1 Wa aPhilistiya atobh agbongnọng pabẹ maphyir z'Aphẹk, anọng p'Israẹl mabir abhing anyọma ekeka ch'ening z'Jẹzrẹl.

2 Ch'iwa avaar p'Philistiya mabin ozenga ọmaana agbongnọng pabẹ k'nkwurọ s'anọng arọbh achen, ọmaana k'nkwurọ s'anọng nnọhna k'nnọhna, wa Devid ọmaana agbongnọng pẹ mabir azenga ọmaana Akish z'nnam-nnam. 3 Avaar p'Philistiya aze bẹ nya o, mabọbh bẹ́, "AHiburu mba ad-asi mbọng ma?"

Akish ọpọhna bẹ́, "Devid kw'uwa ode ọtọhmnọng kw'Saul kw'ọbaabh Israẹl azang ma o? Kẹ kk'oninga ọmaan-m k'icho kibungọ ọmaan-ọmaana. Tọma za ch'otte Saul ọbọhk oninga ọmaan-m, kẹ epinẹ ntim nza."

4 Okenaka, avaar p'agbongnọng p'Philistiya mabhem ettem amaana Akish, maben-ẹ bẹ́, "Ben ojinọng nwa ọkpa nnam z'obhon kw'aben-ẹ bẹ́, oninga. Tte oning mina otorọ moyin egbong, ọfha oning achibhẹ obhon orima mina ábẹ̀. Ó̱de ororọ bẹ́, ojibh s'otte k'ititika, m'otima nso s'agbongnọng pamina ọgba ọmaana otte. 5 Devid nwa azang kw'uwa mad-akkọhn, mabir atubh k'mbin sabẹ bẹ́,

‘Saul kk'anọng ọfha k'nnọhna k'nnọhna,

Devid ọfhọ anọng k'nnọhna s'ina obhika ide o’?"

6 Nya o, Akish oyerẹ Devid oben-ẹ bẹ́, "K'ose kw'Ọvaar Ibinọkpaabyi orukọ akpen, kk'nza bẹ́, osisi kwọ ode mawuriji. M'ọdaak-m bẹ́, aninga amaan-m mach'ogbongnọng kwaam. Tọma ny'ewu ch'akwu akebh-m, maa pyirẹ ma, kọ epinẹ kpenamkpen kinze. Okenaka, avaar p'agbongnọng kacher bẹ́, ator mina. 7 Kpa nnam k'ọdaam. Ọttọhk kàsi f'im'ọdọkọ avaarnọng p'Philistiya."

8 Devid ọbọbh Akish bẹ́, "Tọma ny'ewu ch'nde ọtọhmnọng kwọ maa pyirẹ menda, bọng-epinẹ dọ ch'nsi? Kayen kw'ina egbong mìnrima mmaana awawunanọng p'ikọ ttatta kw'ade ọvaarnọng kwaam o?"

9 Akish ọpọhn-ẹ bẹ́, "Kaam nzong mawuriji bẹ́, kọ ade mach'ozeng-eden kw'Ibinọkpaabyi kw'ina epinẹ oyen. Okenaka, avaar p'agbongnọng p'Philistiya kk'abena bẹ́, ‘Kẹ kọbaan bẹ́, otor mina moyin egbong.’ 10 Ofona nya, ophyinẹ k'ekpikpebha, tima atọhmọ p'atte kwọ p'atim akwu ma, bhana k'owusobha."

11 Nya o, Devid ọmaana ajinọng pẹ mabina k'ekpikpebha, makpa nnam z'Philistiya. Anọng p'Philistiya mabir achina z'Jẹzrẹl.