1 K'ogbe wanẹ, ettem ebir epyibh Ọvaar Ibinọkpaabyi ẹmaana anọng p'Israẹl. Otima Devid oke bẹ ẹkọhr, oben bẹ bẹ́, "Màzọhng bhik anọng p'Israẹl ọmaana p'Juda."

2 Nya o, ọvaarnọng oben Joab ọmaana agbongsonọng p'aning amaan-ẹ bẹ́, "Màzenga kọbha ẹkọma ch'Israẹl, tọma z'Dan maa, pyirẹ z'Beershẹba, matọka ọnọngbhik kw'agbongnọng, ọfha nzonga ọsaabh fabẹ."

3 Joab ọpọhna ọvaarnọng bẹ́, "Tte Ọvaar Ibinọkpaabyi kw'ode Ibinọkpaabyi kwọ, osi agbongnọng asaabh apyirẹ anọng arọbh achen ọmaan-ọmaana. Tte ttatta kwaam otima achen pẹ oze. Okenaka, bọng-ọttọhk f'ttatta kwaam m'ozenga ábẹ̀, osi ọttọhkse mvo?"

4 Ọvaarnọng obhum ọgbaakadik kw'Joab ọmaana kw'agbongsonọng. Nya o, mabina ny'ọvaarnọng k'ititika bẹ́, mad-abhik agbongnọng p'Israẹl.

5 Ch'nkk'Jọrdan ajeka, mabhing anyọma Aroẹ, kw'oning ẹwọn-ẹwọna kw'obhon kw'ilokodo, pira nnazeng akpan Gad, mapyirẹ z'Jaza. 6 Machina z'Gilead, ọmaana z'ẹbhaakẹ ch'Tatim Hodshi, ọmaana z'Dan Jaan, ọttara za ch'ọnyọm Sidon. 7 Nya o, machina z'itubha s'obhon kw'Taya, ọmaana z'ibhon maphyir s'Hiv, ọttara s'Kenaan. K'okpongannamgbe machina z'Beershẹba, z'Nẹgẹv kw'oning z'Juda.

8 Ch'nkk'azenga akọbha izek njo maphyir k'aphe osowanẹ ọmaana iwu ẹrọbh, makpa nnam z'Jẹrusalẹm.

9 Joab otek ọvaarnọng obhik f'agbongnọng. Ny'Israẹl, wa agbongnọng made nnọhna ẹnọhna okwuma arọbh ijobh p'makpo ọkkangkkang abọka, z'Juda made nnọhna ijobh kkamfa okwuma arọbh ijobh.

10 Wa ettem ekwu ẹyakẹ Devid odik ch'ikk'agbongnọng obhika, oben Ọvaar Ibinọkpaabyi bẹ́, "Kaam kk'epyibha chiden nsa m'ọttọhk f'nsi ma. O Ọvaar Ibinọkpaabyi, ototo, bina nang epinẹ ch'ọtọhmnọng kwọ. Kaam nturọ-oturọ m'ọttọhk f'nsi ma."

11 Ọvaar Ibinọkpaabyi oben Gad kw'ode ọgbaak-ettem ch'Devid bẹ́, 12 "Zọhng tek Devid bẹ́, kaam nnang-ẹ abhokọ attaan. Kaam m'nsi okpenamkpen f'otek."

13 Ch'Devid nọphyaabh ny'ekpebha, Gad od-okebh-ẹ, oben-ẹ bẹ́, "Ma, ina ọdaak-ọ bẹ́, okwo fiden oninga m'izek nja sọ k'aphe attaan yirẹ? Ina ọdaak-ọ bẹ́, arọbh ebira ch'awawunanọng pọ k'aphe attaan yirẹ? Ina obir ọdaak-ọ bẹ́, itama ikpẹkẹ izek sọ k'iwu ittaan yirẹ? Si ochibhẹ madidanma, ọfha atek-m ose kw'm'nd-mgbaak kẹ nwo kw'ọtọhm-m."

14 Devid oben Gad bẹ́, "Ettem ẹyak-m odik o. Tte motera otto k'mbọhk s'Ọvaar Ibinọkpaabyi okurọ bẹ́, kẹ oyen ikwosisi siden. Okenaka, kaam kasi ntto k'mbọhk s'ayokinọng."

15 Nya o, Ọvaar Ibinọkpaabyi ọtọhm itama ny'Israẹl, tọma k'ekpebha maa, pyirẹ k'ogbe kw'oke. Anọng nnọhna arọbh ochenọnttaan okwuma ichi, mape, tọma z'Dan maa, pyirẹ z'Beershẹba. 16 Ch'iwa ozeng-eden kw'Ibinọkpaabyi onemẹ ọbọhk bẹ́, odimẹ Jẹrusalẹm, Ọvaar Ibinọkpaabyi ọtọr nnam ny'itama njo s'ọkamẹ, oben ozeng-eden nwo kw'ọkamẹ bẹ́, otima odimẹ anọng mbo bẹ́, "Ọdọk kasi! Tọr ifor." Ozeng-eden nwo kw'Ọvaar Ibinọkpaabyi nokwu oninga z'ọgbaarẹ kw'Arawuna kw'ofon Jebus, nya ch'mad-aninga agwuma abarli. 17 K'ogbe kw'Devid oze ozeng-eden kw'Ọvaar Ibinọkpaabyi ch'ọd-ọfhọ anọng mbo, oben Ọvaar Ibinọkpaabyi bẹ́, "Kaam kk'epyibha nsa e. Kaam okkerẹ-arọkimaan kk'mpina e. Anọng mboma akenka ade mach'arọkimaan e. Bẹ majẹ mbọng-ọ? Tte itama sọ ikpẹkẹ kaam ọmaana ẹsọhmbhọr chaam dẹ-dẹ."

18 Ny'ewu ndo Gad obina od-okebha Devid, oben-ẹ bẹ́, "Zọhng ttima ijabyi s'Ọvaar Ibinọkpaabyi z'ọgbaarẹ kw'Arawuna kw'ofon Jebus, za ch'mad-aninga agwuma abarli." 19 Nya o, Devid obina od-osi k'ose kw'Ọvaar Ibinọkpaabyi ikk'Gad otima oben-ẹ bẹ́, osi. 20 K'ogbe kw'Arawuna oze ọvaarnọng, ọmaana anọng pẹ ch'mad-azenga akwu-okwu z'ikẹ k'ifor, kẹ obina oyin z'iyaan, ọraka eso otwu ititika ny'izek k'ikpukpobha ọnang ọvaarnọng.

21 Arawuna oben bẹ́, "Ode yen kw'ttatta ọvaarnọng kwaam okwu k'ọtọhmnọng kwẹ o?" Devid ọpọhn-ẹ bẹ́, "Nkwu bẹ́, ndebh ọgbaarẹ kw'ad-aninga agwuma abarli, ọfha nttima ijabyi nya nnang Ọvaar Ibinọkpaabyi, ọfha itama s'ikpẹkẹ anọng paam ikpọka."

22 Arawuna oben Devid bẹ́, "Tte ttatta ọvaarnọng kwaam ọtọka ọttọhk kpenamkpen f'ọdaak-ẹ otima ọfọhnọ ẹja. Kirẹ abhaam p'ẹnanga ch'ekwọmọ ma. Akora p'nd-atima agwuma abarli. Nchi s'abhaam ad-atima ayaar akora ebir ening ma mach'omenẹ." 23 Arawuna obir oben bẹ́, "K'ediden chọ, kaam nnang-ọ ekpo mbya maphyir. Tte Ọvaar Ibinọkpaabyi kwọ ochera ọtọka ẹnanga chọ."

24 Okenaka, ọvaarnọng ọpọhna Arawuna bẹ́, "Mma e, kaam m'ndebh ekpo mbyo odebh e. Kaam ekpo py'ajaaka mintima mfọhnọ ẹja nnang Ọvaar Ibinọkpaabyi." Nya o, Devid odebh ọgbaarẹ nwo kw'nd-aninga agwuma abarli, ọttara abhaam k'ashẹkẹl p'silva arọbh afa okwuma ijobh.

25 Devid ottima ija-byi nya ọnang Ọvaar Ibinọkpaabyi, obir ọfọhnọ ẹja ch'ẹkwọmọ, ọmaana ẹja ch'ẹgbaka. Nya o, Ọvaar Ibinọkpaabyi ọbhaanga njọm sẹ k'eso ch'izek njo. Obir ọkpọka itama s'ikpẹkẹ Israẹl.