1 K'ogbe kw'Ish-Boshẹt kw'ode nnwa kw'Saul ọbhaang bẹ́, Abnẹr kk'ọpa z'Hẹbrọn, ẹfa ẹsẹ-ẹ, nttem ibir iyak anọng p'Israẹl maphyir odik. 2 M'ogbe nwa, wa nnwa kw'Saul oyen ajinọng afa p'uwa mad-achi egbong-kaan ch'ẹkkaam-ọkkaam eden. Oyok wanẹ okpen Baana, nwoza okpena Rekab. Wa bẹ made iva p'Rimmọn kw'ofon Berot z'ẹkọma ch'Bẹnjamin. Wa matọka Berot mach'ẹbhaakẹ danẹ ch'Bẹnjamin, 3 okurọ bẹ́, wa anọng p'Berot arọbhọ achina z'Gittaim, mad-aruk za mach'akikennọng pyirẹ menda.

4 (Wa Jonatan kw'ode nnwa kw'Saul oyen ojinọngnwa kw'ọphyakẹ mkpẹtẹ. Kẹ wa ode icho ichen k'ogbe kw'itekẹ s'Saul ọmaana Jonatan ibin z'Jẹzrẹl ikwu. Wa ọrirọka kwẹ otin-ẹ bẹ́, otim-ẹ ọrọbh. Ch'od-oduk-oduka bẹ́, ofona, ọnaang-ẹ otto, ọphyakẹ mkpẹtẹ. Wa okpen Mẹphiboshẹt.)

5 Nya o, Rekab ọmaana Baana p'ade iva p'Rimmọn p'afon Berot mabina azeng z'ọsọhm kw'Ish-Boshẹt, makebh-ẹ ny'ọyakpattem ch'od-okwoka ọwọhng ny'ẹya ndo. 6 Madim z'idongọ ẹtaanga mach'mm'ad-atọka wit, makwum-ẹ ny'ẹbhọr. Pira Rekab ọmaana ọgbaanotte Baana, marọbh afona.

7 Wa madimẹ ny'ọsọhm nwo k'ogbe kw'otim oyim ny'ebin z'ikẹ k'idongọ. Ch'nkk'ẹ akwuma mafhẹ-ẹ, makpaar-ẹ eso, matima azenga ny'eden ch'Araba ny'orungiwu maphyir. 8 Matọka eso ch'Ish-Boshẹt achena ọvaar Devid z'Hẹbrọn, maben-ẹ bẹ́, "Kirẹ eso ch'Ish-Boshẹt kw'ode nnwa kw'Saul ma, kw'ode ọwawunanọng kwọ kw'ọkamẹ bẹ́, ọfhọ-ọ. Menda nwa, Ọvaar Ibinọkpaabyi kk'odik nwo otuka ny'Saul ọmaana iva pẹ, k'eso ch'atte kwaam kw'ode ọvaarnọng."

9 Devid ọpọhna Rekab, ọttara ọgbaanotte Baana, p'ade iva p'Rimmọn kw'ofon Berot bẹ́, "K'ose kw'Ọvaar Ibinọkpaabyi kw'ọrọhbh-m k'adikgbe kpenamkpen orukọ akpen, 10 k'ogbe kw'ọnọng okwu otek-m bẹ́, ‘Saul kk'ọpa,’ ọsẹ-ẹ bẹ́, ochen-m ẹkkaabha ọkkọkka, kaam mbọk-ẹ, mfhẹ-ẹ z'Ziklag. Ẹtaam ch'iwa nsẹ-ẹ k'ẹkkaabha chẹ dọ nya. 11 M'ntera nsi nyọhng-ọyọhnga, k'ogbe kw'abyibyanọng akebh ọnọng kw'otor-otor z'ebin, z'ikẹ k'ọsọhm afhọ. Ọbaan bẹ́, nnor izẹ sabẹ mbọbh bọnga, mbir ndimẹ bọnga eche m'iyagbin!"

12 Nya o, Devid oke ajinọng pẹ ẹfa, mafhọ Rekab, ọmaana Baana. Makpaara bẹ mbọhk ọmaana mmokpatọkọ. Matọka aforbukọ pabẹ arena atuma esipe z'Hẹbrọn. Okenaka, matọka eso ch'Ish-Boshẹt anọhnga z'epekwuk ch'Abnẹr z'Hẹbrọn.