1 K'ogbe kw'Ẹkkọhbhọ ch'Echekẹ ch'Ibinọkpaabyi ikk'eninga z'ẹbhaakẹ ch'Philistiya k'aphe achenọmfa, 2 anọng p'Philistiya mayerẹ afọhn-nja pabẹ ọttara abọhnganọng, maben bẹ bẹ́, "Bọng-ọttọhk f'mm'osi ọmaana Ẹkkọhbhọ ch'Echekẹ ch'Ọvaar Ibinọkpaabyi? Màtek mina ose kw'mm'ozenga od-orik Ẹkkọhbhọ ndo z'ibyi sẹ."

3 Mapọhna bẹ́, "Ó̱de mad-arik Ẹkkọhbhọ ch'Echekẹ ch'Ọvaar Ibinọkpaabyi kw'Israẹl, m'mbọhk-mbọhk kàrik o. K'eden kpenamkpen, màrik chẹ ttara ẹnanga ch'matim atuk epyibha ch'masi. Nya wọ kw'mm'abina k'ikọhmaana sabọnga, mabir azonga ọttọhk f'Ibinọkpaabyi ozeng ábẹ̀ ọd-ọnang bọnga irem."

4 Anọng p'Philistiya abọbh bẹ́, "Bọng-ẹnanga ch'epinẹ ch'mm'ọtọhm ochin-ẹ yirẹ?"

Mapọhna bẹ́, "Akerim p'ebirakpo achen p'matim gol asi, ọmaana akerim p'agbomma achen p'matim gol asi, etor k'obhik f'asonọng p'Philistiya, okurọ bẹ́, itama njo iyinẹ bọnga ọmaana asonọng pabọnga. 5 Màsi akerim p'ebirakpo ọmaana p'agbomma mbo p'mad-asi itama ny'ebhondim, màbira anang Ibinọkpaabyi kw'Israẹl ikpukpobha. Ṉ́nòsi, m'ọkpọka itama njo ny'abọnga k'ifor, ny'aka pabọnga, ọttara ny'izek sabọnga. 6 Osempira magaangẹ nttem sabọnga mach'Phero ọmaana anọng pẹ p'Ijip masi? K'ogbe kw'uwa Ibinọkpaabyi ọnang bẹ irem, wa matte anọng p'Israẹl ọbọhk mafona.

7 "Madidanma, mm'asi ọkpaar kw'ogbin ọbhakwẹ, m'abira atima abhaam afa p'nkk'amaana, p'nna bẹ atima agbana. Màgbana abhaam mbo ny'ọkpaar nwo, màtọka iva pabẹ ayika z'ọsọhm kwabẹ. 8 Màtọka Ẹkkọhbhọ ndo ch'Echekẹ nana ny'ọkpaar nwo kw'ogbin, pira nnatọk ekpo mbyo py'matim gol asi, py'mm'achen-ẹ mach'ẹnanga ch'epinẹ, mayika k'ikwukwu k'ẹbhaakẹ danẹ ch'ọkpaar nwo. Màtọhm ẹkkọhbhọ ndo efona, 9 màninga nya kkerẹ. Ó̱de echin ẹrọng-ẹrọng z'izek sẹ, z'ẹbhaakẹ ch'Bẹt-Shẹmẹsh, oyinẹ bẹ́, Ọvaar Ibinọkpaabyi wọ ọtọhmọ itama nja ochena mina. Okenaka, óde ini nya echin, mm'ozonga bẹ́, kẹ azang ọtọhmọ itama nja ochena mina, iyinẹ k'ikẹ k'ifor."

10 Nya o, masi k'ose kw'matọhnọ bẹ. Matọka abhaam mbo afa p'atim anang iva ẹba, agbana ny'ọkpaar nwo, matọka abhaamva mbo mad-ayika z'ọpa kwabẹ. 11 Manana Ẹkkọhbhọ ch'Echekẹ ch'Ọvaar Ibinọkpaabyi ny'ọkpaar nwo, ọttara ikwukwu s'itọhk agbomma ọmaana ebirakpo py'matim gol asi. 12 Nya o, abhaam mbo atta bẹ́ gbẹẹng machina z'ẹbhaakẹ ch'Bẹt-Shẹmẹsh, mad-abok amọng k'ose kw'mazeng ny'eden. M'odimbọhk ọttara obhurubọhk kabhakẹ. Wa abaabh p'Philistiya ator bẹ maa, mapyirẹ z'enem ch'Bẹt-Shẹmẹsh.

13 M'ogbe nwa, wa anọng p'Bẹt-Shẹmẹsh maning z'ilokodo mad-asi ipha s'wit. K'ose kw'matinẹ achen aze Ẹkkọhbhọ ndo za, nttem idaam bẹ. 14 Ọkpaar nwo okwu opyirẹ z'owonọ kw'Joshua kw'ofon Bẹt-Shẹmẹsh, ọkpọka nya ch'ọnyọm ẹtakpa chiden. Minna kw'anọng mbo atim agbaaka p'ọkpaar nwo akọma ekpon, matima abhaam mbo afọhnọ ẹja ch'ẹkwọmọ anang Ọvaar Ibinọkpaabyi. 15 Anọng p'efona ch'Lẹvi asaka Ẹkkọhbhọ ch'Echekẹ ch'Ọvaar Ibinọkpaabyi, matọka chẹ ọmaana ikwukwu s'ekpo mbyo py'gol eyik, mabera ny'ẹtakpa ndo. Ny'ewu ndo, anọng p'Bẹt-Shẹmẹsh manang nnanga s'ẹkwọmọ, mabir afọhnọ nja anang Ọvaar Ibinọkpaabyi. 16 Avaarnọng mbo achen p'abaabh Philistiya aze idik nja maphyir nya o, makpa nnam z'Ẹkrọn ny'ewu ndo.

17 Ma wọ ode ebirakpo py'gol py'aPhilistiya atọhmọ anang Ọvaar Ibinọkpaabyi mach'ẹnanga ch'epinẹ: Ashdọd ọnangẹ madanẹ, Gaza ọnang madanẹ, Ashkẹlọn ọnang madanẹ, Gat ọnang madanẹ, Ẹkrọn ọnang madanẹ. 18 Obhik f'agbomma p'matim gol asi wa ode k'ose kw'ibhon ichen s'avaar p'Philistiya ide, ọmaana ibhon s'igaang-ọgaangẹ, ọttara s'ikarẹ. Ẹtakpadim ndo ch'manan Ẹkkọhbhọ ch'Echekẹ ch'Ọvaar Ibinọkpaabyi, etim ening z'owonọ kw'Joshua kw'ofon Bẹt-Shẹmẹsh mach'nttẹsẹ maa, pyirẹ m'ewu ch'menda.

19 Okenaka, wa Ibinọkpaabyi ọfhọ anọng banẹ p'afon Bẹt-Shẹmẹsh. Wa ọfhọ anọng arọbh attaan okwuma ijobh, okurọ ch'makkerẹ ny'ẹtaanga kw'Ẹkkọhbhọ ch'Echekẹ. Anọng mbo maninga k'isen, okurọ ch'Ọvaar Ibinọkpaabyi ọfhọ bẹ k'ọsaabh. 20 Anọng p'Bẹt-Shẹmẹsh mabọbh bẹ́, "Anyi wọ im'okpo obe k'ititika s'Ọvaar Ibinọkpaabyi, Ibinọkpaabyi nwa kw'owur-owur o? Ó̱de Ẹkkọhbhọ nda ebin ma, m'etor anyi?"

21 Nya o, matọhm ẹkkaabha anang anọng p'Kiriyat-Jẹrim, maben bẹ bẹ́, "Anọng p'Philistiya kk'Ẹkkọhbhọ ch'Echekẹ ch'Ọvaar Ibinọkpaabyi arika e. Màsaka kwu tọka tima china z'abọnga k'obhon e."