1 Ewu danẹ, Jonatan kw'ode ojinọngnwa kw'Saul, oben odikkobh kw'ode otim-egbongkpo kwẹ bẹ́, "Kwu mojeka z'okwubha kw'egbongkwurọ ch'aPhilistiya." Okenaka, Jonatan otte odik nwo kọgbaakẹ.

2 Wa Saul oning k'echirin ch'pomegrenet, z'Migrọn, z'mbọr-mbọr kw'Gibea. Agbongnọng p'uwa aning amaan-ẹ nya marik-orik apyirẹ ẹnọhna okwuma arọbh ijobh. 3 Ọnọng wanẹ nya, ode Ahija kw'uwa ọd-ọfọra ẹphọd. Wa kẹ ode ojinọngnwa kw'Ahitub, kw'ode ọgbaanotte kw'Ikabọd. Ikabọd nwa wọ iwa ode ojinọngnwa kw'Phinẹhas, kw'ode ojinọngnwa kw'Ẹli, kw'ode ọfọhn-nja kw'Ọvaar Ibinọkpaabyi z'Shilo. Ọnọng kode kw'ozong bẹ́, Jonatan kk'ofona.

4 Wa ẹtakpa ch'egor-ogorọ ed-eninga k'ẹbhaakẹ kpenamkpen ch'Jonatan ọkamẹ bẹ́, ozenga ojeka za ch'aPhilistiya maning. Ẹtakpa danẹ mayerẹ Bozẹz, ndoza mayerẹ Sẹnẹ. 5 Ẹtakpa danẹ ebe ekkerẹ ebir-ebir kw'Mikmash, ndoza ekkerẹ ẹwọn-ẹwọna kw'Geba.

6 Jonatan oben otim-egbongkpo kwẹ bẹ́, "Kwu mojeka z'okwubha kw'anọng p'nna inọm abhirẹ maning. Ṉ́nòsi Ọvaar Ibinọkpaabyi m'orima ọnang mina. Zaabẹ mọsaabh-ọsaabh o, nkọsaabhẹ o, ọttọhk kode f'im'ọchọna Ọvaar Ibinọkpaabyi bẹ́, oning mina ọkkaan."

7 Otim-egbongkpo kwẹ oben bẹ́, "China ororo, si okpenamkpen f'oning-ọ z'ettem. Ettem chaam, ọmaana ọgbagba kwaam ening ma ẹmaan-ọ."

8 Jonatan oben-ẹ bẹ́, "Ó̱de ode minna, mm'ojeka z'okwubha, mfha aPhilistiya mbo aze mina. 9 Ó̱de mabenẹ mina bẹ́, ‘Màbe nya maa, mokebha bọnga nya,’ mm'obe nya ch'mobe, m'bẹ za mòkebha. 10 Okenaka, óde mabenẹ mina bẹ́, ‘Màvura kebha mina ka,’ mm'ovura okebha bẹ za, okurọ bẹ́, nya wọ im'ọkọhka mina bẹ́, Ọvaar Ibinọkpaabyi kk'bẹ ọtọka oke mina k'mbọhk."

11 Minna kw'bẹ anọng afa mayinẹ makọhk ifor sabẹ z'ibyi s'aPhilistiya maning. APhilistiya aben bẹ́, "Màze e, aHiburu aning za ayinẹ z'amma p'matubh e." 12 Ajinọng p'aning ny'ibyi njo makwọhrọ ẹmọng abenẹ Jonatan ọmaana otim-egbongkpo kwẹ bẹ́, "Màvura kebha mina ka, mm'ọkọhka bọnga." Ofona nya o, Jonatan oben otim-egbongkpo kwẹ bẹ́, "Vura yak-m nnam; Ọvaar Ibinọkpaabyi kk'bẹ ọtọka oke Israẹl k'mbọhk."

13 Jonatan otima mbọhk ọmaana mmo ovura, otim-egbongkpo kwẹ, ọyak-ẹ nnam. Jonatan ọfhọ aPhilistiya banẹ, otim-egbongkpo kwẹ obir ọfhọ ọyak-ẹ nnam. 14 Ny'echeden-rima ndo, wa Jonatan ọttara otim-egbongkpo kwẹ mafhọ ajinọng p'apyirẹ ẹrọbh ny'ibyi s'im'ipyirẹ ntọkọ arọbh achenọmfa okwuma ijobh k'ẹkpa.

15 Nya o, opoma ọbọka agbongnọng p'Philistiya p'aning z'ibhinga-byi, ọmaana p'aning z'igbongtitika, ọmaana ayok p'aning z'egbongkwurọ, ọttara akkikkaama. Wa izek ibir inyengẹ. Ibinọkpaabyi wọ iwa ọtọhmọ opoma mvo.

16 Akker-ibyi p'aning amaana Saul z'Gibea, z'ẹkọma ch'Bẹnjamin, maze agbongnọng p'Philistiya ch'mad-attena ẹkpa-ẹkpa. 17 Ofona nya o, Saul oben anọng p'aning nya amaan-ẹ bẹ́, "Màbhik agbongnọng, mfha mozonga ọnọng kw'ikk'ofona orik mina." Ch'nkk'asa minna o, maze bẹ́, Jonatan ọmaana otim-egbongkpo kwẹ wọ iwa nnade.

18 Saul oben Ahija bẹ́, "Tima Ẹkkọhbhọ ch'Echekẹ ch'Ibinọkpaabyi kwu." Ny'ogbe nwo, wa Ẹkkọhbhọ ndo ening ẹmaana anọng p'Israẹl. 19 Nya ch'Saul otim ọgbaak odik ọmaana ọfọhn-nja kw'Ibinọkpaabyi, minna kw'damadama kw'otto z'ibhinga-byi s'aPhilistiya ọsaabhẹ ọttara-ọttara. Ofona nya o, Saul oben ọfọhn-nja kw'Ibinọkpaabyi bẹ́, "Rọbha ọbọhk kwọ nya."

20 Nya o, Saul ọmaana agbongnọng pẹ matobha ayok, mabina ayin egbong. Mad-akebha aPhilistiya k'damadama kwiden, ch'mad-atima akkangkkang afhọ ayok-ayok. 21 AHiburu mbo p'akkikken aninga ọmaana aPhilistiya, p'abir ator bẹ achina z'ibhinga-byi, majeka akebha anọng p'Israẹl p'aning ọmaana Saul ọttara Jonatan. 22 K'ogbe kw'uwa anọng p'Israẹl maphyir p'nkk'atubha z'ẹkọma ch'Ephraim ch'eyen agbe mabhaang bẹ́, aPhilistiya aning za arọbhọ, bẹ makwu ator ayok egbong, makwubh aPhilistiya k'ẹfa k'ẹfa. 23 Minna kw'Ọvaar Ibinọkpaabyi ọkkaan Israẹl ny'ewu ndo. Egbong ndo etima maa ẹkpan Bẹt-Avẹn.

24 Ny'ewu ndo, wa ajinọng p'Israẹl aning k'adama okurọ ch'Saul ikk'ọnwọhnga bẹ́, "M'opyibh ọnang ọnọng kpenamkpen kw'ochi ọttọhk pira ẹsọhka etto, ch'ina ọttọhk f'awawunanọng paam asi-m ntìma ntuka." Ofona nya o, ogbongnọng kw'ọbhaang ọchattọhk ny'ẹmma kode.

25 Agbongnọng mbo maphyir madim z'ẹtam, maze ọkọhn ny'izek. 26 Ch'madimẹ ny'ẹtam o, maze akọhnsi ch'nd-ayin nya. Okenaka, ọnọng kw'otwu ọbọhk nya ọttaakẹ kode, okurọ ojora f'nwọhngọ njo. 27 Jonatan otìma ọbhaanga bẹ́, otte kk'ọnwọhnga ọnang anọng mbo. Ofona nya o, onemẹ ochikwura kw'otim ny'ọbọhk, ọnọhma eso chẹ ny'ọkọhn mvo, otinẹ ọbọhk oke z'ẹmma, ọttaakẹ, ẹfa chẹ ẹnwọnga. 28 Nya o, ogbongnọng wanẹ oben-ẹ bẹ́, "Atte kwọ ọyak ọbọhk ọnwọhngọ bẹ́, ‘M'opyibh ọnang ọnọng kpenamkpen kw'ochi ọttọhk menda!’ Kẹ wọ osi ifor imọm ajinọng mba."

29 Jonatan oben bẹ́, "Atte kwaam kk'odik ọja m'izek nja. Kirẹ ose kw'ẹfa chaam ẹnwọhng ch'mmaang akọhnsiva mba. 30 Wura ojibhẹ ọtam óde ajinọng mbo machi ekpo byanẹ py'nkk'awawunanọng pabẹ ana menda. Nya wọ kw'uwura mọfhọ aPhilistiya mbo ọtam."

31 Ny'ewu ndo, ch'anọng p'Israẹl kk'atọma ny'Mikmash mafhọ aPhilistiya maa mapyirẹ z'Aijalọn, okwu ọkọhn bẹ mawuriji. 32 Matto z'ekpo py'matọk z'egbong, matọka arọkimaan, ọmaana adamogbodo, ọttara abhaamva, mapekẹ jẹ ny'izek, machi ttara izẹ. 33 Nya o, ọnọng wanẹ oben Saul bẹ́, "Kirẹ e, ajinọng mbo aning za asi epyibha z'Ibinọkpaabyi k'ititika, ch'mad-achi eten ch'etim izẹ."

Saul oben bẹ́, "Nkk'atta k'epinẹ ch'Ibinọkpaabyi. Màbungẹ ẹta chiden ẹbhar-ẹbhar tima kwu ma." 34 Nya o, oben bẹ́, "Màchina z'ikpakaana s'ajinọng mbo, magbaak bẹ bẹ́, ‘Ọnọng-ọnọng otima adamogbodo, wanẹma ọrọkimaan kwẹ okwu, obir oninga ma ọfhọ wẹ, ochi. Tte ọnọng oning Ọvaar Ibinọkpaabyi opinẹ bẹ́, ochi eten ch'etim izẹ.’ "

Minna kw'ọnọng kpenamkpen otim ọbhaamdim kwẹ okwu ny'erungọ ndo, mafhọ wẹ nya. 35 Nya o, Saul osi ija-byi ọnang Ọvaar Ibinọkpaabyi. Nya wọ ode ochedengbe kw'uwa osi ọttọhkse mva.

36 Saul oben bẹ́, "Tte mochina z'aPhilistiya m'erungọ, mod-orima bẹ ábẹ̀ maa, ewu esobha, mọna bẹ ekpo pyabẹ. Tte moning ọnọng mawanẹ-wanẹ ọbọhk otte oruk akpen."

Mapọhn-ẹ bẹ́, "Si k'ose kw'ojibh-ọ."

Okenaka, ọfọhn-nja kw'Ibinọkpaabyi oben bẹ́, "Tte mọbọbh Ibinọkpaabyi ma pira."

37 Nya o, Saul ọbọbh Ibinọkpaabyi bẹ́, "Ma, nyin erima mmaana aPhilistiya o? Ma, nna Israẹl akema bẹ o?" Okenaka, Ibinọkpaabyi kẹ ẹpọhna ny'ewu ndo kọnangẹ.

38 Ofona nya o, Saul oben bẹ́, "Bọnga aso p'agbongnọng maphyir màkwu ma, moror epyibha ch'nkk'ọsa menda. 39 K'ose kw'Ọvaar Ibinọkpaabyi kw'ọd-ọkkaana Israẹl orukọ akpen, zaabẹ́ epyibha ndo efon k'Jonatan kw'ode nnwa kwaam, kẹ m'opope." Okenaka, ọnọng mawanẹ kw'ọpọhn odik kode.

40 Saul oben anọng p'Israẹl maphyir bẹ́, "Bọnga màbe kina, kaam ọmaana nnwa kwaam Jonatan, mm'obe k'okwubha."

Anọng mbo mapọhn-ẹ bẹ́, "Si k'ose kw'ojibh-ọ."

41 Nya o, Saul oben bẹ́, "O Ọvaar Ibinọkpaabyi kw'ode Ibinọkpaabyi kw'Israẹl, osempira kaam ọtọhmnọng kwọ ẹpọhna kanangẹ menda? Ó̱de epinẹ ndoma efon k'kaam, obir ode bẹ́, efon k'Jonatan kw'ode nnwa kwaam, o Ibinọkpaabyi kw'Israẹl, tima Urim nang-m ẹpọhna. Ó̱de efon k'anọng pọ Israẹl, tima Tumim nang-m ẹpọhna." Ọsẹ otto k'Jonatan ọmaana Saul. Odik nwo ọraar anọng mboza. 42 Nya o, Saul oben bẹ́, "Bharẹ ọsẹ kw'kaam ọmaana nnwa kwaam Jonatan." Ọsẹ otto k'Jonatan.

43 Ofona nya o, Saul oben Jonatan bẹ́, "Tek-m ọttọhk f'ikk'asa."

Jonatan otek-ẹ bẹ́, "Nkenka ntima eso ch'ochikwura kwaam mmaanga ọkọhn biribirẹ. Kirẹ kaam ma, tte mpe kẹ."

44 Saul oben bẹ́, "Tte Ibinọkpaabyi osi-m k'ose kpenamkpen kw'ọdaak-ẹ, obir ọttara-ọttara, óde kọ Jonatan ina ape!"

45 Okenaka, ajinọng mbo maben Saul bẹ́, "Nya kw'Jonatan min'ope o, kẹ kw'ikk'ẹkkaana nda chiden ọsa ọnang Israẹl o? Minna mòde! K'ose kw'Ọvaar Ibinọkpaabyi orukọ akpen, osisanaanga kw'eso chẹ k'izek mòtto, okurọ bẹ́, osi ọttọhk mva menda ọmaana ẹkkaana ch'Ibinọkpaabyi." Minna kw'ajinọng mbo makaamẹ Jonatan, m'ọdọk kẹ kafhọ.

46 Nya o, Saul ottika aPhilistiya okwukwubh, aPhilistiya makpa nnam z'abẹ k'obhon.

47 Ch'Saul kk'ẹvaar ch'Israẹl otima, orima egbong ọmaana awawunanọng pabẹ p'ade Moab, ọmaana Ammọn, ọmaana Edom, ọmaana avaar p'Zoba, ọttara aPhilistiya. Ẹbhaakẹ kpenamkpen ch'okkerẹ ichen, osi bẹ itama mawuriji. 48 Wa Saul od-orima egbong mach'ojinọng, okema anọng p'Amalẹk, obir ọrọbha Israẹl z'mbọhk s'anọng p'uwa nkk'bẹ akema, mana bẹ ekpo.

49 Wa ajinọngva p'Saul ade Jonatan, ọmaana Ishvi, ọttara Malki-Shua. Obir oyena aminava afa. Ocheden okpen Mẹrab, oyok kw'ikarẹ okpena Mikal. 50 Kwanọng kw'Saul okpen Ahinoam, kw'ode nnwa kw'Ahimaz. Osonọng kw'agbongnọng p'Saul wa okpen Abnẹr, kw'ode nnwa kw'Nẹr. Wa Nẹr ode ọgbaanotte kw'otte kw'Saul. 51 Abiyẹl wọ iwa obhonọ Kish, kw'ode otte kw'Saul, obir obhon Nẹr, kw'ode otte kw'Abnẹr.

52 K'akpen p'Saul maphyir, wa od-orima mgbong s'igaang-ọgaangẹ ọmaana aPhilistiya. K'ogbe kpenamkpen kw'oze ọfanọng, wanẹma, ọnọng kw'ọbarẹ ettem, ọd-ọtọk-ẹ ọttara z'agbongnọng pẹ.