1 K'ogbe kw'Devid ikk'ogbeso nwo ọkpana makarẹ, okebha Ziba kw'ode ọtọhmnọng kw'Mẹlphiboshẹt ch'obe nya otik-ẹ. Wa kẹ kk'abrẹd-duk arọbh ijobh, ọmaana ogbogbokwa arọbh achen f'matim grep p'agwu-ogwu asi, ọmaana ogbogbokwa arọbh achen f'matim fig asi, ọttara etuk-kpa ch'matim etenkpa asi, ọtọka ọdabh z'nnyanya bẹ́, itọhka.

2 Ọvaarnọng ọbọbh Ziba bẹ́, "Atim ekpo mbyoma akwu mbọng o?"

Ziba ọpọhn-ẹ bẹ́, "Nnyanya ide s'ẹsọhmmọr ch'ọvaarnọng min'ẹyaar, abrẹd ọmaana achiduk ade p'anọng m'achi, atuk ade p'mm'asi ifor iphyabha ọnọng kpenamkpen kw'ikk'ẹ ọkọhna z'ibyi s'anọng nna arukọ."

3 Ọvaarnọng ọbọbh-ẹ bẹ́, "Nnwa kw'nnwa kw'atte kẹ o?"

Ziba ọpọhn-ẹ bẹ́, "Oning z'Jẹrusalẹm e, okurọ ch'ochibhẹ bẹ́, menda anọng p'Israẹl m'atte ẹvaar ch'atte kwaam kwiden ọbọhk, anang-m."

4 Ọvaarnọng oben Ziba bẹ́, "Ọttọhk kpenamkpen f'Mẹphiboshẹt oyen, node fọ."

Ziba oben bẹ́, "Ttatta kwaam, nrak eso k'ikpukpobha nnang-ọ. Tte ttatta kwaam, kw'obir ode ọvaarnọng kwaam, osi ọphyaam ọnang-m."

5 K'ogbe kw'ọvaar Devid kk'ozenga ọnyọma Bahurim, ojinọng wanẹ kw'obir ode efona ch'Saul, oyin nya. Wa ojinọng nwo okpen Shimeyi, kw'ode nnwa kw'Gera. Minna kw'ọlọhk-ẹ mach'ọlọhk-ẹ nya. 6 Shimeyi ọd-ọtọhbh Devid ọmaana atọhmnọng pẹ ata. Ode ch'agbongnọng p'Devid ọttara anọng p'nd-akker-ẹ nkk'Devid aba z'odimbọhk ọmaana z'obhurubọhk. 7 K'ose kw'ọd-ọlọhk-ẹ, od-oben-ẹ bẹ́, "Bina m'ibyi nja! Yin z'iyaan! Kọ ọfhọ-anọng nwa. Obyibyanọng mach'ikọ! 8 Irem s'Ọvaar Ibinọkpaabyi ọnang-ọ, kk'anọng maphyir p'afhọ ny'ẹsọhmmọr ch'Saul jọ nya. Ọvaar Ibinọkpaabyi kk'ẹvaar ndo ch'atọk z'Saul k'mbọhk, ọtọka ọnang nnwa kwọ Absalọm. M'aze irem okurọ anọng mbo p'afhọ!"

9 Nya o, Abishayi kw'ode nnwa kw'Zeruya oben ọvaarnọng bẹ́, "Kayen kw'ọffabukọ nwa im'ọlọhkọ ọvaarnọng kwaam o? Tte nzọhng nd-mpẹ-ẹ eso."

10 Okenaka, ọvaarnọng oben bẹ́, "Bọng-ọttọhk vọ ọmyẹ bọnga iva p'Zeruya o? Ó̱de ọlọhk-m okurọ ch'Ọvaar Ibinọkpaabyi ikk'ẹ obena bẹ́, ‘Lọhkọ Devid,’ anyi wọ oyen ẹfa ch'im'otima ọbọbh-ẹ bẹ́, ‘Osempira asi minna?’ "

11 Devid oben Abishayi ọmaana atọhmnọng pẹ maphyir bẹ́, "Nnwa kwaam oyenẹ kw'mbhonọ, obir ode izẹ saam, ọkamẹ za bẹ́, ọfhọ-m. Ọnọng nwa kw'oter ofona ẹkọma ch'Bẹnjamin, kẹ wọ im'oyobh-m o? Màttẹ-ẹ ọbọhk ọlọhk-m e, okurọ bẹ́, Ọvaar Ibinọkpaabyi kk'ẹ obena bẹ́, osi minna. 12 Ṉ́nòsi Ọvaar Ibinọkpaabyi m'oze irem saam, otima ejibha otuk-m, obir ọnang-m ẹda ch'ochekẹ k'ẹlọhkọ nda ch'menda."

13 Minna kw'Devid ọmaana anọng pẹ machin ororo k'ozenga kwabẹ. Shimeyi ozenga z'ẹbhaakẹ ndoza ch'egbe, ọlọhkọ Devid k'ose kw'od-ozenga nya, ọbhar-ẹ ata, ọttara ẹbanga. 14 Ọvaarnọng ọmaana anọng p'ator-ẹ maphyir, mapyirẹ k'ibyi s'makamẹ ch'ikk'bẹ ọkọhna. Ọvaarnọng okwoka ọwọhng ny'ibyi njo.

15 M'ogbe nwa, Absalọm ọmaana anọng p'Israẹl maphyir makwu z'Jẹrusalẹm. Ahitophẹl obir oninga nya ọmaan-ẹ. 16 Nya o, oyok-echekẹ kw'Devid kw'okpen Hushayi kw'ofon Ark, od-okebha Absalọm, oben-ẹ bẹ́, "Tte ọvaarnọng oruk akpen p'adum-odum! Tte ọvaarnọng oruk akpen p'adum-odum!"

17 Absalọm ọbọbh Hushayi bẹ́, "Oyinẹ bẹ́, ọdaakẹ kw'akọhk oyok-odikkobh wọ ma o? Ó̱de ode oyok-odikkobh kwọ, osempira kẹ katorọ m'afona?"

18 Hushayi ọpọhna Absalọm bẹ́, "Mma e, kaam m'nninga mmaana ọnọng nwo kw'Ọvaar Ibinọkpaabyi ikk'oteka, kw'ode nwo kw'anọng mba, ọttara anọng p'Israẹl maphyir matek e. 19 Ágbaarẹ nwonya ajẹ, anyi wọ kw'im'nsi ọtọhm mmaana? Ma, kọbaan bẹ́, nsi ọtọhm nnang nnwa, k'ose kw'uwa nsi nnang otte o? Kọ wọ kw'm'nsi ọtọhm nnang e."

20 Absalọm oben Ahitophẹl bẹ́, "Nang mina ntọhna sọ. Mmin'osi yen?"

21 Ahitophẹl ọpọhn-ẹ bẹ́, "Yima maana ayok-nọng p'atte ofon orik bẹ́, makkerẹ odimpa. Ási minna, ọnọng kpenamkpen kw'ọbhaang odik nwo, m'ọtọka bẹ́, nabọkọ atte idik matamatama. M'ofona nya, anọng p'ator-ọ mado abe mawuriji." 22 Minna kw'mattim ikkira z'ipubhaang anang Absalọm. Oninga nya oyima ayok-nọng p'otte ábẹ̀, ny'ititika s'anọng p'Israẹl maphyir.

23 Wa ny'ogbe nwo, ntọhna s'Ahitophẹl ide mach'ntọhna s'ọnọng kw'ọd-ọbhaanga odik z'Ibinọkpaabyi k'ẹmma. Minna kw'uwa Devid ọmaana Absalọm nd-atọka ntọhna s'Ahitophẹl.