1 Samwẹl 22

Devid ochin z’Adulam ọmaana z’Mizpa

1 Devid obina z’Gat ọrọbh ozeng z’ọtakpamma kw’Adulam. K’ogbe kw’ivotte p’ejinọng ọttara ẹsọhmmọr ch’otte kwẹ mabhaang odik nwo, mabina akebh-ẹ za. 2 Anọng mbo maphyir p’uwa maning k’adama, ọmaana ayok p’atim ibhorọ, ọmaana ayok p’nttem nna ilebhẹ, makọbh-ẹ abaabha. Kẹ okwu ode oso kwabẹ. Anọng p’uwa aning nya amaan-ẹ mm’apyirẹ ẹnọhna.

3 Devid obina nya ozeng z’Mizpa, z’ẹkọma ch’Moab, od-oben ọvaarnọng kw’Moab bẹ́, "Ma, ina achera bẹ́, atte kwaam ọttara akka kwaam maninga ma amaan-ọ maa nzonga ọttọhk f’Ibinọkpaabyi m’osi ọnang-m o?" 4 Minna kw’ọtọk otte ọttara ọkka ọgbaara ọvaarnọng kw’Moab, maninga nya amaan-ẹ k’ogbe nwo maphyir kw’Devid oning z’ọtakpamma.

5 Nya o, Gad kw’ode ọgbaak-ettem ch’Ibinọkpaabyi oben Devid bẹ́, "M’ọtakpamma kàninga. Zọhng z’izek s’Juda." Ofona nya o, Devid obina ochina z’ẹtam ch’Hẹrẹt.

Saul ọfhọ afọhn-nja p’Ibinọkpaabyi z’Nọb

6 Nya o, Saul okwu ọbhaanga bẹ́, nkk’Devid ọttara ajinọng pẹ aza. Ny’ogbe nwo, Saul oning k’echirin ch’tamarisk, z’egbe ch’Gibea, otima ọkọhn k’ọbọhk. Atọhmnọng pẹ maphyir mabe akọbh-ẹ ake k’ettem.

7 Saul oben atọhmnọng pẹ bẹ́, "Bọnga ajinọng p’Bẹnjamin, màyonga itọhng! Ma, ojinọngnwa kw’Jẹsẹ ina ọbhaaka bọnga maphyir mgba s’mm’atubh iwonọ, ọmaana s’mm’atubh grep o? Ma, ina osi bọnga maphyir made aso p’agbongnọng nnọhna k’nnọhna? Wanẹma, aso p’agbongnọng arọbh achen obhir-obhirẹ yirẹ? 8 Ma, kẹ wọ osi bọnga maphyir machi-m ikwu, ọnọng kaam kotekẹ bẹ́, nnwa kwaam, ọmaana nnwa kw’Jẹsẹ nkk’acheka anang ayok? Ọnọng mawanẹ kw’mbar-ẹ odik kode, ọnọng kode kw’obir otek-m bẹ́, nnwa kwaam kk’ọtọhmnọng kwaam Devid ọchọhma bẹ́, obe k’eden osi-m itama k’ose kw’osi ma menda."

9 Nya o, Doẹg kw’ofon Edom, kw’uwa obir obe nya ọmaana atọhmnọng p’Saul, oben bẹ́, "Nze ojinọngnwa kw’Jẹsẹ ch’okwu z’Nọb, okwu okebha Ahimẹlẹk kw’ode nnwa kw’Ahitub. 10 Ahimẹlẹk ọbọbh Ọvaar Ibinọkpaabyi odik k’eso ch’Devid, obir ọnang-ẹ ẹchakpo ọttara ọkkangkkang kw’Golayat kw’ofon Philistiya."

11 Nya o, ọvaarnọng ọtọhm bẹ́, mayerẹ Ahimẹlẹk kw’ode ọfọhn-nja, kw’obir ode nnwa kw’Ahitub, ttara ajinọngva p’ẹsọhmmọr ch’otte maphyir, p’ade afọhn-nja p’afon ẹkọma ch’Nọb. Bẹ maphyir machera eyerẹ ch’ọvaarnọng. 12 Saul oben Ahimẹlẹk bẹ́, "Yonga itọhng, nnwa kw’Ahitub."

Ahimẹlẹk ọpọhn-ẹ bẹ́, "Iya, ttatta kwaam."

13 Saul oben-ẹ bẹ́, "Kayen kw’ikọ ọttara nnwa kw’Jẹsẹ machi-m ikwu, maa anang-ẹ ọchattọhk ọttara ọkkangkkang? Kayen kw’abir abọbh Ibinọkpaabyi odik k’ikẹ k’eso, awọhkọ ọyaang-m k’ichen, obir otubha k’eden otik-m bẹ́, osi-m itama k’ose kw’ikk’ọsa ma menda?"

14 Ahimẹlẹk ọpọhna ọvaarnọng bẹ́, "Ma atọhmnọng pọ maphyir, anyi wọ ọsak eso mach’Devid kw’ode ọnyẹ kw’ọvaarnọng, kw’ọbaabh ẹkaan ch’ekker-ọ? Anyi wọ obir oyena ikpukpobha mawuriji m’ẹsọhmmọr chọ o? 15 Ma, ochedengbe kw’mbọbhọ Ibinọkpaabyi odik k’ikẹ k’eso wọ ma o? Minna kode! Tte ọvaarnọng oning kaam ọtọhmnọng kwẹ odik ọnan, oning echimma ch’atte kwaam odik obir ọnana. Kirẹ, kaam ọtọhmnọng kwọ odik maphyir-phyir kinzong kw’ọmaan idik nja s’id-iyin ma."

16 Ọvaar Saul oben bẹ́, "Kọ Ahimẹlẹk ọttara echimma ch’atte kibungọ, mm’ap’pe."

17 Nya o, ọvaarnọng oke agbongnọng p’akker-ẹ ẹfa, oben bẹ bẹ́, "Màfhọ afọhn-nja mba p’Ọvaar Ibinọkpaabyi, okurọ bẹ́, bẹ mabira ator Devid k’odik. Bẹ nkk’azonga bẹ́, Devid ọd-ọrọbh-ọrọbh nya, m’kaam katekẹ."

Okenaka, ny’akaannọng mbo p’ọvaarnọng maphyir, ọnọng kode kw’uwa odo ifor bẹ́, otwu ọfọhn-nja kpenamkpen kw’Ọvaar Ibinọkpaabyi ọbọhk.

18 Nya o, ọvaarnọng, oke Doẹg ẹfa, oben-ẹ bẹ́, "Kọ bhakẹ nnam afhọ afọhn-nja mba." Minna kw’Doẹg kw’ofon ẹkọma ch’Edom ọbhakẹ nnam ọfhọ bẹ. Ny’ewu ndo, ọfhọ anọng nso arọbh ana okwuma achen p’afọr ẹphọd kw’matim ọbara-wurọ asi. 19 Obir ọfhọ anọng maphyir p’abin ẹkọma ch’Nọb, kw’ode obhon kw’afọhn-nja: ajinọng ọmaana panọng, ọmaana ivava, ọmaana abhava, ọmaana abhaam, ọmaana nnyanya, ọttara arọkimaan pabẹ.

20 Okenaka, Abiyata kw’ode ojinọngnwa kw’Ahimẹlẹk, kw’Ahitub obhonọ, ọrọbh otor Devid. 21 Otek Devid bẹ́, Saul kk’afọhn-nja p’Ọvaar Ibinọkpaabyi ọfha. 22 Devid oben Abiyata bẹ́, "Ny’ewu ndo ch’nze bẹ́, Doẹg kw’ofon Edom oning nya, nya kw’nzong bẹ́, m’otek Saul otek. K’odik ọkkọkka, kaam wọ nwọhkọ obo kw’echimma ch’atte k’ibungọ. 23 Ninga maan-m; oning-ọ ojor. Ọnọng nwo kw’od-oror bẹ́, ọfhọ-ọ, obir ororọ za bẹ́, ọfhọ kaam ọttara. Áning amaan-m, ọttọhk kọ mòsi."