1 Nya o, Samwẹl ọtọka idima s'ana, obyenga Saul ana ny'eso, pira ọbaak-ẹ, oben bẹ́, "Ọvaar Ibinọkpaabyi kk'ọ ana obyenga k'eso bẹ́, abaabha anọng p'Israẹl, p'ade anọng pẹ oyenẹ. 2 Ó̱de abin arik-m menda, m'attema ọmaana anọng afa za ch'ọnyọm epekwuk ch'Rachẹl z'Zẹlza ny'enem ch'Bẹnjamin. Mm'aben-ọ bẹ́, nkk'nnyanya njo s'afon ad-aror aza. Atte ọdọk odik kwabẹ kobenẹ. Noter ọyọhn ettem k'ikọ e. Ọbọbhọ ka bẹ́, ‘M'nsi yen k'nnwa kwaam o?’ "

3 "Nya o, m'abina nya, afona maa, apyirẹ z'echi chiden ch'Tabọr. Anọng attaan p'ad-achina z'Bẹtẹl bẹ́, mad-akpobha Ibinọkpaabyi mm'akebh-ọ nya. Ọnọng wanẹ m'ọtọhka avuva attaan, wanẹ m'ọtọhka abrẹd-duk attaan, nwoza ọtọhka ituk-zọhka. 4 Mm'azim-ọ, mm'anang-ọ abrẹd-duk afa, p'm'atọka z'abẹ k'mbọhk.

5 "Ó̱de nwo nya ọsa nya, kọ m'achina z'Gibea kw'Ibinọkpaabyi, za ch'aPhilistiya mad-aninga. K'ose kw'adimẹ ny'obhon, m'attema ọmaana ẹkaan ch'agbaak-ettem ch'Ibinọkpaabyi ch'mad-akwuna z'ija-byi ọmaana anọng p'atim okira kw'agim-ogim, ọmaana mbin, ọmaana nsa s'mad-aje, ọmaana agaang p'mad-akir matima achi bẹ eden, ch'nd-agbaak nkkaabha. 6 Egwugwuma ch'Ibinọkpaabyi m'ẹsaka k'ẹfa ẹnwọ-ọ z'ifor, kọ abir ator bẹ magbaak ettem ch'Ibinọkpaabyi. Minna kw'im'abhakẹ azeng ọnọngkira ọdọk-ọdọk. 7 K'ogbe kw'nkọhka nja iyinẹ mbengana, si ọttọhk kpenamkpen f'atim k'ọbọhk ny'ogbe nwo, kirẹ Ibinọkpaabyi noning ọmaan-ọ.

8 "Kọ m'achi-m eden achina z'Gilgal. Kaam m'nkwu nkebh-ọ nya, mfọhnọ nja s'ẹkwọmọ ọttara s'eforgbaka. Kọ m'aninga atik-m k'iwu ichenọmfa pira nkwu ntibh-ọ ọttọhk f'im'asi."

9 Nya ch'Saul obin bẹ́, ofona orik Samwẹl, Ibinọkpaabyi obhona ettem ch'Saul. Nkọhka njo maphyir iyin mbengana ny'ewu ndo. 10 Ch'makwu apyirẹ ny'Gibea, ẹkaan ndo ch'agbaak-ettem ch'Ibinọkpaabyi ettema ẹmaan-ẹ, egwugwuma ch'Ibinọkpaabyi ẹsaka k'ẹfa ẹnwa Saul k'ifor, otor bẹ magbaak ettem ch'Ibinọkpaabyi. 11 K'ogbe kw'anọng mbo maphyir p'uwa nkk'ẹ azonga maze ch'ọd-ọgbaak ettem ch'Ibinọkpaabyi ọmaana ayok, mabọbh ayok bẹ́, "Bọng-odik wọ oyinẹ ọmaana nnwa kw'Kish o? Saul kẹ obir ọttara k'ẹkaan ch'agbaak-ettem ch'Ibinọkpaabyi o?"

12 Ojinọng wanẹ kw'orukọ nya ọpọhna bẹ́, "Anyi wọ obir ode otte kwabẹ?" Tọma nya, nokwu ode ẹzẹmẹ ch'anọng ad-agbaak bẹ́, "Saul kẹ obira ọttara k'ẹkaan ch'agbaak-ettem ch'Ibinọkpaabyi o?" 13 Ch'Saul kk'ettem ch'Ibinọkpaabyi ọgbaaka maphyir, obina ochina z'ija-byi.

14 Ny'ogbe nwo, ọgbaanotte kw'otte kw'Saul ọbọbh Saul ọmaana ọtọhmnọng kwẹ bẹ́, "Tọma k'ogbe, maning men o?"

Saul ọpọhna bẹ́, "Mod-oror nnyanya njo e. Ch'nna bẹ oze, mochina z'Samwẹl."

15 Ọgbaanotte kw'otte kw'Saul oben-ẹ bẹ́, "Tek-m odik kw'Samwẹl otek-ọ."

16 Saul ọpọhn-ẹ bẹ́, "Ọgbaakẹ mina bẹ́, nkk'nnyanya njo aza k'odik ọkkọkka." Saul ọgbaanotte kw'otte odik kw'Samwẹl ọgbaak-ẹ kw'ọmaan ẹvaar, kotekẹ.

17 Samwẹl owon anọng p'Israẹl kibungọ bẹ́, makwu attonga z'Ọvaar Ibinọkpaabyi k'ititika z'Mizpa. 18 Oben bẹ bẹ́, "Ma wọ ode odik kw'Ọvaar Ibinọkpaabyi kw'Israẹl ọgbaakẹ: ‘Wa kaam nnọbh anọng p'Israẹl z'mbọhk s'anọng p'Ijip ntima nyin k'iyaan, nsi bọnga manaanga k'mbọhk s'anọng p'Ijip ọmaana s'ibhon njoza maphyir s'inang bọnga irem.’ 19 Madidanma, bọnga nkk'Ibinọkpaabyi abhuma, kẹ kw'ọkkaan bọnga, obir ọrọbha bọnga k'itama kpenamkpen ọttara irem. Bọnga nnabenẹ bẹ́, ‘Nang mina ọvaarnọng kw'm'ọbaabha mina.’ Ofona nya, màyin kwu be Ọvaar Ibinọkpaabyi m'ititika k'ose kw'inọmma ọttara mfona sabọnga ide."

20 K'ogbe kw'Samwẹl otim mfonamma s'Israẹl maphyir oyin ka, wa mabharẹ ọsẹ, otto k'ẹnọmma ch'Bẹnjamin. 21 Okwu oyerẹ ẹnọmma ch'Bẹnjamin k'ẹsọhmmọr k'ẹsọhmmọr. Ọsẹ otto k'ẹsọhmmọr ch'Matri. K'okpongannamgbe, ọsẹ otto k'Saul kw'ode nnwa kw'Kish. Okenaka, maror-ẹ, m'ikẹ kaze. 22 Minna kw'machin ororo abọbh Ọvaar Ibinọkpaabyi bẹ́, "Ma, ojinọng nwa kk'opyira ma yirẹ?"

Ọvaar Ibinọkpaabyi ọpọhna bẹ́, "Iye, kẹ kk'otubha ny'ibyi s'masokọ ekpo pyabọnga e."

23 Matima ẹbhar mad-atọk-ẹ atima ayin ka. K'ose kw'obe nya ọmaana ayok, wa ọtọm ny'mbubaang ọyọhnga anọng maphyir ebe. 24 Samwẹl oben anọng mbo maphyir bẹ́, "Nkk'ọnọng kw'Ọvaar Ibinọkpaabyi ikk'otéka aza? Ma anọng mba maphyir, ọnọng kw'ode mach'ikẹ kode."

Minna kw'anọng mbo akwọhrọ k'ẹrọng bẹ́, "Tte ọvaarnọng oruk akpen p'adum-odum."

25 Samwẹl osi ẹyaakẹ ch'ẹmaan asana p'abaabh ẹvaar ndo ọnang bẹ. Ọkkẹr k'nnwẹr ọtọka osok nya ch'Ibinọkpaabyi oning. Pira noffurọ anọng mbo, ọnọng-ọnọng ọbhana z'ikẹ k'ọsọhm.

26 Saul obir ọbhana z'ikẹ k'ọsọhm z'Gibea. Áfànọng mbo p'Ibinọkpaabyi ikk'nttem sabẹ ọtwa, mator-ẹ mafona. 27 Okenaka, akọhrnọng banẹ mad-aben bẹ́, "Yen kw'ọnọng nwoma m'ozenga ọkkaana mina?" M'ikẹ mach'ọttọhk katọk, m'ikẹ nnanga kàbira anang. Okenaka, Saul omyi nya bẹ́ takam.