1 Wa Joab kw'ode ojinọngnwa kw'Zeruya ozong-ozonga bẹ́, ọvaarnọng ọdaak-ẹ bẹ́, oze Absalọm. 2 Ofona nya, Joab ọtọhm ọnọng wanẹ z'obhon kw'mayerẹ Tẹkoa bẹ́, ọd-ọtọka kwanọng wanẹ kw'ozong odik otima okwu. Oben kwanọng nwo bẹ́, "Si ifakikona, aninga k'oforpyibha mach'ọnọng ọpọ-ọ. Fọra abarabina. Ana kpenamkpen kàchọkọ. Si mach'kwanọng kw'ifor ipyibh-ẹ opyibh, otima iwu k'ẹkaan obhom ọnọng kw'ọpẹ-ẹ. 3 Ikk'asa minna, china z'ọvaarnọng ad-agbaak-ẹ idik nja s'im'mgbaak-ọ ma." Joab ọtọhn-ẹ ose kw'im'ọgbaak maphyir.

4 K'ogbe kw'kwanọng nwo kw'ofon Tẹkoa opyirẹ za ch'ọvaarnọng oning, otto okwubha ititika ny'izek k'ekpukpobha-maana. Oben bẹ́, "O ọvaarnọng, kkaan-m!"

5 Ọvaarnọng ọbọbh-ẹ bẹ́, "Bọng-ọttọhk vọ ọyak-ọ odik?"

Kwanọng nwo ọpọhn-ẹ bẹ́, "Kaam nde opokwa; odim kwaam kk'ọpa. 6 Kaam ọtọhmnọng kwọ, nyen ajinọngva afa. Wa otto bẹ z'ẹgba, marima ayok ábẹ̀ k'ogbe kw'ọnọng ina ode kw'ọkaang bẹ. Oyok wanẹ obin oyok ọttọhk, ọfhẹ-ẹ. 7 Madidanma, efona chaam kibungọ nẹttaangẹ kaam ọtọhmnọng kwọ. Mad-aben-m bẹ́, ‘Tọka oyok nwo kw'ọfhọ ọgbaanọkka nang mina, mfha mọfhẹ-ẹ, k'eso ch'ọgbaanọkka kwẹ kw'ọfhọ, mfha m'ọchọn-ẹ ebocha.’ Bẹ mmin'adimẹ akpen p'nnwa nwo mawanẹ kw'orikẹ, mfha eche ch'odim kwaam, wanẹma, ẹnọmma chẹ, edimẹ m'iyagbin."

8 Ọvaarnọng oben kwanọng nwo bẹ́, "Zọhng bhana. Kaam m'ntima ẹfa chaam nttọhna odik nwo ojibh ọnang-ọ."

9 Kwanọng nwo kw'ofon Tẹkoa oben ọvaarnọng bẹ́, "Ttatta kwaam, tte epyima ede ch'kaam ọmaana echimma ch'atte kwaam. Tte ọvaarnọng ọmaana ẹvaarkkọhbhọ chẹ, maning epinẹ ayen."

10 Ọvaarnọng oben-ẹ bẹ́, "Ó̱de ọnọng kpenamkpen ọgbaak odiktama ọnang-ọ, kwu tek-m, kwuna m'ọdọk kọ odik mayak."

11 Kwanọng nwo oben bẹ́, "Ó̱de ode minna, tte ọvaarnọng ochekẹ k'eche ch'Ọvaar Ibinọkpaabyi kwẹ bẹ́, m'ọkpa anọng p'ad-akam bẹ́, matuka odik nwo eden, mfha maning izẹ akibhẹ ayọhnga nya, maning ojinọngnwa kwaam afhọ."

Ọvaarnọng oben bẹ́, "K'ose kw'Ọvaar Ibinọkpaabyi orukọ akpen, osisanaanga kw'nnwa kwọ k'izek motto."

12 Nya o, kwanọng nwo oben bẹ́, "Ototo, tte kaam ọtọhmnọng kwọ mgbaak odik mawanẹ nnang ttatta kw'ode ọvaarnọng kwaam."

Ọvaarnọng ọpọhna bẹ́, "Gbaak odik!"

13 Kwanọng nwo oben bẹ́, "Asi yen achibhẹ itamase nja amaana anọng p'Ibinọkpaabyi? Ó̱de ọvaarnọng ọgbaak odikse nwa, ifor sẹ azang s'opyibhẹ aponga nya o? Maa pyirẹ ma, ọvaarnọng nnwa kwẹ kw'obhon okwubhọ otim otima ọkpa nnam. 14 Kwuna mina maphyir mm'ope-ope mach'asi ad-abyenga k'izek, ọnọng ọdọk mòkpo ọkaabha. Okenaka, ọttọhk f'ọdaakẹ Ibinọkpaabyi azang nya; kẹ oter oror eden ch'ọnọng kw'ọrọbh ebira im'ọkpa nnam.

15 "Nya o, nkwu ma bẹ́, ntek ttatta kw'ode ọvaarnọng kwaam idik nja, okurọ bẹ́, anọng mbo kk'aam ojora aka k'ettem. Kaam ọtọhmnọng kwọ nchibhẹ bẹ́, ‘Ó̱de mgbaak ọvaarnọng odik nwa, ńnòsi, ọvaarnọng m'osi ọttọhk f'mphyem-ẹ ọnang-m. 16 Ṉ́nòsi, ọvaarnọng m'ocher-ochera bẹ́, ọrọhbha kaam ọtọhmnọng kwẹ z'mbọhk s'ọnọng kw'ọd-ọkam bẹ́, ọfhọ kaam ọttara nnwa kwaam, ọfha mọgwaana ebocha ch'Ibinọkpaabyi osokọ mina.’

17 "Nya wọ osi, kaam ọtọhmnọng kwọ nchibhẹ bẹ́, ‘Tte ọgbaakadik kw'ttatta kw'ode ọvaarnọng kwaam, ọnang-m ottemdirẹ, okurọ bẹ́, ttatta kw'ode ọvaarnọng kwaam ode mach'ozeng-eden kw'Ibinọkpaabyi kw'od-otin itama, ọmaana ejibha. Tte Ọvaar Ibinọkpaabyi kwọ oninga ọmaan-ọ.’ "

18 Nya o, ọvaarnọng oben kwanọng nwo bẹ́, "Kaam odik kw'nd-nkam bẹ́, mbọbh-ọ ma kadubh o."

Kwanọng nwo ọpọhn-ẹ bẹ́, "Tte ttatta kw'ode ọvaarnọng kwaam ọgbaak odik."

19 Ọvaarnọng ọbọbh-ẹ bẹ́, "Kọ kachibhẹ bẹ́, Joab wọ od-otim-ọ osi idik nja maphyir?"

Kwanọng nwo ọpọhna bẹ́, "K'ose kw'ikọ ttatta kw'ade ọvaarnọng kwaam arukọ akpen, ọnọng za kode kw'mokpo ọrọbh orik odik kw'agbaakẹ. K'odik ọkkọkka, ọtọhmnọng kwọ kw'ode Joab wọ ọtọhn-m bẹ́, nsi minna. Kẹ wọ obir ọtọhn ọtọhmnọng kwọ bẹ́, ọgbaak idik nja maphyir. 20 Joab kw'ode ọtọhmnọng kwọ, osi minna, ọfha abhakẹ ose kw'idik ide madidanma. Ttatta kwaam oyen ezonga mach'ozeng-eden kw'Ibinọkpaabyi. Kẹ ozong ọttọhk kpenamkpen f'od-oyin m'izek."

21 Ọvaarnọng oben Joab bẹ́, "Ojibh-ojibh. Kaam m'nsi-osi minna. Zọhng tọka odikkobh nwo kw'ode Absalọm, tima kpa nnam."

22 Joab otto okwubha ititika ny'izek k'ekpukpobha-maana, ozim-ẹ k'eche ch'Ibinọkpaabyi. Oben bẹ́, "Menda, kaam ọtọhmnọng kwọ kk'nzonga bẹ́, kk'ọphyaam f'ttatta kw'ode ọvaarnọng kwaam nyena, okurọ bẹ́, ọvaarnọng kk'ọttọhk f'kaam ọtọhmnọng kwẹ mphyem-ẹ, ọsa."

23 Nya o, Joab ochina z'Geshur, ọd-ọtọka Absalọm otima ọkpa nnam z'Jẹrusalẹm. 24 Okenaka, ọvaarnọng oben bẹ́, "Absalọm m'ochina z'ikẹ k'ọsọhm. Kinnorọ bẹ́, oze ititika saam." Minna kw'Absalọm ochin z'ikẹ k'ọsọhm, ọdọk ititika s'ọvaarnọng koze.

25 Wa ny'Israẹl kibungọ, ọnọng kode kw'matọhng ajibhada pẹ mach'mbo p'Absalọm. Tọma z'eso maa, pyirẹ z'mmokpatọkọ, ọraak koyen. 26 Wa od-ophyirẹ isisa sẹ ogbe mawanẹ k'icho. Ó̱de ophyirẹ isisa sẹ, adọhbhiji p'isisa njo mad-ade ashẹkẹl arọbh ijobh, atorọ k'ose kw'nd-ayoma ekpo z'ọvaarsọhm.

27 Wa Absalọm obhonọ ajinọngva attaan, ọmaana kwanọngnwa mawanẹ kw'okpen Tamar, kw'ojibh kwanọng mawuriji.

28 Wa Absalọm orukọ ny'Jẹrusalẹm k'icho ifa, ititika s'ọvaarnọng koze. 29 Nya o, Absalọm ọtọhm bẹ́, mayerẹ Joab anang-ẹ ọfha ọtọhm-ẹ z'ọvaarnọng. Joab obhum eyerẹ ndo. Absalọm ọtọhm ẹkkaabha ttong ifa. Joab obir obhum eyerẹ ndo. 30 Minna kw'obenẹ atọhmnọng pẹ bẹ́, "Owonọ kw'Joab ogbonọ abarli oning ọnyọma owonọ kwaam. Màzọhng ke ekpon ny'owonọ nwo." Minna kw'atọhmnọng p'Absalọm ake owonọ nwo ekpon.

31 Joab obina ozeng z'Absalọm k'ọsọhm, ọd-ọbọbh-ẹ bẹ́, "Osi yen kw'atọhmnọng pọ make owonọ kwaam ekpon o?"

32 Absalọm oben Joab bẹ́, "Nyer-ọ bẹ́, akwu ọfha ntọhm-ọ ad-abọbh ọvaarnọng bẹ́, ‘Mbọng f'nzeng ábẹ̀ mbina z'Geshur nkwuna o? Wura ojibhẹ ọtam, óde nninga za!’ Madidanma, nnorọ bẹ́, nze ọvaarnọng. Ó̱de ikk'mpina k'eden kpenamkpen, tte ọfhọ-m."

33 Minna kw'Joab ochin z'ọvaarnọng, od-otek-ẹ odik nwo. Ọvaarnọng oyerẹ Absalọm. Absalọm opyirẹ za o, ọraka otwu ititika z'izek ọnang ọvaarnọng. Ọvaarnọng ọbaak-ẹ.