1 Wa egbong ch'ọsọhm kw'Saul ọmaana ch'ọsọhm kw'Devid ening k'ogbe kw'okem ebhira. Ọsọhm kw'Devid ọgaangẹ ochina ororo, ọsọhm kw'Saul z'okwubha ọmọm ochina ororo.

2 Wa panọng p'Devid mamaanẹ Devid ajinọngva z'Hẹbrọn.

Ochedennwa kwẹ wa okpen Amnọn, kw'ode nnwa kw'Ahinoam kw'ofon Jẹzrẹl ọmaan-ẹ.

3 Kw'ottong afa okpena Kilẹab. Abigẹl kw'ode opokwa kw'Nabal kw'ofon ẹkọma ch'Kaamẹl wọ ọmaan-ẹ.

Kw'ottong attaan okpen Absalọm kw'ode nnwa kw'Maaka, kw'ode ominanwa kw'Talmayi, ọvaarnọng kw'Geshur.

4 Ojinọngnwa kw'ottong ana ode Adonija kw'ode nnwa kw'Hagit.

Kw'ottong achen ode Shẹphatiya kw'ode ojinọngnwa kw'Abital.

5 Kw'ottong achadanẹ okpen Itreyam, kw'Ẹgla kw'ode kwanọng kw'Devid ọmaanẹ.

Wa mamaanẹ Devid iva mba z'Hẹbrọn.

6 Ny'ogbe kw'ẹkọhr ndo etto ny'ọsọhm kw'Saul ọmaana ọsọhm kw'Devid, Abnẹr otima obhokọ nwo odo ẹfa oyena z'ọsọhm kw'Saul. 7 Wa Saul oyen oyoknọng kw'okpen Rizpa kw'ode nnwa kw'Aiya. Ish-Boshẹt ọbọbh Abnẹr bẹ́, "Osempira ayima amaana oyoknọng kw'atte kwaam o?"

8 Wa Abnẹr ọdọk-ẹ mawuriji okurọ odik kw'Ish-Boshẹt ọgbaakẹ. Ofona nya, ọpọhn-ẹ bẹ́, "Ma, ọsọ-ọ bẹ́, kaam nde ẹffa ch'ening k'ọtọhm f'anọng p'Juda yirẹ? Tọma za maa, pyirẹ m'ewu ch'menda, kaam nd-ntor atte kwọ Saul, mbir ntor ivotte pẹ ọmaana ayok-odikkobh pẹ maphyir. Kọ ọbọhk kintte bẹ́, atto k'mbọhk s'Devid. Chibhẹ nya, abọhm-m odik kw'ọmaan kwanọng nwa. 9 Tte Ọvaar Ibinọkpaabyi ọnang kaam Abnẹr irem siden obir ọttar-ọttara, óde kaam ina ọttọhk f'Ibinọkpaabyi ọnwọhngọ ọnang Devid nsi, 10 ch'obenẹ bẹ́, kẹ m'otinẹ ẹvaar z'ọsọhm kw'Saul okwu ottima dẹ k'ọsọhm kw'Devid, ọfha ọbaabha Israẹl ọmaana Juda tọma z'Dan maa, pyirẹ z'Beershẹba." 11 Ish-Boshẹt ọdọk Abnẹr odik kpenamkpen kokpo ọpọhna okurọ ch'Abnẹr ojor-ẹ.

12 Minna kw'Abnẹr ọtọhm azeng-eden z'Devid, mabọbh-ẹ bẹ́, "Anyi wọ oyen izek njo o? Chekẹ maan-m, ọfha nkkaan-ọ ntima anọng p'Israẹl maphyir njeka nkebh-ọ."

13 Devid ọpọhn-ẹ bẹ́, "Ojibh-ojibh. Kaam m'nchekẹ mmaan-ọ. Okenaka, tte mphyem-ọ ọttọhk mavanẹ: kọ k'ititika saam kàkwu, oye bẹ́, atim Mikal kw'ode ominanwa kw'Saul akwu aze-m." 14 Nya o, Devid ọtọhm azeng-eden bẹ́, mata z'Ish-Boshẹt kw'ode nnwa kw'Saul maben-ẹ bẹ́, "Nang-m kwanọng kwaam Mikal kw'ikk'mkpatọr arọbh achen s'aPhilistiya ntima nnang ẹba-phya chẹ."

15 Minna kw'Ish-Boshẹt ọtọhm anọng mad-atọka Mikal z'odim Paltiyẹl kw'ode nnwa kw'Laish. 16 Okenaka, odim otor-ẹ mafona, od-obhom ẹmọng otima otor-ẹ nnam ny'odenbhir nwo maa, pyirẹ z'Bahurim. Abnẹr oben-ẹ bẹ́, "Kpa nnam z'ikọ k'obhon." Minna kw'ọkpa nnam ọbhana.

17 Abnẹr ottema ọmaana asogbọhkọnọng p'Israẹl, oben bẹ bẹ́, "Ogbe kk'obhira kw'makamẹ bẹ́, masi Devid ọvaarnọng kwabọnga. 18 Ogbe nwo wọ ma e! Màsi minna, kirẹ Ọvaar Ibinọkpaabyi kk'ọnwọhnga ọnang Devid bẹ́, ‘Kaam m'nzenga k'Devid kw'ode ọtọhmnọng kwaam, nkkaana Israẹl k'mbọhk s'aPhilistiya, ọttara awawunanọng pẹ maphyir.’ "

19 Abnẹr obir ozeng mmo ogbaak odik ọnang anọng p'Bẹnjamin. Ochina z'Hẹbrọn ọd-ọgbaak Devid ọttọhk kpenamkpen f'anọng p'Israẹl ọttara anọng p'Bẹnjamin makamẹ bẹ́, mm'asi. 20 K'ogbe kw'Abnẹr otim anọng ẹrọbh pẹ okwu okebha Devid z'Hẹbrọn, Devid osok eninga chiden ọnang Abnẹr ọttara ajinọng pẹ. 21 Nya o, Abnẹr oben Devid bẹ́, "Tte ntta makpaar nd-ntobha anọng p'Israẹl maphyir nsok ttatta ọvaarnọng kwaam, mfha masi nwọhngọ amaan-ọ, ọfha abaabha ọttọhk kpenamkpen f'ọdaak-ọ." Minna kw'Devid otte Abnẹr ọbọhk, ọbhana k'ọdaam.

22 Ny'eninga ndo, anọng p'Devid ọmaana Joab makwuna za ch'mayinẹ egbong. Matima ekpo py'matọk z'egbong k'ọsaabh matima akwuna. Okenaka, wa Abnẹr ọdọk Devid koning ọmaana z'Hẹbrọn okurọ bẹ́, wa Devid kk'ẹ ọbọhk ọtta bẹ́, ọbhana. Ofona k'ọdaam. 23 K'ogbe kw'Joab ọttara agbongnọng p'aning amaan-ẹ mapyirẹ, matek-ẹ bẹ́, Abnẹr kw'ode nnwa kw'Nẹr kk'ọvaarnọng okwu ọza, ọvaarnọng ọttẹ-ẹ ọbọhk ọbhana. Abnẹr ofona k'ọdaam.

24 Minna kw'Joab ochin z'ọvaarnọng oben-ẹ bẹ́, "Bọng-ọttọhk f'asi ma? Abnẹr okwu okebh-ọ ma. Osempira attẹ-ẹ ọbọhk? Ma, kẹ kk'ofona! 25 Kọ azong ọnọng-kira kw'Abnẹr kw'ode nnwa kw'Nẹr ode ma. Okwu bẹ́, ọbọhr-ọ, obir ọbaana ozenga-bho kwọ, obir ozonga idik maphyir s'id-asi."

26 Joab obina orik Devid, ọtọhm azeng-eden pẹ bẹ́, mayerẹ Abnẹr atima akwu. Matim-ẹ akpa nnam z'esi-pe ch'ening z'Sira. Wa Devid odik nwo kozong. 27 Ny'ogbe kw'Abnẹr ikk'okwuna z'Hẹbrọn, Joab otim-ẹ odim k'odonginwa wanẹ kw'ebhumma ch'ẹyaakẹ z'obhon, mach'im'ọkkabh-ẹ ayaabhẹ. Pira okwum-ẹ imaana ny'ẹbhọr, ope. Minna kw'Joab otuk obo kw'Asahẹl kw'ode ọgbaanọkka.

28 K'ogbe kw'Devid nọbhaang odik nwa, oben bẹ́, "Ódik okwur izẹ s'Abnẹr kw'ode nnwa kw'Nẹr, mbọhk saam ọttara s'anọng p'ọvaarbhon kwaam, iwur-owur z'Ọvaar Ibinọkpaabyi k'ititika ttattampe. 29 Tte izẹ s'Abnẹr ikpẹkẹ Joab ọmaana ẹsọhmmọr chẹ maphyir. Tte ẹsọhmmọr ch'Joab ening ọnọng eworọ kw'im'oyena ẹbhaak, wanẹma okpokora, wanẹma ọnọng kw'otim echi ozenga, wanẹma kw'ope k'ọkkangkkang, wanẹma kw'oworọ ọchattọhk."

30 (Joab ọmaana ọgbaanotte Abishayi, mafhọ Abnẹr okurọ ch'ọfhọ Asahẹl kw'ode ọgbaanotte kwabẹ z'egbong ch'marim z'Gibeọn.)

31 Nya o, Devid oben Joab ọmaana anọng maphyir p'aning nya amaan-ẹ bẹ́, "Màyaakẹ ekpo py'mafọr ny'ifor, mafọra abara-bina, matima isen k'ichen azenga ny'Abnẹr k'ititika." Ọvaar Devid oyenẹ ọyakẹ mffurachi njo nnam. 32 Manọhnga Abnẹr z'Hẹbrọn. Ọvaar Devid obhom Abnẹr k'ẹrọng ny'epekwuk chẹ. Anọng maphyir mabir abhom.

33 Ọvaar Devid obhom eforo nda ọnang Abnẹr bẹ́:

"Ma, ọbaan za bẹ́, Abnẹr ope mach'oturọnọng o?

34 Ọnọng mbọhk sọ kọdabhẹ,

m'ikọ mgbakkọhbhọ k'mmo kake,

atto ape mach'ọnọng otto k'mbọhk s'abyibyanọng."

Anọng mbo maphyir mabir abhom-ẹ ọdọk.

35 Nya o, anọng mbo maphyir makwu akwukọ Devid bẹ́, ochi ọttọhk ch'ewu etim ening. Devid ochekẹ, oben bẹ́, "Tte Ọvaar Ibinọkpaabyi ọnang-m irem siden obir ọttar-ọttara, óde nchi brẹd, obir ode ọttọhk kpenamkpen, pira ẹsọhka etto!"

36 Anọng mbo maphyir p'aning nya ake odik nwo otum, nttem ibir idaam bẹ. Ọttọhk kpenamkpen f'ọvaarnọng osi, ọdaam bẹ ettem. 37 Ofona nya, anọng mbo maphyir, ttara anọng p'Israẹl, makwu azonga ny'ewu ndo bẹ́, ọbọhk kw'ọvaar Devid ny'obo kw'Abnẹr kw'ode nnwa kw'Nẹr, koyik.

38 Nya o, ọvaarnọng oben anọng pẹ bẹ́, "Bọnga nkazong bẹ́, osonọng kwiden, ọmaana ọfa-nọng kw'ọyọhng, kk'ọtta m'Israẹl menda o? 39 Menda nwa, chibhẹ ch'ode kaam wọ nde ọvaarnọng kw'nkk'ana abyenga k'eso, ifor imọm-m ọmọm. Ajinọng mba p'ade iva p'Zeruya magaangẹ ayọhng-m. Tte ọvaar Ibinọkpaabyi otuka epyibha ch'opyibhanọng otor k'osisi kwẹ!"