1 Samwẹl 31

Obo kw’Saul ọmaana iva pẹ

1 M’ogbe nwa, aPhilistiya arima egbong amaana anọng p’Israẹl. Anọng p’Israẹl marọbh, asaabhada mape ny’egbe ch’Gilboa. 2 Wa aPhilistiya ayak ọbọhk akwubh Saul ọmaana iva pẹ, mafhọ iva mbo p’Saul p’ade Jonatan, ọmaana Abinadab, ọttara Malki-Shua. 3 Wa erima ndo ekwu ẹgaangẹ ẹmaana Saul. Agbongnọng mbo makọbh-ẹ, matima ayuk attẹ-ẹ, mamum-ẹ ekpo mawuriji.

4 Nya o, Saul oben otim-egbongkpo kwẹ bẹ́, "Rọbha ọkkangkkang kwọ z’ọpa atima kwum-m. Ina minna asi, anọng mba p’nna inọm abhirẹ m’akebh-m ma akwum-m, m’abira asi-m idingidingidik."

Okenaka, ojora fiden osi otim-egbongkpo kwẹ, kocher bẹ́, ọfhẹ-ẹ. Ofona nya o, Saul ọtọka ọkkangkkang kwẹ, ozeng mmo ọfhẹ-ẹ ifor. 5 Ch’otim-egbongkpo nwo oze bẹ́, Saul kk’ọpa, kẹ ọdọk, obir ọtọka ọkkangkkang kwẹ ọfhọ ifor sẹ. 6 Nya o, Saul ọmaana ajinọngva pẹ attaan, ọmaana otim-egbongkpo kwẹ, ọttara agbongnọng pẹ maphyir, mape ewu ndo madanẹ.

7 Ch’anọng p’Israẹl p’arukọ z’ilokodo, ọmaana ayok p’arukọ z’okwubha kw’Jọrdan maze bẹ́, agbongnọng p’Israẹl kk’arọbha, ọmaana bẹ́, Saul ọttara ajinọngva pẹ kk’apa, bẹ ọdọk mabira arọbh arik ibhon sabẹ. Anọng p’Philistiya makwu aruk ny’ibhon njo.

8 Ewu esobh nya, ch’aPhilistiya makwu afọhngọ affuranọng mbo, maze Saul ọmaana ajinọngva pẹ attaan ch’mayim ny’egbe ch’Gilboa. 9 Makpaar-ẹ eso, mabira awọr-ẹ egbongkpo pyẹ. Matọhm azeng-eden akọma nkọma s’aPhilistiya maphyir bẹ́, matek ẹkkaabha ndo z’aka-pa pabẹ, ọttara z’anọng pabẹ. 10 Masok egbongkpo pyẹ k’ọka-pa kw’Ashtọrẹt, mabir atọka oforbukọ kwẹ adabh k’etumọ ch’Bẹt-Shan.

11 Ch’anọng p’Jabẹsh-Gilead mabhaang ọttọhk f’aPhilistiya asi Saul, 12 akkikkaama pabẹ maphyir, matima erungọ achina z’Bẹt-Shan. Mapyirẹ za o, machaarẹ oforbukọ kw’Saul ọmaana aforbukọ p’iva pẹ z’etumọ ch’Bẹt-Shan. Matọka bẹ ad-akwọmọ z’Jabẹsh. 13 Pira nnatọk akọbhọ pabẹ ad-anọhnga z’echirin ch’tamarisk z’Jabẹsh. Mabir atim ọchattọhk k’iwu ichenọmfa.