1 Okwu opyirẹ k'ogbe wanẹ, Devid ọbọbh Ọvaar Ibinọkpaabyi bẹ́, "Ma, mbina nchina k'obhon wanẹ m'Juda o?"

Ọvaar Ibinọkpaabyi ọpọhn-ẹ bẹ́, "Zọhng e!"

Devid ọbọbh-ẹ bẹ́, "M'nchina men?"

Ọvaar Ibinọkpaabyi ọpọhn-ẹ bẹ́, "China z'Hẹbrọn."

2 Minna kw'Devid obin ozeng za, otima panọng pẹ afa kw'ode Ahinoam kw'ofon Jẹzrẹl, ọmaana Abigẹl kw'ode opokwa kw'Nabal kw'ofon Kaamẹl. 3 Devid obir otima ajinọng p'uwa aning amaan-ẹ maphyir ttara isọhmmọr sabẹ, mad-asi oruk kwabẹ z'ibhon s'ining z'Hẹbrọn. 4 Nya kw'uwa anọng p'Juda makebh Devid, mabyeng-ẹ ana k'eso, masẹ-ẹ ọvaarnọng kw'ẹkọma ch'Juda.

Matek Devid bẹ́, "Anọng p'Jabẹsh-Gilead bọ anọhng Saul e." 5 Devid ọtọhm ẹkkaabha ọnang bẹ bẹ́, "Tte Ọvaar Ibinọkpaabyi odo bọnga k'ikpukpobha s'manang Saul, ch'manọhng-ẹ mach'ttatta kwabọnga. 6 Tte Ọvaar Ibinọkpaabyi osi ọphyaam ọnang bọnga, obir ọkọhka bọnga ọdaakẹ kwẹ. Kaam m'mbir nsi ọkkọkka nnang bọnga k'ọttọhk f'masi ma. 7 Màgaangẹ ifor, mabir abar nttem! Saul kw'ode ttatta kwabọnga, kk'ọpa. Anọng p'Juda kk'aam ana abyenga k'eso bẹ́, nde ọvaarnọng kwabẹ."

8 M'ogbe nwa, wa Abnẹr kw'ode nnwa kw'Nẹr wọ ode oso kw'agbongnọng p'Saul. Kẹ wọ uwa ọtọk Ish-Boshẹt kw'ode nnwa kw'Saul, otima ochina z'Mahanayim, 9 ọsẹ-ẹ ọvaarnọng kw'ọbaabh Gilead, ọmaana Ashur, ọmaana Jẹzrẹl, ọmaana Ephraim, ọmaana Bẹnjamin, ọttara ẹkọma ch'Israẹl maphyir.

10 Wa Ish-Boshẹt kw'ode nnwa kw'Saul ode icho arọbh afa ch'ọtọm ẹbaabha ch'Israẹl. Wa ọbaabh bẹ k'icho ifa. Okenaka, wa efona ch'Juda etor ẹkaan ch'Devid. 11 Wa Devid orukọ ny'Hẹbrọn ọbaabha efona ch'Juda k'icho ichenọmfa ọmaana aphe achadanẹ.

12 Abnẹr nnwa kw'Nẹr, ọmaana ajinọng p'Ish-Boshẹt nnwa kw'Saul, mabina ny'Mahanayim machina z'Gibeọn. 13 Joab kw'ode nnwa kw'Zeruya ọmaana ajinọng p'Devid, mabina ad-akebha bẹ z'esipe ch'Gibeọn. Ẹkaan danẹ eninga ẹwọr k'ẹbhaakẹ danẹ ch'esipe ndo, ẹkaan ndoza eninga z'ẹbhaakẹ ndoza ch'esipe ndo.

14 Abnẹr oben Joab bẹ́, "Tte ajinọngva banẹ pamina abina ayoma ayok mbọhk m'amina k'ititika." Joab ọpọhna bẹ́, "Ojibh-ojibh! Tte mabina asi minna."

15 Minna kw'mabin, mabhik anọng ijobh kkamfa p'Bẹnjamin, ọmaana p'Ish-Boshẹt, nnwa kw'Saul. Mabir abhik anọng ijobh kkamfa p'Devid. 16 Nya o, ọnọng-ọnọng obina, ọbọka orima-nọng kwẹ ny'eso, okwum-ẹ ọmaananwa ny'ọbhọribom, matọn atto nya, mape. Ofona nya, mayerẹ ibyi njo s'ining ny'Gibeọn bẹ́, Helkat Hazurim*.

17 Ny'ewu ndo, egbong ẹkọmọ mawuriji maa, Devid okema Abnẹr ọmaana anọng p'Israẹl.

18 Wa iva attaan p'Zeruya p'ade Joab, ọmaana Abishayi ọmaana Asahẹl maning nya. Asahẹl wa ogwengẹ mach'otenwurọ. 19 Asahẹl okwubh Abnẹr itọhngayong. 20 Abnẹr ọbhakẹ nnam ọbọbh Asahẹl bẹ́, "Asahẹl kọ wọ o?"

Asahẹl ọpọhn-ẹ bẹ́, "Iye, kaam wọ e."

21 Minna kw'Abnẹr oben-ẹ bẹ́, "Bhakẹ kkerẹ odimbọhk, wanẹma, obhurubọhk, abọka ojinọngnwa wanẹ anẹ-ẹ egbongkpo pyẹ." Asahẹl ochina ororo okwubh-ẹ mach'okwubhọ nya.

22 Abnẹr obir oben Asahẹl bẹ́, "Ọdọk kaam kakwubh. Kaam kìnnorọ bẹ́, mfhọ-ọ. Ḿfhọ-ọ nya, yen kw'im'nzenga nkkerẹ agbaanatte Joab k'ititika?"

23 Asahẹl kocher bẹ́, ọkpọka Abnẹr okwukwubh. Minna kw'Abnẹr okwum-ẹ ọkọhn ny'ẹbhọr oyin z'nnam. Asahẹl otto, ope ny'eninga ndo. Ọnọng kpenamkpen kw'opyirẹ nya ch'Asahẹl ope oyima, obe nya oze.

24 Joab ọmaana Abishayi makwubh Abnẹr. K'ogbe kw'ewu min'ẹsa, mapyirẹ z'egbe ch'Amma ch'ẹnyọm Giya ny'eden ch'ibyi s'anọng nna arukọ z'Gibeọn. 25 Minna kw'ajinọng p'Bẹnjamin magbak amaana Abnẹr, mabina k'ẹrọng mach'ẹkaan madanẹ, mabe k'ogbeso wanẹ.

26 Abnẹr okwu oyerẹ Joab oben-ẹ bẹ́, "Ma, kwuna egbong nda m'erima ttattampe o? Ma, kọ kazong bẹ́, ẹkpọka ch'egbong nda m'ekem epyibha o? Ogbe m'obhir otuma yen pira aben anọng pọ bẹ́, makpọka ivotte okwukwubh?"

27 Joab ọpọhna bẹ́, "K'ose kw'Ibinọkpaabyi orukọ akpen, wura ina ẹmọng asi, wura ajinọng mbo achin ororo akwubh ivotte maa, opyirẹ ophyinẹ k'ekpebha."

28 Ofona nya, Joab oje enyisa, ajinọng mbo maphyir makpọka anọng p'Israẹl okwukwubh, mabir akpọka egbong oririma.

29 Ny'orungiwu nwo maphyir, Abnẹr ọmaana anọng pẹ mazenga ny'Araba, majeka ọraanga kw'Jọrdan, mazenga achina ororo ny'ekpebha maa, mapyirẹ Mahanayim.

30 Minna kw'Joab nọkpọk Abnẹr okwukwubh, otobha agbongnọng maphyir. Wa agbongnọng p'Devid anọng osowanẹ kw'ẹrọbh adim-odimẹ, agbaarẹ Asahẹl abharẹ. 31 Okenaka, wa agbongnọng p'Devid kk'anọng p'Bẹnjamin arọbh ichi kkanttaan okwuma ichi p'aning amaana Abnẹr, afha. 32 Matọka Asahẹl anọhnga z'epekwuk ch'otte, z'Bẹtẹlẹhẹm. Minna kw'Joab ọmaana anọng pẹ mazeng ny'orungiwu nwo kibungọ maa, mapyirẹ Hẹbrọn k'owusobha.