1 Nya o, mfonamma s'Israẹl maphyir ikwu ikebha Devid z'Hẹbrọn, maben-ẹ bẹ́, "Mina mode anọng pọ oyenẹ. 2 Z'ogbe kw'ikk'ọkpana, ch'iwa Saul ọbaabh mina, kọ wọ uwa ad-atima anọng p'Israẹl eden k'mgbong sabẹ. Ọvaar Ibinọkpaabyi okwu oben-ọ bẹ́, ‘Kọ wọ im'akkerẹ anọng paam Israẹl, abir ade ọvaarnọng kwabẹ.’ "

3 K'ogbe kw'asogbọhkọnọng p'Israẹl maphyir nkk'ọvaar Devid akebha z'Hẹbrọn, Devid ochekẹ ọmaana bẹ z'Hẹbrọn ny'Ọvaar Ibinọkpaabyi k'ititika. Mabyeng-ẹ ana k'eso, masẹ-ẹ ọvaarnọng kw'Israẹl.

4 Wa Devid ode icho ẹrọbh okwuma ijobh k'ogbe kw'masẹ-ẹ ẹvaar, ọbaabha k'icho arọbh afa. 5 Z'Hẹbrọn, wa Devid ọbaabh Juda k'icho ichenọmfa, ọmaana aphe achadanẹ. Z'Jẹrusalẹm, ọbaabha Israẹl kibungọ, ọmaana Juda k'icho ẹrọbh okwuma ijobh kkanttaan.

6 Ọvaar Devid ọmaana anọng pẹ machin z'Jẹrusalẹm bẹ́, mad-arima egbong amaana anọng p'ẹkọma ch'Jebus p'arukọ ny'izek njo. Anọng p'Jebus mabenẹ Devid bẹ́, "M'obhon nwa makpo adim. Akpichennọng ọmaana aphyaak-mkpẹtẹ bẹ-bẹ bọ mm'akwubh-ọ." Wa mad-achibhẹ bẹ́, "Devid ma mokpo odim." 7 Okenaka, Devid ọbọka ifabyi s'Zayọn, kw'ode ebhondim ch'Devid.

8 Ny'ewu ndo, Devid oben bẹ́, "Ọnọng kpenamkpen kw'im'okema anọng p'Jebus, m'ozenga k'okekamma orima aphyaak-mkpẹtẹ mbo, ọmaana akpichennọng p'ade awawunanọng p'Devid. Kẹ wọ osi mad-agbaak ẹzẹmẹ bẹ́, ‘Aphyaak-mkpẹtẹ, ọmaana akpichennọng z'odimpa madim.’ "

9 Minna kw'Devid orukọ ny'ifabyi njo, oyerẹ sẹ bẹ́, Ebhondim ch'Devid. Osi ebhondim ndo ọkọbh-ọkọbha, tọma z'etumọ tima dim ẹtaang-ẹtaanga. 10 Oyena ẹfa ochina ororo okurọ bẹ́, wa Ọvaar Ibinọkpaabyi kw'Ẹfa maphyir, oning ọmaan-ẹ.

11 Hiram kw'ode ọvaarnọng kw'Taya ọtọhm atọhmnọng pẹ z'Devid, matima achikwuma p'echi ch'sida, obir ọtọhm agwọhr-agbaaka, mad-asi odimpa kw'Devid. 12 Nya o, Devid okwu ozonga bẹ́, Ọvaar Ibinọkpaabyi kk'ẹ ọvaarnọng kw'Israẹl ọsa, obir osi ẹkọma chẹ ch'ọbaabh ekpobha, okurọ anọng p'Israẹl.

13 K'ogbe kw'Devid ikk'obina z'Hẹbrọn, ochina ororo oyena ayok-nọng, obir ọtọka panọng k'ọsaabh ny'Jẹrusalẹm, p'mamaan-ẹ ajinọngva, ọttara panọngva. 14 Iva p'uwa obhonọ z'Jẹrusalẹm made Shamua, ọmaana Shobab, ọmaana Natan, ọmaana Sọlọmọn, 15 ọmaana Ibhar, ọmaana Ẹlishua, ọmaana Nẹphẹg, ọmaana Japhia, ọmaana 16 Ẹlishama, ọmaana Ẹliada, ọttara Ẹliphẹlẹt.

17 K'ogbe kw'aPhilistiya mabhaang bẹ́, nkk'Devid ẹvaar ch'Israẹl adibha, bẹ maphyir matima ẹfa abina, mad-aror-ẹ bẹ́, mabọk-ẹ. Devid ọbhaang nya o, obina ochina z'ifabyi. 18 Ny'ogbe nwo, aPhilistiya nkk'akwa anyaama ny'ilokodo s'Rẹphayim maphyir. 19 Minna kw'Devid ọbọbh Ọvaar Ibinọkpaabyi bẹ́, "Ma, nzọhng nd-nrima aPhilistiya ábẹ̀ o? Ma, ina nkema bẹ yirẹ?"

Ọvaar Ibinọkpaabyi ọpọhn-ẹ bẹ́, "Zọhng! K'odik ọkkọkka, kaam m'ntọka aPhilistiya nkọ-ọ k'mbọhk."

20 Minna kw'Devid ochin z'Baal-Pẹrazim, od-okema bẹ za. Oben bẹ́, "K'ose kw'ẹnwanwa ẹd-ẹphaakẹ k'ibyi, minna kw'Ọvaar Ibinọkpaabyi kk'awawunanọng paam ọkpa m'ititika saam." Ofona nya, mayerẹ ibyi njo bẹ́, Baal-Pẹrazim*. 21 Minna kw'aPhilistiya mbo mabin arik akpata pabẹ nya. Devid ọmaana anọng pẹ, matinẹ akpata mbo atima afona.

22 APhilistiya mbo mabir akwu, manyaamẹ ny'ilokodo s'Rẹphayim. 23 K'ogbe kw'Devid ọd-ọbọbh Ọvaar Ibinọkpaabyi, ọpọhn-ẹ bẹ́, "Ọdọk bẹ ititika-ititika kàkwubh. Zenga nnam-nnam, akọbh bẹ ake k'ettem, pira narim bẹ ábẹ̀ ny'ititika kw'nchi s'balsam. 24 K'ose kw'abhubhaanga ntọkọ ch'izeng ny'achiso p'balsam, sẹr-ọsẹr, okurọ bẹ́, noyinẹ bẹ́, Ọvaar Ibinọkpaabyi kk'ọ eden ọcha bẹ́, ọd-ọfhọ agbongnọng p'Philistiya." 25 Minna kw'Devid osi k'ose kw'Ọvaar Ibinọkpaabyi oben-ẹ, ọfhọ aPhilistiya mbo maphyir, tọma z'Geba maa, pyirẹ z'Gẹzẹr.