1 Ny'ogbe nwo, k'edikkobh chẹ, wa Samwẹl od-osi ọtọhm k'mbọhk s'Ẹli, z'ititika s'Ọvaar Ibinọkpaabyi. Ny'ogbe nwo ọdọk, wa ọgbaakadik kw'Ọvaar Ibinọkpaabyi okem ewora, obir ọgaang-ọgaangẹ bẹ́, anọng ayena ẹyaakẹ ch'idik s'Ibinọkpaabyi.

2 K'orungiwu wanẹ, Ẹli kw'ina ọdọk iyaan mawuriji od-oze, oyim z'ibyi s'od-okkikken oyima. 3 Ny'ogbese nwo ọdọk, ottoringkkang kw'Ibinọkpaabyi otim odima. Samwẹl oyima ny'ibyi s'awuriji s'Ọvaar Ibinọkpaabyi s'masokọ Ẹkkọhbhọ ch'Echekẹ. 4 Nya o, Ọvaar Ibinọkpaabyi oyerẹ Samwẹl, Samwẹl ọpọhn-ẹ bẹ́, "Kirẹ kaam ma!"

5 Minna kw'otim ẹbhar od-okebha Ẹli, oben-ẹ bẹ́, "Kirẹ kaam ma; mmaang ch'ayer-m." Okenaka, Ẹli oben-ẹ bẹ́, "Zọhng yim-oyima, kọ kinyerẹ." Samwẹl ofona od-oyim-oyima.

6 Ọpọhn za, Ọvaar Ibinọkpaabyi obir oyerẹ, "Samwẹl!" Samwẹl obina od-okebha Ẹli, oben-ẹ bẹ́, "Ayer-m oyerẹ, kirẹ kaam ma."

Ẹli oben-ẹ bẹ́, "Nnwa kwaam, kpa nnam zọhng yim-oyima, kaam kọ kinyerẹ."

7 Wa ny'ogbe nwo, Samwẹl Ọvaar Ibinọkpaabyi otim ozonga; ẹyaakẹ ch'ọgbaakadik kw'Ọvaar Ibinọkpaabyi kobir oyena.

8 Ọvaar Ibinọkpaabyi oyerẹ Samwẹl ttong igbedim ittaan. Samwẹl obina od-okebha Ẹli oben-ẹ bẹ́, "Mmaang ch'ayer-m, kirẹ kaam ma." Nya kw'Ẹli notinẹ bẹ́, Ọvaar Ibinọkpaabyi wọ od-oyerẹ nnwa nwo. 9 Minna kw'Ẹli obenẹ Samwẹl bẹ́, "Zọhng yim-oyima, óde oyer-ọ, ben bẹ́, ‘Ọvaar Ibinọkpaabyi gbaak, ọtọhmnọng kwọ ọbhaang-ọ ka e.’ " Minna kw'Samwẹl ọkpa nnam od-oyima z'ikẹ k'ibyi.

10 Ọvaar Ibinọkpaabyi okwu obe nya oyer-ẹ mach'od-oyer-ẹ k'igbe njoza bẹ́, "Samwẹl, Samwẹl!"

Samwẹl ọpọhna bẹ́, "Gbaak e, ọtọhmnọng kwọ oyong-ọ itọhng ka e."

11 Minna kw'Ọvaar Ibinọkpaabyi obenẹ Samwẹl bẹ́, "Kirẹ e, kaam m'nsi ọttọhk m'Israẹl f'im'osi ọnọng kpenamkpen kw'ọbhaang, ojor-ẹ. 12 Ó̱de ógbe nwo opyirẹ, kaam m'nsi itama kpenamkpen s'mgbaakẹ mmaana echimma ch'Ẹli, tọma k'ẹtọma maa pyirẹ k'ẹkpọka. 13 Kaam kk'ẹ mgbaaka bẹ́, m'mpyibh echimma chẹ aponga ttattampe okurọ mpyibha s'ikẹ ozong mawuriji. Iva pẹ alukọ kaam Ibinọkpaabyi, bẹ kocher ọchọna. 14 Ofona nya, nchekẹ nnang ẹsọhmmọr ch'Ẹli bẹ́, ‘Zaabẹ́ mafọhnọ nja yen, mabir anang nnanga yen, ekpo mbyo epyibha ch'ẹsọhmmọr ch'Ẹli mèkpo ẹrọbha.’ "

15 Samwẹl oyima maa, opyirẹ k'ekpebha, pira nogwung amma p'ọsọhm kw'Ibinọkpaabyi. Wa ojor-ẹ ojora bẹ́, otek Ẹli idik s'Ibinọkpaabyi ọyaakẹ ọnang kẹ Samwẹl. 16 Okenaka, Ẹli oyer-ẹ, oben-ẹ bẹ́, "Samwẹl, nnwa kwaam."

Samwẹl ọpọhn-ẹ bẹ́, "Kirẹ kaam ma."

17 Ẹli ọbọbh-ẹ bẹ́, "Bọng-odik wọ kw'ọgbaak-ọ? Kaam odik kpenamkpen kàdubh. Tte Ibinọkpaabyi ọnang-ọ irem k'eden kpenamkpen ch'ọdaak-ẹ, óde adubh-m odik kpenamkpen kw'ọgbaak-ọ." 18 Minna kw'Samwẹl ozeng otek-ẹ odik kpenamkpen. Kẹ odik kodubhọ. Ẹli ọpọhn-ẹ bẹ́, "Kẹ wọ ode Ọvaar Ibinọkpaabyi; tte osi k'ose kw'ọdaak-ẹ."

19 Wa Ọvaar Ibinọkpaabyi oning ọmaana Samwẹl k'ose kw'obeng ochina ororo. Ẹkkaabha chẹ kede ch'Samwẹl ọgbaakẹ ch'ina eyinẹ k'ose kw'ọgbaakẹ. 20 Minna kw'anọng p'Israẹl maphyir p'atọm z'Dan maa pyirẹ z'Beershẹba mabir atin bẹ́, Samwẹl ode ọgbaak-ettem ch'Ọvaar Ibinọkpaabyi k'odik ọkkọkka. 21 Ọvaar Ibinọkpaabyi ochina ororo ọkọhka ifor sẹ z'Shilo, obir ozenga ny'ọgbaakadik kwẹ ọyaakẹ ifor sẹ ọnang Samwẹl.