1 Wa okikọhra wanẹ oning nya kw'okpen Shẹba, nnwa kw'Bikiri kw'ofon ẹkọma ch'Bẹnjamin. Ọtọk enyisa oje, ọkwọhrọ k'ẹrọng bẹ́,

"M'okebh ny'oyena kw'Devid koyen,

ọttọhk f'obira omyẹ mina ny'nnwa kw'Jẹsẹ kode!

Israẹl o, ọnọng-ọnọng ochina z'ọsọhm kwẹ e!"

2 Minna kw'anọng p'Israẹl maphyir mabhumọ Devid, mator Shẹba kw'ode nnwa kw'Bikiri. Anọng p'Juda mator ọvaarnọng kwabẹ tọma z'ọraanga kw'Jọrdan maa, pyirẹ z'Jẹrusalẹm.

3 Devid opyirẹ ny'odimpa kwẹ ny'Jẹrusalẹm, ọtọka ayok-nọng mbo pẹ ijobh p'uwa ọgbaar odimkpa, otima bẹ ochina z'ọsọhm kw'mad-akker-okkerẹ. Ọnang bẹ ọttọhk kpenamkpen f'marorọ. Okenaka, bẹ koyim ọmaana. Wa masokọ bẹ k'ọsọhm kw'nna k'iyaan makpo ayin, maruk mach'apokwa maa, opyirẹ k'ebo-wu chabẹ.

4 Nya o, ọvaarnọng oyerẹ Amasa oben-ẹ bẹ́, "Tima iwu ittaan, yerẹ ajinọng p'Juda, ọttara kọ oyenẹ makwu aze-m." 5 K'ogbe kw'Amasa ofon bẹ́, od-oyerẹ anọng p'Juda, okponga za maa, ọkpan ogbe kw'ọvaarnọng ọkẹ-ẹ bẹ́, ọkpa nnam.

6 Nya o, Devid oben Abishayi bẹ́, "Ó̱de nna ifor samina okkerẹ, Shẹba kw'ode nnwa kw'Bikiri m'osi mina itama s'iyọhng s'Absalọm osi mina e. Tọka akkikkaama p'atte kwọ atima kwubh-ẹ. Ini minna ode, m'odim k'ibhondim s'ide ifabyi, ọnaanga mina." 7 Minna kw'ajinọng p'Joab, ọmaana anọng p'ẹkọma ch'Kẹrẹt, ọmaana ch'Pẹlẹt, ọttara akkikkaama maphyir mabin, Abishayi ochi bẹ eden, matọma ny'Jẹrusalẹm akwubh Shẹba, nnwa kw'Bikiri.

8 K'ogbe kw'nkk'apyira ny'ẹtakpa chiden ch'ening ny'Gibeọn o, Amasa okwu okebha bẹ nya. Ny'ogbe nwo, wa Joab ọfọr egbongkpo, ọkpa ọmaananwa kw'oyik k'ọpa ny'ikẹ k'erin. K'ose kw'ozeng ọnyọma Amasa z'ifor, ọmaananwa kwẹ ọrọhbha ny'ọpa, otto.

9 Joab oben Amasa bẹ́, "Agbaanatte kwaam, ọsọ-ọ yen?" Pira Joab otima odimbọhk ọbọka Amasa ny'ammaphyabha bẹ́, ọbaak-ẹ. 10 Ny'ogbe nwo, Amasa otum koke bẹ́, Joab otim ọmaananwa ny'ọbọhk. Minna kw'Joab okwum-ẹ ogbe mawanẹ ny'ẹbhọr, abhọrọ ayin atto ny'izek, Amasa ope, chibhẹ ch'ina kẹ igbedim ifa akwumọ. Joab ọmaana ọgbaanotte Abishayi, machina ororo akwubh Shẹba kw'ode nnwa kw'Bikiri.

11 Ogbongnọng wanẹ kw'Joab obe otuma oforbukọ kw'Amasa, oben bẹ́, "Ọnọng kpenamkpen kw'obe k'Joab, ọmaana k'Devid, tte otor Joab!" 12 Amasa oyima ny'azẹ pẹ ny'edenttem. Ọnọng kpenamkpen kw'opyirẹ nya, obe nya. K'ogbe kw'oze bẹ́, ọnọng kpenamkpen kw'opyirẹ nya od-obe, minna kw'ọtọrọ Amasa otima odim ny'owonọ wanẹ, obubh-ẹ ibara. 13 Ch'nkk'Amasa atina ny'eden o, ogbongnọng kpenamkpen otor Joab makwubh Shẹba, nnwa kw'Bikiri.

14 Shẹba ozenga ny'nkọma s'Israẹl maphyir ochina z'Abẹl-Bẹt-Maka. Obira ozenga ọkọbha ẹbhaakẹ ch'anọng p'Bikiri maphyir. Anọng p'obhon nwo, madanga ator-ẹ. 15 Minna kw'agbongnọng p'Joab maphyir makwu akọbha Shẹba ake k'ettem z'Abẹl-Bẹt-Maka. Masi abhukakpa ny'nnam-nnam kw'ntumọ s'ọbaaka kw'obhon nwo. Ch'mad-akonga bẹ́, mavọhkọ ntumọ njo, itto k'izek, 16 odikzonga-kwanọng wanẹ oyin ny'obhon, ọkwọhrọ k'ẹrọng bẹ́, "Màyonga itọhng e! Màben Joab okwu ma, ọfha mgbaak-ẹ odik." 17 Joab ozenga okebh-ẹ za. Kwanọng nwo ọbọbh-ẹ bẹ́, "Kọ wọ akpen Joab o?"

Ọpọhna bẹ́, "Iye, kaam wọ."

Kwanọng nwo oben-ẹ bẹ́, "Yong itọhng k'odik kw'ọtọhmnọng kwọ m'ọgbaak."

Joab oben-ẹ bẹ́, "Nyong-ọ itọhng ka."

18 Kwanọng nwo oben-ẹ bẹ́, "Wa mad-aben ẹtama bẹ́, ‘Zọhng tọka ntọhna z'Abẹl’, minna kw'odik nwo m'oyena eso. 19 Mina mode anọng p'ayen ẹmem, mobir okpobha ẹvaar ch'Israẹl. Bọnga mad-akam bẹ́, makibhẹ ọmmaanabhon kw'Israẹl. Kayen kw'nd-aben bẹ́, madimẹ obhon kw'Ọvaar Ibinọkpaabyi o?"

20 Joab ọpọhn-ẹ bẹ́, "Tcha! Minna mode. Kaam azang m'nkibhẹ, kaam azang m'ndimẹ! 21 Odik oyenẹ azang nya e. Ojinọng wanẹ oning m'obhon nwa kw'okpen Shẹba, nnwa kw'Bikiri kw'ofon ẹkọma ch'agbe, z'Ephraim. Kẹ wọ ọmyan ẹvaar ch'Devid. Tọka ọnọng nwo kẹ-kẹ nang-m, kaam m'ntte ebhondim nda ọbọhk."

Kwanọng nwo oben Joab bẹ́, "Mm'azenga ny'etumọ abharẹ eso chẹ anang-ọ."

22 Kwanọng nwo o, otima ntọhna njo sẹ ọkkọkka okebha anọng maphyir za. Mabọka Shẹba kw'ode nnwa kw'Bikiri, mape eso, mabharẹ chẹ anang Joab. Minna kw'Joab oje enyisa, agbongnọng pẹ maphyir mabina arik ebhondim ndo, ọnọng-ọnọng ọbhana z'obhon kwẹ. Joab ọkpa nnam okebha ọvaarnọng z'Jẹrusalẹm.

23 Joab wọ uwa ode oso kw'agbongnọng p'Israẹl maphyir. Bẹnaya kw'ode nnwa kw'Jehoyada, ode oso kw'anọng p'ẹkọma ch'Kẹrẹt ọmaana ch'Pẹlẹt. 24 Adoniram wọ uwa od-okkerẹ anọng p'ad-asi atọhm-gbọhka. Jẹhosaphat kw'ode nnwa kw'Ahilud, ode ọkkẹrẹ kw'idik s'ikk'iyina, 25 Sheva ode ọkkẹrẹ. Zadọk ọmaana Abiyata, made afọhn-nja p'Ibinọkpaabyi. 26 Ira kw'ofon Jair ode ọfọhn-nja kw'Devid.