1 Otum k'ogbe o, ọvaarnọng kw'Ammọn ope. Ojinọngnwa kwẹ kw'okpen Hanun okwu ode ọvaarnọng. 2 Devid oben bẹ́, "Kaam m'nsi ejibha nnang Hanun kw'ode nnwa kw'Nahash, k'ose kw'uwa otte kwẹ osi ejibha ọnang-m." Nya o, ọtọhm anọng bẹ́, mad-afokọ Hanun nttem k'obo kw'otte. K'ogbe kw'anọng p'Devid mapyirẹ z'obhon kw'Ammọn, 3 asonọng p'Ammọn maben ttatta kwabẹ Hanun bẹ́, "Kọ achibhẹ bẹ́, Devid ọnang atte ikpukpobha ch'ọtọhmọ anọng bẹ́, makwu afok-ọ nttem o? Kọ kaze bẹ́, ọtọhm bẹ bẹ́, makwu abaana ebhondim nda, mabir aror nden s'mm'atima akema dẹ yirẹ?" 4 Ofona nya o, Hanun ọbọka anọng mbo p'Devid ọtọhmọ, ogwo bẹ ammaphyabha ẹbhaakẹ danẹ, ọkpaara anọhma pabẹ ny'ottem kw'awọriba, pira nokwubhọ bẹ mafona.

5 K'ogbe kw'uwa matek Devid odik nwa, ọtọhm azeng-eden pẹ bẹ́, makwubh ajinọng mbo k'eden, okurọ ililẹkẹ katam s'manang anọng pẹ. Ọvaarnọng oben bẹ bẹ́, "Màninga z'Jẹriko maa, ammaphyabha pabọnga amen, pira makpa nnam."

6 Ch'anọng p'Ammọn makwu azonga bẹ́, nkk'Devid asa ettem epyibh-ẹ matama-tama, mad-ayaam agbongnọng p'izek nnọhna arọbh afa okwuma ijobh p'afon Aram, z'nkọma s'Bẹt-Rẹhob, ọmaana Zoba, ọttara ọvaarnọng kw'Maaka ọmaana agbongnọng pẹ nnọhna mfa okwuma arọbh ijobh. Mabir ayaam agbongnọng nnọhna ẹrọbh okwuma ijobh p'afon z'ẹkọma ch'Tob.

7 Devid ọbhaang odik nwa nya o, ọtọhm Joab, ọmaana agbongnọng pẹ maphyir. 8 Anọng mbo p'Ammọn mado igbongfor, makwu abe k'ebhumma ch'ebhondim chabẹ. Agbongnọng p'Aram, p'nkọma s'Zoba, ọmaana s'Bẹt-Rẹhob, ọmaana s'Tob, ọttara s'Maaka, maninga kwabẹ z'ẹgba ch'ẹnyọm nya.

9 Joab okwu oze bẹ́, agbongnọng aning-ẹ z'ititika, ọmaana z'nnam-nnam. Ofona nya o, oteka agbongnọng akkọkka banẹ ny'Israẹl bẹ́, makkerẹ ayok mbo p'Aram ichen. 10 Pira nọtọk ayok p'arikẹ ọnang Abishayi kw'ode ọgbaanotte bẹ́, otima orima anọng p'Ammọn. 11 Joab oben Abishayi bẹ́, "Ó̱de anọng p'Aram agaangẹ ayọhng-m, kọ makwu akkaan-m. Okenaka, óde anọng p'Ammọn magaangẹ ayọhng-ọ, kaam m'nkwu nkkaan-ọ. 12 Gaangẹ ifor! Tte mosi erima mach'ajinọng ọnang anọng pamina, ọmaana ibhondim s'Ibinọkpaabyi kwamina. Ọvaar Ibinọkpaabyi m'osi ọttọhk f'ọdaak-ẹ."

13 Minna kw'Joab otim agbongnọng pẹ mad-arima anọng p'Aram ábẹ̀. Anọng p'Aram arọbh arik bẹ nya. 14 K'ogbe kw'anọng p'Ammọn aze bẹ́, anọng p'Aram aning za arọbhọ, bẹ ọdọk, mabir arọbh arik Abishayi nya, machina z'ẹtaanga kw'ebhondim ndo. Nya o, Joab obina za ch'orim anọng p'Ammọn ábẹ̀, okwuna z'Jẹrusalẹm.

15 Ch'anọng p'Aram aze bẹ́, anọng p'Israẹl kk'bẹ akema, mafona mabir ad-atobha ifor sabẹ. 16 Hadadẹzẹr ọd-ọtọka agbongnọng p'Aram, p'aning z'ọraanga okwubha kw'Yupharetes, machina z'Hẹlam. Shobak kw'ode oso kw'agbongnọng p'Hadadẹzẹr, ochi bẹ eden.

17 K'ogbe kw'matek Devid odik nwa, otobha anọng p'Israẹl maphyir otima ojeka ọraanga kw'Jọrdan, ozeng z'Hẹlam. Anọng p'Aram mado igbongfor, mad-arima Devid ábẹ̀. 18 Okenaka, bẹ marọbh arik anọng p'Israẹl nya. Devid ọfhọ bẹ anọng ẹnọhna kwuma arọbh ichi p'ad-ayaar ijaar s'nnyanya id-itor, ọmaana agbongnọng p'izek nnọhna arọbh achen. Obir omuma Shobak kw'ode oso kw'agbongnọng kwabẹ ekpo maa, ope nya. 19 K'ogbe kw'avaar p'aning izek-izek kw'Hadadẹzẹr maze bẹ́, anọng p'Israẹl kk'bẹ akema, makwu asi ẹmẹm amaana anọng p'Israẹl, mabir aninga k'ẹbaabha chabẹ.

Ofona nya o, ojora osi anọng p'Aram bẹ́, mabir ator anọng p'Ammọn egbong.