1 Ny'ogbe nwo, Devid ọbọbh bẹ́, "Ma, ọnọng otim orikẹ ny'ọsọhm kw'Saul, kw'im'mkpo ejibha nsi nnang k'eso ch'Jonatan yirẹ?"

2 Ny'ọsọhm kw'Devid, wa oyen ọtọhmnọng wanẹ kw'Saul kw'okpen Ziba. Kẹ kw'uwa mayerẹ anang Devid. Ọvaar Devid ọbọbh-ẹ bẹ́, "Kọ wọ akpen Ziba?" Ọpọhn-ẹ bẹ́, "Iye, kaam ọtọhmnọng kwọ wọ e."

3 Ọvaarnọng ọbọbh-ẹ bẹ́, "Ma, ọnọng ọdọk ny'ọsọhm kw'Saul korikẹ kw'im'mkpo ejibha ch'Ibinọkpaabyi nkọhka o?" Ziba ọpọhna ọvaarnọng bẹ́, "Ojinọngnwa mawanẹ kw'Jonatan orikẹ nya kw'ọphyakẹ mkpẹtẹ."

4 Ọvaarnọng ọbọbh bẹ́, "Kẹ oyenẹ kẹ?" Ziba ọpọhn-ẹ bẹ́, "Oning z'ọsọhm kw'Makir, kw'ode nnwa kw'Amiyẹl kw'ofon Lo-Deba."

5 Nya o, ọvaar Devid ọtọhm anọng z'Lo-Deba, mad-atọka Mẹphiboshẹt z'ọsọhm kw'Makir, kw'ode nnwa kw'Amiyẹl, achen-ẹ.

6 K'ogbe kw'Mẹphiboshẹt, kw'ode nnwa kw'Jonatan kw'Saul obhonọ, okwu okebh Devid, ọraka eso ọnang-ẹ k'ekpukpobha-maana. Devid oyer-ẹ bẹ́, "Mẹphiboshẹt!" Kẹ ọpọhn-ẹ bẹ́, "Ttatta, kirẹ kaam ọtọhmnọng kwọ ma e."

7 Devid oben-ẹ bẹ́, "Oning-ọ ojor. K'ọkkọkka, kaam m'nsi ejibha nnang-ọ k'eso ch'atte kwọ Jonatan. Kaam m'mbir ntọka izek maphyir s'atte kwọ kwiden kw'ode Saul, nnang-ọ. Kọ min'ad-achi ọttọhk amaan-m k'okpokkoro mawanẹ k'igbe maphyir."

8 Mẹphiboshẹt ọraka eso oben bẹ́, "Kaam ọtọhmnọng kwọ nde anyi, kw'uwura ake ọffabukọ mach'kaam otum o?"

9 Nya o, ọvaarnọng oyerẹ Ziba kw'ode ọtọhmnọng kw'Saul, oben-ẹ bẹ́, "Kaam kk'ọttọhk kpenamkpen f'ode f'Saul kw'ode atte kw'aruk ábẹ̀, ọttara ẹsọhmmọr chẹ, ntọka nnang nnwa kw'nnwa kwẹ. 10 Kọ ọmaana ajinọngva pọ, ọttara atọhmnọng pọ bọ mm'atubh owonọ anang-ẹ, mabir apha ekpo py'owonọ nwo achen-ẹ, ọfha matima akkerẹ nnwa kw'nnwa kw'atte kw'aruk ábẹ̀. Mẹphiboshẹt, kw'ode nnwa kw'nnwa kw'atte kw'aruk ábẹ̀, m'od-ochi ọttọhk ọmaan-m k'igbe maphyir." (Wa Ziba obhonọ ajinọngva ichi, obir oyena atọhmnọng ẹrọbh.)

11 Nya o, Ziba oben ọvaarnọng bẹ́, "Kaam ọtọhmnọng kwọ m'nsi ọttọhk kpenamkpen f'ọvaarnọng kwaam oben-m bẹ́, nsi." Minna kw'Mẹphiboshẹt ochi ọttọhk ọmaana Devid mach'nnwa wanẹ kw'ọvaarnọng.

12 Wa Mẹphiboshẹt obhonọ odikkobhnwa mawanẹ kw'okpen Mika. Anọng p'ẹsọhmmọr ch'Ziba maphyir, mabir ade atọhmnọng p'Mẹphiboshẹt. 13 Minna kw'Mẹphiboshẹt orukọ ny'Jẹrusalẹm, okurọ ch'iwa od-ochi ọttọhk ọmaana ọvaarnọng k'igbe maphyir. Kẹ wa ọpyakẹ mkpẹtẹ.