1 Otum k'ogbe o, Devid okema aPhilistiya maa, m'ọdọk eso kakpo age. Ọrọhbha obhon kw'Mẹtẹg-Amma z'mbọhk s'aPhilistiya.

2 Devid obir okema anọng p'Moab. Osi bẹ mayima z'izek, pira notim edik oyoma bẹ. K'anọng attaan kpenamkpen p'oyom, ọfhọ anọng afa, orik ọnọng mawanẹ. Minna kw'uwa anọng p'Moab p'arikẹ makwu ade abira p'Devid, mabir ad-anang-ẹ ntuma.

3 Ọnọng kw'uwa Devid obir okema ode Hadadẹzẹr kw'ode ojinọngnwa kw'Rehob, ọvaarnọng kw'Zoba. Wa okem-ẹ k'ogbe kw'ofon bẹ́, obir od-osi ẹfa chẹ ẹnwọhnga z'ọraanga kw'Yupharetes. 4 Devid ọnẹ-ẹ ijaar s'nnyanya id-itọr nnọhna nna okwuma arọbh achen, obir ọnẹ-ẹ anọng p'ad-ayaar ijaar njo nnọhna arọbh afa okwuma ijobh, ọmaana agbongnọng p'izek. Ọphyakẹ mmo s'nnyanya njo maphyir s'id-iyaar ijaar njo, orik nnyanya arọbh achen.

5 K'ogbe kw'anọng p'Aram p'afon Damaskọs akwu akkaana ọvaar Hadadẹzẹr kw'Zoba, Devid ọfhọ anọng nnọhna arọbh afa okwuma ichi. 6 Wa Devid obir osok ekwurọ danẹ ch'asoja z'Aram kw'oning z'ẹkọma ch'Damaskọs. Anọng p'Aram nnakwu ade atọhmnọng pẹ, mad-anang-ẹ ntuma. Wa Ọvaar Ibinọkpaabyi ọnang Devid ekema k'ibyi kpenamkpen s'ochin.

7 Devid ọtọka agbongtekgba p'gol p'asonọng p'Hadadẹzẹr, otima okwuna z'Jẹrusalẹm. 8 Obir ọtọka bronz k'ọsaabh z'Teba ọmaana Bẹrotai kw'ode ibhon s'Hadadẹzẹr ọbaabh.

9 K'ogbe kw'Toi kw'ode ọvaarnọng kw'Hamat ọbhaang bẹ́, Devid kk'asoja p'Hadadẹzẹr okema maphyir, 10 Toi ọtọhm Joram kw'ode ojinọngnwa kwẹ bẹ́, od-ozima ọvaar Devid, okurọ ch'okem Hadadẹzẹr k'egbong. Wa Hadadẹzẹr kk'egbong obir od-orima ọmaana Toi. Joram otima ekpo py'matim silva, ọmaana gol, ọttara brons asi, ochena Devid.

11 Wa ọvaar Devid otte nnanga nja ọbọhk ọnang Ọvaar Ibinọkpaabyi, k'ose kw'ikk'ọsa ọmaana silva ọmaana gol p'uwa ọtọk z'nkọma maphyir s'ikk'okema, 12 s'ide ẹkọma ch'Edom, ọmaana ch'Moab, ọmaana ch'Ammọn, ọmaana ch'Philistiya, ọttara ch'Amalẹk. Wa obir ọnang Ọvaar Ibinọkpaabyi ekpo py'ọna Hadadẹzẹr kw'ode nnwa kw'Rehob, ọvaarnọng kw'Zoba.

13 Wa Devid oyinẹ eche ch'okwun egbong ch'ọfhọ anọng p'Edom nnọhna arọbh afa okwuma achen z'ilokodo s'Onung.

14 Wa obir osok ekwurọ ch'asoja ch'ekkerẹ ẹkọma ch'Edom; anọng p'Edom maphyir nnakwu aninga k'ẹbaabha ch'Devid. Ọvaar Ibinọkpaabyi ọnang-ẹ ekema k'ibyi kpenamkpen s'ochin.

15 Wa Devid ọbaabh Israẹl maphyir, ọttọhna aponga p'ator-otor, osi ejibha ọnang anọng pẹ maphyir. 16 Joab kw'ode nnwa kw'Zẹruya wọ uwa ode oso kw'asoja, Jẹhosaphat kw'ode nnwa kw'Ahilud ode ọkkẹrẹ kw'idik s'ikk'iyina, 17 Zadọk kw'ode nnwa kw'Ahitub, ọmaana Ahimẹlẹk kw'ode nnwa kw'Abiyata bọ uwa ade afọhn-nja; Sẹraya ode ọkkẹrẹ. 18 Wa Bẹnaya kw'ode nnwa kw'Jehoyada ọbaabh anọng p'Kẹrẹt ọttara p'Pẹlẹt. Ajinọngva p'Devid made afọhn-nja.