1 Wa Devid ochibhẹ bẹ́, "Ewu danẹ Saul m'ọfhọ-m ọfhọ. Ọbaan bẹ́, nnọbh nchina z'ẹkọma ch'aPhilistiya. Nya kw'Saul m'ottik-m oriror k'ibyi kpenamkpen m'Israẹl, mbir nnaanga k'mbọhk sẹ."

2 Nya o, Devid otima agbongnọng pẹ ẹnọhna okwuma arọbh ijobh, mabina mad-akebha Akish, nnwa kw'Maok, kw'ode ọvaarnọng kw'Gat. 3 Devid ọmaana agbongnọng pẹ mator Akish maruk z'Gat. Ojinọng kpenamkpen kwẹ oruk nya ọmaana ẹsọhmmọr chẹ. Wa kẹ Devid orukọ nya ttara panọng pẹ afa, p'ade Ahinoam kw'ofon Jẹzrẹl, ọmaana Abigẹl kw'ode opokwa kw'Nabal, kw'ofon Kaamẹl. 4 K'ogbe kw'matek Saul bẹ́, Devid kk'ọrọbha ochina z'Gat, ottik-ẹ oriror.

5 Nya o, Devid oben Akish bẹ́, "Ó̱de ikk'ọphyaam nza k'ititika sọ, nang-m ibyi k'obhon wanẹ m'ẹkọma chọ nruk. Kayen kw'ọtọhmnọng kwọ im'oruk k'ọvaarbhon ọmaan-ọ?"

6 Ofona nya o, ny'ewu ndo Akish ọtọka obhon kw'Ziklag ọnang Devid. Tọma ny'ewu ndo, Ziklag nokwu ode obhon kw'avaar p'Juda maa, pyirẹ menda.

7 Wa Devid orukọ ny'ẹkọma ch'Philistiya k'icho mawanẹ ọmaana aphe anna.

8 Wa ny'ogbe nwo, Devid ọmaana agbongnọng pẹ mad-arima anọng p'Geshur ábẹ̀, ọmaana p'Girz, ọttara p'Amalẹk. (Anọng mba kk'atọma k'ẹtama maruk m'izek nja s'itọm m'Shur maa pyirẹ z'Ijip.)

9 Ogbe kpenamkpen kw'Devid orim ẹkọma ábẹ̀, ọnọng mawanẹ-wanẹ kod-otte oruk akpen, ode ojinọng, wanẹma kwanọng. Okenaka, ọd-ọtọka arọkimaan, ọmaana adamogbodo, ọmaana nnyanya, ọmaana akamẹl, ọttara ọbara, pira ọkpa nnam z'Akish.

10 Ogbe kw'Akish ọbọbh-ẹ bẹ́, "Bọng-anọng p'arim ábẹ̀ menda?" Devid ọd-ọpọhn-ẹ bẹ́, "Nnim mmaana anọng p'Nẹgẹv p'ẹkọma ch'Juda," wanẹma "Nnim mmaana anọng p'Nẹgẹv p'ẹkọma ch'Jẹramẹl," wanẹma "Anọng p'Nẹgẹv p'ẹkọma ch'Ken." 11 Minna kw'Devid ọd-ọfhọ ọnọng kpenamkpen k'ejinọng ọttara k'ẹpanọng, ọfha ọnọng oning orikẹ kw'im'ọta z'Gat ọd-ọyaakẹ osisi kw'ikẹ ọmaana agbongnọng pẹ bẹ́, "Ọttọhk f'iwa Devid osi vọ ma." Tọma za ch'orukọ ny'ẹkọma ch'aPhilistiya, minna kw'ẹmmaana ch'Devid ede.

12 Akish okwu oyena ichichera k'Devid, ochibhẹ bẹ́, "Devid kk'anọng pẹ p'Israẹl idik ọgbẹra. Kẹ min'ode ọtọhmnọng kwaam ttattampe."