw'egbongkaan chabẹ. Baana ose kw'ivotte maning za, achen-m ẹkkaabha ch'im'efok-m nttem. 19 Maning za arim aPhilistiya ábẹ̀ z'ilokodo s'Ẹla, za ch'Saul ọttara agbongnọng p'Israẹl maphyir maning."

20 K'ekpikpebha, Devid obina, otte arọkimaan ọbọhk ọnang okkerẹ-arọkimaan, ọtọka ẹchakpo mbyo otima ofona k'ose kw'Jẹsẹ obenẹ. Okwu opyirẹ ny'ibhinga-byi k'ogbe kw'agbongnọng ad-akwọhrọ agbong-mọng ch'mmin'ayin egbong. 21 Wa anọng p'Israẹl ọmaana p'Philistiya mado igbongfor, mabe makkerẹ ayok ititika. 22 Devid otte ẹchakpo mbyo ọbọhk ọnang okker-egbongkpo bẹ́, okkerẹ, kẹ Devid otima ẹbhar ochina z'igbongtitika, od-ozima ivotte. 23 K'ose kw'ọd-ọgbaak odik ọmaana bẹ, Golayat kw'ode okem kw'aPhilistiya kw'ofon Gat, ọsọbhọ ẹtọkọ ochina ititika, obir ọtọma ọmmakkaarẹ osisi. Devid o, ọbhaanga. 24 K'ogbe kw'anọng p'Israẹl aze ojinọng nwo, ojora fiden osi bẹ maphyir, matọr nnam-nnam.

25 Wa m'ogbe nwa, anọng p'Israẹl mad-aben bẹ́, "Nkk'aza ose kw'ojinọng nwa od-oyin ma gong-gong ka? Od-oyin okwu osi ọmmakkaarẹ ọnang anọng p'Israẹl. Ọvaarnọng m'ọnang ọnọng kw'ọfhẹ-ẹ oyena kwiden, m'obir ọnang-ẹ ominanwa kwẹ k'ọbada. Obir ọrọbha ẹsọhmmọr ch'otte kwẹ k'ttaazi otitọka m'Israẹl."

26 Devid ọbọbh ajinọng p'abe atum-ẹ nya bẹ́, "Mbọng f'mm'asi anang ọnọng kw'im'ọfhọ oPhilistiyanọng nwa, obir ọrọbha anọng p'Israẹl m'mgbar nja? Anyi wọ ode oPhilistiyanọng nwa kw'ina ọnọm obhirẹ, kw'im'okwu osi ọmmakkaarẹ ọnang agbongnọng p'Ibinọkpaabyi kw'orukọ akpen?"

27 Bẹ mabir agbaak-ẹ k'ose kw'mad-aben, matek-ẹ bẹ́, "Ọttọhk f'mm'asi anang ọnọng kw'im'ọfhọ ojinọng nwo vọ ma."

28 K'ogbe kw'Eliyab kw'ode ọgbaanotte kwiden kw'Devid, ọbhaang-ẹ ch'ọd-ọgbaak odik ọmaana ajinọng mbo, obhem ettem ọmaan-ẹ, ọbọbh-ẹ bẹ́, "Akwu mbọng ma o? Anyi wọ kw'agbaar arọkimaan mbo p'nna osisaabh-asaabhẹ z'ẹgba o? Nzong eforga chọ, ttara ebyibyattem ch'ayen ma, akwu bẹ́, akwu aze egbong."

29 Devid oben bẹ́, "Ma, nsi mbọng o? Nning ọdọk odik mgbaakẹ o?" 30 Kẹ Devid ọbhakẹ ọd-ọbọbh ọnọng ọdọk-ọdọk odik nwo. Anọng mbo apọhn-ẹ mach'iwura makkikken atek-ẹ. 31 Odik kw'Devid ọgbaakẹ, otto anọng k'itọhng, itekẹ ibir ipyirẹ Saul. Saul ọtọhm bẹ́, mayerẹ Devid okwu.

32 Devid obenẹ Saul bẹ́, "Tte ettem ening ọnọng ẹyọhnọ okurọ oPhilistiyanọng nwa. Kaam ọtọhmnọng kwọ, m'nd-nrim-ẹ ábẹ̀."

33 Saul ọpọhn-ẹ bẹ́, "Kọ oPhilistiyanọng nwa ábẹ̀ màkpo arima e, okurọ bẹ́, kọ atim ade odikkobh. Kẹ ọtọm z'edikkobh chẹ od-orima egbong."

34 Devid obenẹ Saul bẹ́, "Kaam ọtọhmnọng kwọ nd-nkkerẹ arọkimaan p'atte kwaam. Ogbe kw'eche, obir ode ochenyang, ekwu etinẹ ọrọkimaan wanẹ ny'otu kwabẹ, 35 nd-nkwubh-ẹ, nttem-ẹ maa nnọbh-ẹ ọrọkimaan nwo z'ẹmma. Ó̱de ebe erima ẹmaan-m, mbọk-ẹ ny'iphyabha, nttem-ẹ mfhọ. 36 Ọtọhmnọng kwọ kk'eche ọttara ochenyang ọfha. OPhilistiyanọng nwa kw'ina ọnọm obhirẹ m'ode mach'eten danẹ nya, okurọ ch'ikk'agbongnọng p'Ibinọkpaabyi kw'orukọ akpen oluka. 37 Ọvaar Ibinọkpaabyi kw'ọrọbh-m k'mbọhk s'eche, ọttara s'ochenyang, m'ọrọbh-m k'mbọhk s'oPhilistiyanọng nwa."

Saul oben Devid bẹ́, "Zọhng, tte Ọvaar Ibinọkpaabyi oninga ọmaan-ọ."

38 Nya o, Saul ọtọka ọnọhma-baba kwẹ ọfọra Devid. Obir ọtọka ogbong-nọhma kwẹ, ọttara igbangbangkpo s'bronz ọfọr-ẹ. 39 Devid ọdabh ọkkangkkang ny'ọnọhma-baba nwo, okonga ozenga ọkọbha, okurọ bẹ́, kẹ ekpose mbyo otim ọd-ọfọra. Oben Saul bẹ́, "Kaam ekpo mbya mìmkpo ntima nzenga, okurọ bẹ́, ntima nd-mfọra." Ofona nya o, ọwọra pyẹ.

40 Nya o, ọtọka ochikwura kwẹ otima z'ọbọhk, odunga ata achen p'asọhmọ ifor z'ekeka, oyika z'ẹkpa chẹ, obir otima ọbanttẹttẹ kwẹ ozenga ọnyọma oPhilistiyanọng nwo.

41 OPhilistiyanọng nwo ozenga ọnyọma Devid, otim-ogbongtegba kwẹ ọchẹ-ẹ eden. 42 Okkerẹ Devid, oze bẹ́, otim ode odikkobh kw'ojibh ifor, obir ojibh ojinọng. OPhilistiyanọng nwo o, otera osung-ẹ osungọ. 43 Oben Devid bẹ́, "Ma, nde ẹffa o, kw'atim nchi akwu bẹ́, arim-m ábẹ̀?" Minna kw'otim eche ch'aka pẹ osi Devid ẹmma. 44 Oben bẹ́, "Kwu ma, ntọka oforbukọ kwọ nnang ọnọhn f'iwokọ, ọttara nten s'ẹgba!"

45 Devid oben oPhilistiyanọng nwo bẹ́, "Kọ atim ọkkangkkang ọmaana ọkọhn akwu bẹ́, arim-m ábẹ̀, okenaka, kaam nkwu bẹ́, nrim-ọ ábẹ̀ k'eche ch'Ọvaar Ibinọkpaabyi kw'Ẹfa maphyir, kw'ode Ibinọkpaabyi kw'agbongnọng p'Israẹl, kw'alukọ. 46 Menda nwa, Ọvaar Ibinọkpaabyi m'ọtọk-ọ oke-m k'mbọhk. Kaam m'mfhọ-ọ, mpọ-ọ eso, ntọka aforbukọ p'agbongnọng p'Philistiya nnang ọnọhn f'iwokọ, ọttara nten s'ẹgba. Ayagbin maphyir mazonga bẹ́, Ibinọkpaabyi oning z'Israẹl. 47 Anọng maphyir p'attong ma m'azonga bẹ́, ọkkangkkang ọmaana ọkọhn azang f'Ọvaar Ibinọkpaabyi od-otima ọkkaana anọng. Ọvaar Ibinọkpaabyi wọ oyen egbong. M'ọtọka bọnga maphyir, oke mina k'mbọhk."

48 K'ose kw'oPhilistiyanọng nwo ozeng ọnyọma bẹ́, orim-ẹ ábẹ̀, Devid otima ẹbhar ochina z'igbongtitika bẹ́, okebh-ẹ za. 49 Ọnọhma ọbọhk ny'ikẹ k'ẹkpa, ọrọbha ẹta, oke z'ọbaanttẹttẹ kwẹ, ọtta oPhilistiyanọng nwo ny'ititikattem. Ẹta ndo ẹnwẹ-ẹ ny'ititikattem, otto okwubha ititika ny'izek.

50 Minna kw'Devid otim ọbaanttẹttẹ ọmaana ẹta dẹ-dẹ okema oPhilistiyanọng nwo, ọfhẹ-ẹ, chibhẹ ch'ina ọkkangkkang otim.

51 Devid otima ẹbhar od-obe ọnyọm-ẹ ny'ifor. Ọrọbha ọkkangkkang kw'oPhilistiyanọng nwo z'ọpa, otima ọfhẹ-ẹ, ọpẹ-ẹ eso.

Ch'aPhilistiya maze bẹ́, okkikkaama kwabẹ kk'ọpa, mabhakẹ nnam, marọbh.

52 Nya o, agbongnọng p'Israẹl ọmaana p'Juda matima ọmọngkwọhrọ akwubh anọng p'Philistiya maa, mapyirẹ z'Gat ọmaana z'mmumma s'Ẹkrọn. Aforbukọ p'anọng p'Philistiya, ọmaana ayok p'mamum ekpo, mayima bẹ́ bangẹ-bangẹ, z'eden ch'Sharayim ch'echin z'Gat ọmaana Ẹkrọn. 53 K'ogbe kw'anọng p'Israẹl makpa nnam za ch'makwubhọ aPhilistiya, madim z'ibhinga-byi s'aPhilistiya, macha ekpo pyabẹ.

54 Devid otima eso ch'oPhilistiyanọng nwo ozeng z'Jẹrusalẹm, obir ọtọka egbongkpo py'oPhilistiyanọng nwo osok z'ikẹ oyenẹ k'ikkira.

55 K'ose kw'Saul oze Devid ch'od-ofona bẹ́, okebha oPhilistiyanọng nwo, ọbọbh Abnẹr kw'ode oso kw'agbongnọng bẹ́, "Abnẹr, anyi wọ obhonọ odikkobh nwo?"

Abnẹr ọpọhna bẹ́, "O ọvaarnọng, k'ose kw'arukọ akpen achina ororo, kaam otte kinzong."

56 Ọvaarnọng oben bẹ́, "Zọhng ror ọnọng kw'obhonọ odikkobh nwa."

57 K'ose kw'Devid ofon za ch'ọfhọ oPhilistiyanọng nwo, Abnẹr otim-ẹ okebha Saul ny'ogbe kw'Devid otim-otim eso ch'oPhilistiyanọng nwo ny'ọbọhk.

58 Saul ọbọbh-ẹ bẹ́, "Odikkobh, anyi wọ ode atte kwọ?"

Devid ọpọhn-ẹ bẹ́, "Kaam nde nnwa kw'ọtọhmnọng kwọ Jẹsẹ, kw'ofon Bẹtẹlẹhẹm."