1 Ahitophẹl oben Absalọm bẹ́, "Tte nteka ajinọng nnọhna ẹrọbh okwuma ijobh, ntima nd-nkwubh Devid m'erungọ nda. 2 Kaam m'nd-nrim-ẹ ábẹ̀ ma ch'ikk'ẹ ọkọhna, ẹfa ebir ẹsẹ-ẹ. M'nrim-ẹ ábẹ̀, nkk'ẹ ojora fiden, mfha anọng p'mator-ẹ maphyir marọbh arik-ẹ. Pira mfhọ ọvaarnọng kẹ-kẹ, 3 ntima anọng mboza maphyir nchen-ọ. Ó̱de ọnọng nwo kw'akamẹ ope, anọng mboza maphyir, ọttọhk bẹ mòsi." 4 Wa ntọhna nja, ikwu vẹma Absalọm ọmaana asogbọhkọnọng p'Israẹl maphyir.

5 Absalọm oben bẹ́, "Màyerẹ Hushayi kw'ofon Ark nang-m, mfha mobir ọbhaanga odik kw'ikẹ m'ọgbaak." 6 Hushayi opyirẹ nya o, Absalọm oben-ẹ bẹ́, "Kirẹ ntọhna s'Ahitophẹl ọnang mina e. Ma, mosi k'ose kw'obenẹ o? Ini minna ode, gbaak mina ochibhẹ kwọ."

7 Hushayi ọpọhna Absalọm bẹ́, "Ntọhna s'Ahitophẹl ọnang-ọ mẹkpanda, kijibhẹ. 8 Kọ azong ma bẹ́, atte ọmaana anọng pẹ, made arimanọng, mabir akkaam mach'eche ch'ọnọng ọnẹ-ẹ iva pẹ. Atte kwọ ọdọk, obira ode ọnọng kw'ozong akkona p'egbong. Mòchera bẹ́, oyima ọmaana agbongnọng pẹ m'erungọ nda. 9 Ch'nd-ọgbaak ma, ńnòsi otubh z'ọtakpamma wanẹ, wanẹma, oning k'ibyi janẹ za. Ó̱de ocheden orima agbongnọng pọ ábẹ̀, ọnọng kpenamkpen kw'ọbhaang odik nwo, m'oben bẹ́, ‘Maning za apekẹ agbongnọng p'atorọ Absalọm e.’ 10 M'ọwọhkọ zaabẹ́, okkikkaama oke ettemkira ch'eche, ojora m'ọbọk-ẹ, okurọ bẹ́, anọng p'Israẹl maphyir azong atte kwọ mach'orimanọng kwiden, mabir azonga anọng p'ator-ẹ mach'akkikkaama.

11 "Nya o, ntọhna saam ide bẹ́, tobha anọng p'Israẹl maphyir, tọma z'ẹkọma ch'Dan maa, pyirẹ z'ẹkọma ch'Beershẹba. Tte masaabh mach'ofong kw'ẹraangaka. Íkk'asa minna, kọ oyenẹ chi bẹ eden k'egbong. 12 Ibyi kpenamkpen s'mokebh-ẹ, mm'obubh-ẹ ny'ifor mach'ifọhng ibubh izek, morim-ẹ ábẹ̀. Kẹ ọttara ojinọng kwẹ mawanẹ kw'm'oruk akpen kode. 13 Ó̱de ọrọbhọ odim k'obhon, anọng p'Israẹl matima ndik adim ny'obhon nwo, matọr ntumọ s'ọbaaka kw'obhon nwo ajẹ z'ilokodo, ẹta madanẹ-danẹ mèrik."

14 Nya o, Absalọm ọmaana anọng p'Israẹl maphyir maben bẹ́, "Ntọhna s'Hushayi kw'ofon Ark, ijibhẹ iyọhnga s'Ahitophẹl." Wa Ọvaar Ibinọkpaabyi osi bẹ́, ntọhna ọkkọkka s'Ahitophẹl ọnangẹ, inìng k'eden iyinẹ ọfha otima osi Absalọm itama.

15 Hushayi otek Zadọk ọmaana Abiyata p'ade afọhn-nja p'Ibinọkpaabyi bẹ́, "Ahitophẹl kk'Absalọm, ọmaana asogbọhkọnọng p'Israẹl ntọhna ọnanga k'ose kw'mm'asi. Okenaka, kaam kk'bẹ ntọhna ọdọk-ọdọk nnanga. 16 Màtọhm ẹkkaabha ẹbhar-ẹbhar chena Devid bẹ́, ‘Ewu enìng-ọ esobh nya ch'asi agbẹr-ọgbẹrẹ ny'ibyi s'anọng nna arukọ. Jeka z'okwubha, ini minna ode, ọvaarnọng ọmaana anọng p'aning amaan-ẹ maphyir, mm'ape.’ "

17 Wa Jonatan ọmaana Ahimaz, mad-aninga z'ekeka ch'Ẹn-Rogẹl. Ominanwa wanẹ od-okwu otek bẹ idik, mfha bẹ mabira atek ọvaar Devid, okurọ ch'ojor bẹ bẹ́, óde mádimẹ z'obhon, anọng m'aze bẹ. 18 Okenaka, ewu danẹ, odikkobhnwa wanẹ oze bẹ, od-otek Absalọm. Minna kw'Jonatan ọmaana Ahimaz masẹr-ọsẹr machina k'ọsọhm kw'atte wanẹ z'Bahurim. Mad-atubha z'esipe ẹtaanga ch'atte nwo otumọ ny'ikẹ k'oter. 19 Kwanọng kw'atte nwo otima obhurukpa obubha ẹmma ch'esipe ndo maphyir, ọyaan agwu nya. Ọnọng kw'ozong bẹ́, anọng atubh nya kode.

20 K'ogbe kw'ajinọng p'Absalọm makwu akebha kwanọng nwo ny'ọsọhm nwo, mabọbh-ẹ bẹ́, "Jonatan ọmaana Ahimaz kẹ?"

Kwanọng nwo ọpọhna bẹ bẹ́, "Nkk'ekeka ajeka e." Ajinọng mbo magbọngọ ọsọhm maphyir, m'bẹ kaze. Ofona nya, makpa nnam z'Jẹrusalẹm.

21 Ajinọng mbo afon nya o, Jonatan ọmaana Ahimaz, mabina z'esipe ndo, mayin k'iyaan. Mafona mad-aben ọvaar Devid bẹ́, "Bina ẹbhar-ẹbhar mad-ajeka ọraanga makpaar! Kirẹ Ahitophẹl kk'ntọhna ọnanga k'ose kw'mm'abọk-ọ." 22 Ewu esobh nya, Devid ọmaana anọng p'ator-ẹ maphyir mabina, majeka ọraanga kw'Jọrdan, ọnọng mawanẹ-wanẹ korikẹ.

23 K'ogbe kw'Ahitophẹl oze bẹ́, m'ntọhna sẹ katọk, ovura k'ẹnyanya chẹ, ọbhana z'obhon kwẹ. Opyirẹ za o, otobha ọsọhm kwẹ maphyir, od-orena edik, ope. Manọhng-ẹ z'epekwuk ch'otte.

24 Devid ozenga ochina z'obhon kw'okpen Mahanayim. Absalọm ọmaana ajinọng p'Israẹl maphyir majeka ọraanga kw'Jọrdan. 25 Wa Absalọm, kk'eninga ch'Joab kw'ode oso kw'agbongnọng ọtọka ọnang Amasa. Amasa ode nnwa kw'Jeter*, kw'ofon k'ẹsọhmmọr ch'Ishmayẹl. Ọkka kwẹ ode Abigẹl, kw'ode nnwa kw'Nahash, ọgbaanọkka kw'Zeruya kw'ọmaanẹ Joab. 26 Wa Absalọm ọmaana agbongnọng p'Israẹl mabhingẹ z'obhon kw'Gilead.

27 K'ogbe kw'Devid opyirẹ z'Mahanayim, Shobi kw'ode nnwa kw'Nahash kw'ofon z'Raba, z'ẹkọma ch'Ammọn, ọmaana Makir kw'ode nnwa kw'Amiyẹl kw'ofon z'Lo-Deba, ọttara Bazilayi kw'ofon Gilead, z'ẹkọma ch'Rogẹlim, makkaan-ẹ. 28 Matima eyimakpo, ọmaana agbobhmbọhk, ọmaana ọzọhka, ọmaana wit, ọmaana barli, ọmaana agwubuma, ọmaana agwu p'nkk'abhaabha, ọmaana ngigirẹ k'akira k'akira, 29 ọmaana akọhnsi, ọmaana arọkimaan, ọttara ẹchakpo py'matim abasi p'ẹbhaam asi, matọka anang Devid ọmaana anọng p'ator-ẹ. Maben bẹ́, "Anọng mba kk'amọma z'ifor mawuriji, okwo ọkaama bẹ, asi abira adaak bẹ m'ibyi s'anọng nna arukọ."