1 Okwu opyirẹ k'ogbe wanẹ, Absalọm okwu oyena ọkpaar kw'nnyanya id-itọr ọmaana nnyanya. Ajinọng arọbh afa okwuma ijobh machẹ-ẹ eden. 2 Wa ọd-ọpọm-ọpọm od-obe ny'akonga p'eden ch'echin z'ebhumma ch'obhon. Ó̱de ọnọng otim odik okwu bẹ́, ọvaarnọng ọttọhna, Absalọm m'oyer-ẹ, ọbọbh-ẹ bẹ́, "Bọng-obhon kw'ikọ afon o?" Ọnọng nwo m'ọpọhn-ẹ bẹ́, "Kaam ọtọhmnọng kwọ mfon m'ẹkọma danẹ ch'Israẹl e." 3 Absalọm m'oben-ẹ bẹ́, "Kirẹ ẹ, aponga mba adaamẹ kọ e. Okenaka, ọnọng kode kw'im'ọbhaanga aponga pọ k'eso ch'ọvaarnọng e." 4 Absalọm m'obir oben-ẹ bẹ́, "Wúra ode bẹ́, masi-m ọkpaar-aponga m'izek nja, wura nd-mkpaara aponga p'mm'adaam ọnọng kpenamkpen ettem."

5 Obir ode bẹ́, ogbe kpenamkpen kw'ọnọng ọnyọm Absalọm z'ifor bẹ́, ọraka eso ọnang-ẹ, kẹ m'otera onemẹ ọbọhk, ọbọka ọnọng nwo, ọbaak-ẹ. 6 Minna kw'uwa Absalọm od-osi otima otor anọng p'Israẹl maphyir p'atim idik akwu bẹ́, ọvaarnọng ọttọhna. Ozenga nya, odebh nttem s'anọng p'Israẹl.

7 Ch'icho nna kk'ikpana, Absalọm oben ọvaar Devid bẹ́, "Ototo, tte-m ọbọhk nchina z'Hẹbrọn, nd-nsi nnang Ọvaar Ibinọkpaabyi k'ose kw'uwa nchekẹ. 8 K'ogbe kw'uwa nning z'Geshur, z'ẹbhaakẹ ch'Aram, nchekẹ bẹ́, ‘Ó̱de Ọvaar Ibinọkpaabyi otim-m ọkpa nnam z'Jẹrusalẹm, m'mkpobh-ẹ z'Hẹbrọn.’ "

9 Ọvaar Devid oben-ẹ bẹ́, "Zọhng k'ọdaam." Minna kw'Absalọm obin ozeng z'Hẹbrọn.

10 Okenaka, Absalọm ozenga nnam-nnam ọtọhm atọhmọ pẹ ny'nkọma s'Israẹl maphyir, oben bẹ bẹ́, "Izaa mabhaang ẹmọng ch'enyisa, makwọhrọ k'ẹrọng bẹ́, ‘Absalọm wọ ode ọvaarnọng z'Hẹbrọn.’ " 11 Ny'ogbe nwo, anọng arọbh ijobh p'abin ny'Jẹrusalẹm kk'atọna amaana Absalọm. M'odik kw'od-oyin-oyin nya, kazong. 12 Nya ch'Absalọm ọd-ọfọhnọ nja, ọtọhm bẹ́, mayerẹ Ahitophẹl kw'ofon Gilo, kw'ọd-ọtọhn Devid idik bẹ́, obina z'Gilo kw'ode obhon kwẹ, okwu. Minna kw'ikwu s'Absalọm ochi Devid ido igaang-ọgaangẹ maa, akaannọng pẹ machina ororo asaabh.

13 Itọhmọ janẹ ikwu itek Devid bẹ́, "Absalọm kk'nttem s'anọng p'Israẹl maphyir odebha e."

14 Nya o, Devid oben atọhmnọng pẹ p'aning amaan-ẹ ny'Jẹrusalẹm bẹ́, "Màbina ẹbhar-ẹbhar mọrọbh e, kirẹ óde Absalọm ọsẹr-ọsẹr okebha mina ma, ọnọng kw'im'ọnaanga k'mbọhk sẹ kode e. Kẹ m'ọna mina mkpaang, otima ọkkangkkang ọfhọ ọnọng kpenamkpen m'ebhondim ndoma e."

15 Atọhmnọng p'ọvaarnọng apọhn-ẹ bẹ́, "Ttatta, mina mm'osi ọttọhk kpenamkpen f'ikọ ọvaarnọng kwamina abenẹ."

16 Minna kw'ọvaarnọng obin ozenga ọmaana ẹsọhmmọr chẹ kibungọ. Osok ayok-nọng pẹ ijobh nya bẹ́, makkerẹ odimpa. 17 Ọvaarnọng obina ozenga, anọng maphyir mator-ẹ, mazenga maa, mad-abe z'okpongannam-sọhm kw'ebhondim ndo. 18 Atọhmnọng pẹ maphyir mazenga achẹ-ẹ eden. Ajinọng p'Kẹrẹt, ọmaana p'Pẹlẹt, ọttara ajinọng p'Git p'ade anọng ẹnọhna okwuma arọbh ijobh p'abin z'Gat amaan-ẹ, mabir achẹ-ẹ eden.

19 Ọvaarnọng oben Ittayi kw'ofon Gat bẹ́, "Kayen kw'ikọ m'ator mina o? Kọ ade okikennọng kw'obhon kwọ ọtọhmọ ebira. Kpa nnam ad-aninga amaana ọvaar Absalọm. 20 Chena-chena kw'ad-akwu ma. Yen kw'mator-m m'osi kpaanga-kpaanga nwa kw'ina ibyi nzong s'nchin-ochina o? Kpa nnam, atima anọng pọ afona. Tte Ọvaar Ibinọkpaabyi ọkọhk-ọ ọdaakẹ kwiden, obir obe ọmaan-ọ k'ogbe kpenamkpen."

21 Okenaka, Ittayi ọpọhna ọvaarnọng bẹ́, "Ttatta, k'ose kw'Ọvaar Ibinọkpaabyi orukọ akpen, kọ ọvaarnọng kwaam abir aruk, ibyi kpenamkpen s'achin, ode obo o, ode akpen o, kaam ọtọhmnọng kwọ, mbe mmaan-ọ."

22 Devid oben Ittayi bẹ́, "Tte ode minna kẹ. China ororo k'ozenga." Minna kw'Ittayi nwo kw'ofon Gat obin ozenga ọmaana ajinọng pẹ maphyir, ọttara isọhmmọr s'iwa ining imaan-ẹ.

23 Wa anọng maphyir abhomọ amọng k'ẹrọng k'ose kw'maze anọng mbo maphyir ch'mad-azenga akpan nya. Ọvaarnọng ozenga ojeka Ilokodo s'Kidrọn, anọng mbo maphyir mabir mazenga achina z'ẹbhaakẹ ch'anọng nna arukọ.

24 Wa Zadọk ọttar ny'ozenga nwo. Anọng p'Lẹvi maphyir p'ad-atinẹ Ẹkkọhbhọ ch'Echekẹ ch'Ibinọkpaabyi mabir aninga nya amaan-ẹ. Masaka Ẹkkọhbhọ ndo ch'Echekẹ k'izek. Abiyata ọfọhnọ nja maa, anọng mbo maphyir makpan obhon nwo, mafona.

25 Nya o, ọvaarnọng oben Zadọk bẹ́, "Tima Ẹkkọhbhọ ndo ch'Echekẹ ch'Ibinọkpaabyi kpa nnam z'ebhondim. Ó̱de ọdaakẹ Ibinọkpaabyi, m'otim-m ọkpa nnam ma, nze Ẹkkọhbhọ nda, ọmaana iruk-byi sẹ. 26 Okenaka, óde obenẹ bẹ́, ‘Ettem kaam kẹdaamẹ ẹmaan-ọ,’ kaam kk'ifor nda. Tte osi-m k'ose kpenamkpen kw'ojibh-ẹ."

27 Ọvaarnọng obir oben Zadọk kw'ode ọfọhn-nja bẹ́, "Odik nwa kọ kọttaan-ẹ o? Tima Ahimaz kw'ode ojinọngnwa kwọ, ọmaana Jonatan kw'ode ojinọngnwa kw'Abiyata, kpa nnam z'obhon. Kọ Zadọk ọmaana Abiyata, màtima ajinọngva afa pabọnga, kpa nnam. 28 Kaam m'nninga z'ibyi s'anọng nna arukọ, za ch'ọraanga ọgbẹr-ọgbẹrẹ maa, ẹkkaabha chọ epyir-m." 29 Minna kw'Zadọk ọmaana Abiyata matim Ẹkkọhbhọ ch'Echekẹ ch'Ibinọkpaabyi akpa nnam z'Jẹrusalẹm, maninga za.

30 Devid ochina ororo k'ozenga kwẹ, ovura egbe ch'Oliv, obubha ọttọhk k'eso, otima abhogbenga, obhom ẹmọng k'ose kw'ọzọhngọ. Anọng maphyir p'ator-ẹ, mabubha ekpo k'eso, mabir abhom amọng atima ayak-ẹ nnam. 31 Itekẹ ipyirẹ Devid bẹ́, "Ahitophẹl ọttar k'anọng p'Absalọm otim ọchọ-ọ ikwu e." Ofona nya, Devid oze njọm bẹ́, "O Ọvaar Ibinọkpaabyi, si ntọhna s'Ahitophẹl ibhakẹ izeng edingẹ-dingẹ."

32 Devid okwu opyirẹ z'ogbeso kw'mad-aninga akpobha Ibinọkpaabyi, Hushai kw'ofon Ark, otima ọnọhma kw'ikk'ọyaaka z'ifọr, ọttara ebonọ z'eso, okebh-ẹ nya. 33 Devid oben-ẹ bẹ́, "Ó̱de ator-m m'ofona, m'ade ẹtọhka anang-m e. 34 Okenaka, óde akpa nnam z'obhon, ad-aben Absalọm bẹ́, ‘O ọvaarnọng, kaam m'nde ọtọhmnọng kwọ. Wa kaam nde ọtọhmnọng kw'atte kwọ. M'ogbe nwa, tte nde ọtọhmnọng kwọ.’ Ó̱de asi minna, kọ m'akkaan-m, afurọ ntọhna s'Ahitophẹl. 35 Zadọk ọmaana Abiyata p'ade afọhn-nja p'Ibinọkpaabyi m'aninga nya amaan-ọ. Gbaak bẹ odik kpenamkpen kw'abhaang z'odimpa. 36 Ahimaz kw'ode ojinọngnwa kw'Zadọk, ọmaana Jonatan kw'ode ojinọngnwa kw'Abiyata maning nya amaana bẹ. Ó̱de abhaang odik kpenamkpen, tọhm bẹ makwu atek-m."

37 Nya o, Hushayi kw'ode oyok-echekẹ kw'Devid, opyirẹ z'Jẹrusalẹm k'ogbe kw'Absalọm od-odim-odim z'obhon.