1 K'ogbe kw'Samwẹl kk'ọbara k'atam, ọrọbha iva pẹ mach'akpaar-aponga p'Israẹl. 2 Ochedennwa kwẹ wa okpen Joẹl, oyok kw'ottong afa okpena Abija. Wa mad-asi ọtọhm f'eponga-kpaara z'Beershẹba. 3 Okenaka, iva pẹ m'ẹtọkọ chẹ katorọ. Bẹ mater ad-aror akpuka k'ẹfọraden, matọka ngwu, mabira akpa eden ch'eponga-kpaara ọkkọkka.

4 Minna kw'asogbọhkọnọng p'Israẹl maphyir matobh ayok makwu akebha Samwẹl z'Rama. 5 Maben-ẹ bẹ́, "Kọ kk'atama; iva pọ nden sọ katorọ. Rọbha ọvaarnọng nang mina, k'ose kw'nkọma njoza iyen avaarnọng."

6 Odik nwo obhem Samwẹl ettem, ch'mabenẹ bẹ́, "Nang mina ọvaarnọng kw'im'ọttọhna aponga pamina." Ofona nya, oze njọm ọnang Ọvaar Ibinọkpaabyi. 7 Ọvaar Ibinọkpaabyi oben-ẹ bẹ́, "Yonga itọhng ny'idik njo maphyir s'anọng mbo mad-aben-ọ bẹ́, asi; kọ azang kw'anọng mbo abhumọ, kaam kw'mabhumọ nya mach'Ọvaarnọng kwabẹ. 8 K'ose kw'mad-asi, tọma ny'ewu ch'nnọbh bẹ z'Ijip maa pyirẹ menda, minna kw'mad-asi anang-ọ ma. Bẹ mad-abhum-m, makpobha aka. 9 Nya o, m'ayonga bẹ itọhng. Okenaka, tọr bẹ itọhng mawuriji, si bẹ mazonga ọttọhk f'ọvaarnọng nwo im'osi bẹ."

10 Samwẹl ọgbaak anọng mbo p'arorọ ọvaarnọng idik njo maphyir s'Ọvaar Ibinọkpaabyi ọgbaakẹ. 11 Oben bẹ bẹ́, "Idik s'ọvaarnọng kw'im'ọbaabha bọnga im'osi ide bẹ́: m'ọtọka ajinọngva pabọnga osok k'ọtọhmse mavanẹ ọmaana ijaar s'ogbin, ọttara nnyanya, f'ode bẹ́, mmin'ad-achi ijaar sẹ s'ogbin eden. 12 M'osi ayok banẹ ade asonọng p'agbongnọng p'ade nnọhna k'ẹkaan, banẹ ade p'nnọhna arọbh afa okwuma ijobh k'ẹkaan, ayok banẹ m'atubh owonọ kwẹ, mabira asi ipha sẹ, mboza m'asi egbongkpo ọttara ẹtọhmkpo py'ijaar sẹ s'ogbin. 13 M'ọnang panọngva pabọnga ọtọhm f'ana p'alebh eruk osisi, mabira ad-awọhn-ẹ ọchattọhk, mabira asi brẹd anang-ẹ. 14 M'ọtọka iwonọ ọkkọkka sabọnga, ọmaana iwonọ s'grep sabọnga ọttara s'oliv, ọnang atọhmnọng pẹ. 15 M'ọtọka ekpo py'mapha z'iwonọ sabọnga s'achimọma, ọmaana py'grep, okebh k'ibyi ijobh, ọtọka igboka janẹ ọnang adidennọng ọttara atọhmọ pẹ. 16 M'ọtọka atọhmnọng pabọnga k'ejinọng ọttara k'ẹpanọng, ọmaana adikkobh akkọkka pabọnga, ọttara nnyanya sabọnga osok k'ọtọhm fẹ. 17 M'okebh etirakpo pyabọnga k'ibyi ijobh, ọtọka igboka janẹ oyena. Bọnga makpa nnam ade abira pẹ. 18 Éwu ndo epyirẹ, bọnga mm'abhom ẹkkaana akpẹkẹ ọvaarnọng nwo kw'nkk'ateka, Ọvaar Ibinọkpaabyi bọnga ọgba mọ̀kkọra."

19 Okenaka, anọng mbo mabhum odik kw'Samwẹl, m'ikẹ itọhng kayong, maben bẹ́, "Mma e! Mororọ ọvaarnọng kw'm'ọbaabha mina, 20 mfha mode mach'nkọma njoza maphyir. Ọvaarnọng nwo wọ m'ọbaabha mina, obir ochi mina eden k'mgbong samina."

21 K'ogbe kw'Samwẹl ọbhaang idik njo maphyir s'anọng mbo agbaakẹ, kẹ obir ọgbaak Ọvaar Ibinọkpaabyi k'ose kw'anọng mbo magbaakẹ. 22 Ọvaar Ibinọkpaabyi ọpọhna bẹ́, "Yonga bẹ itọhng, nang bẹ ọvaarnọng."

Nya o, Samwẹl oben ajinọng p'Israẹl bẹ́, "Ọnọng kpenamkpen ọkpa nnam z'ikẹ k'obhon."