1 Ma wọ ode ikpongannamdik s'Devid ọgbaakẹ:

Ọgbaakadik kw'obin ọnọng ifor kw'Devid kw'ode nnwa kw'Jẹsẹ,

ọgbaakadik kw'ojinọng kw'Ibinọkpaabyi kw'Ọyọhng ikk'otina k'ẹrọng,

ojinọng kw'Ibinọkpaabyi kw'Jekọb ikk'ana obyenga k'eso,

okem-akpa k'ọkkọhna kw'amọng p'Israẹl:

2 "Egwugwuma ch'Ọvaar Ibinọkpaabyi etim-m ẹgbaak odik,

ọgbaakadik kwẹ oning-m m'ẹdaak.

3 Ibinọkpaabyi kw'Israẹl ọgbaak odik,

Ẹtakpa ch'Israẹl eben-m bẹ́,

‘K'ogbe kw'ẹbaabha ch'ọnọng etor-otor,

k'ogbe kw'ikẹ ọbaabh ọmaana opoma f'Ibinọkpaabyi,

4 kẹ ode mach'ọyaanttaana kw'echekira ch'ekpebha,

k'okpebhawu kw'ebonọ nede,

ẹmaanẹ mach'ogbe kw'ẹrọng ikk'ebhira,

ch'esi azizaarẹ amen k'izek.’

5 "Wura ẹsọhmmọr chaam ina etorọ z'Ibinọkpaabyi k'ititika,

k'odik ọkkọkka, wura kẹ kaam echekẹ ch'ttattampe kosi ọmaana,

otobha dẹ od-osok k'ẹbhaakẹ kpenamkpen.

K'odik ọkkọkka, wura kẹ ẹnaanga chaam kosi eyin k'eden,

obira ọnang-m okpenamkpen f'nnorọ.

6 Okenaka, abyibyanọng maphyir bọ p'mabharẹ okikaan mach'akkaangẹ

p'nna ọbọhk ad-atima atobha.

7 Ọnọng kpenamkpen kw'otwu akkaangẹ,

od-otima ẹbaanga, wanẹma ẹbọhk-bọka ch'ọkọhn;

mad-akwọmọ akkaangẹ ny'ibyi s'maning."

8 Ma wọ ode ache p'akkikkaama p'Devid:

Joshẹb-Bashẹbẹt kw'ofon Takemọn, wọ uwa ode oso kw'anọng mbo attaan. Kẹ wọ uwa otim ọkọhn ọfhọ anọng nnọhna mfa k'ẹrima madanẹ.

9 Ọnọng kw'uwa otor-ẹ okpen Ẹleaza kw'ode nnwa kw'Dodo kw'ofon Aho. Kẹ mach'ọnọng wanẹ kw'ọttar ny'akkikkaama mbo attaan, wa od-oninga ọmaana Devid k'ogbe kw'mad-agbokọ aPhilistiya p'nkk'attonga z'Pas Damin bẹ́, marima egbong. Nya o, anọng p'Israẹl atọr ifor, 10 Ẹleaza ọgaangẹ ettem, odo obe, ọfhọ aPhilistiya maa, ọbọhk okwok-ẹ, obir ọraakẹ z'ọkkangkkang. Ny'ewu ndo, Ọvaar Ibinọkpaabyi ọnang bẹ ekema chiden. Agbongnọng mbo makpa nnam akebha Ẹleaza bẹ́, mad-awọra affuranọng mbo ekpo byẹ-byẹ.

11 Ọnọng kw'uwa obira otor-ẹ okpen Shama kw'ode nnwa kw'Agi kw'ofon Hara. K'ogbe kw'aPhilistiya akwu attonga k'ibyi janẹ s'iwa ide ẹkpẹmẹ ch'eyen akpomọmakira banẹ, agbongnọng p'Israẹl marọbh. 12 Okenaka, Shama odo obe ny'ottem kw'owonọ nwo, ọkpa aPhilistiya eden, obira ọfhọ bẹ. Wa Ọvaar Ibinọkpaabyi ọnang-ẹ ekema chiden.

13 Ny'ọphagbe, ajinọng attaan ny'ẹkaan ch'akkikkaama mbo ẹrọbh okwuma ijobh p'ade aso, mabina ad-akebha Devid z'ọtakpamma kw'Adulam, k'ogbe kw'ẹkaana danẹ ch'aPhilistiya etim ebhingẹ z'ilokodo s'Rephayim. 14 Ny'ogbe nwo, Devid oning z'ifabyi, anọng p'Philistiya abira aninga z'ibyi s'agbongnọng ad-aruk, z'Bẹtẹlẹhẹm. 15 Asi akwu adaak Devid, oben bẹ́, "O, wúra ọ́nọng m'okpo ọkaabha asi z'esipe ch'ẹnyọm ebhumma ch'Bẹtẹlẹhẹm ọnang-m ngwo o!" 16 Minna kw'akkikkaama mbo attaan mabin ajeka ny'igbong-titika s'aPhilistiya, mad-akaabha asi z'esipe ndo ch'ẹnyọm ebhumma ch'Bẹtẹlẹhẹm, machena Devid. Devid obhum asi mbo ogwugwo, otera obyenga pẹ ọnang Ọvaar Ibinọkpaabyi. 17 Oben bẹ́, "O Ọvaar Ibinọkpaabyi, okwurọ-dik wọ bẹ́, nsi ọttọhkse mva e! Ọzẹ f'anọng p'atim obo ayenẹ ikebh azang ma o?" Devid obhum asi mbo ogwugwo.

Idik s'iwa akkikkaama mbo attaan asi jọ ma.

18 Abishayi kw'ode ọgbaanotte kw'Joab kw'Zeruya obhonọ wọ uwa ode oso kw'anọng mbo attaan. Kẹ wọ iwa otim ọkọhn ọfhọ anọng arọbh ichi. Ofona nya o, oyin eche mach'anọng mbo attaan. 19 Kẹ wọ uwa nokpobh ọtam ọyọhnga anọng mbo attaan. Okwu ode otim-eden kwabẹ, chibhẹ ch'iwa ina k'ẹkaan chabẹ, ọttar.

20 Bẹnaya kw'ode ojinọngnwa kw'Jẹhoyada, okkikkaama kw'ofon ẹkọma ch'Kabzil, obira osi mawuriji. Wa ọfhọ akkikkaama p'Moab afa p'akkaamẹ ọtam ayọhnga ayok. Kẹ wa obira ọsaka ọd-ọfhọ eche z'epe ẹtaanga k'ewu danẹ ch'ifọhng itebhẹ. 21 Kẹ wa obira ọfhọ oJipnọng wanẹ kw'ọbarẹ ẹffa mawuriji. Chibhẹ ch'iwa oJipnọng nwo otim ọkọhn, Bẹnaya otima ichikwuma orim-ẹ ábè maa, ọna oJipnọng nwo ọkọhn mvo, otima ọbhakẹ ọfhẹ-ẹ. 22 Minna wọ kw'uwa adongiji p'Bẹnaya kw'Jẹhoyada obhonọ made. Kẹ wa obira oyinẹ eche mach'akkikkaama mbo attaan. 23 Wa makpobh-ẹ ọtam ayọhnga ayok ny'ẹkaan ndo ch'anọng ẹrọbh okwuma ijobh. Okenaka, wa kẹ nya akkikkaama mbo attaan kọttar. Devid ọsẹ-ẹ oso kw'anọng p'ad-akker-ẹ.

24 Anọng p'uwa attar ny'ẹkaan ndo ch'anọng ẹrọbh okwuma ijobh made:

Asahẹl kw'ode ọgbaanotte kw'Joab,

ọmaana Ẹlhanan kw'ode nnwa kw'Dodo kw'ofon Bẹtẹlẹhẹm,

25 ọmaana Shama kw'ofon Harọd,

ọmaana Ẹlika kw'obira ofona Harọd,

26 ọmaana Hẹlẹz kw'ofon Palti,

ọmaana Ira kw'ode nnwa kw'Ikẹsh kw'ofon Tẹkoa,

27 ọmaana Abiyẹza kw'ofon Anatọt,

ọmaana Sibẹkayi kw'ofon Hushat,

28 ọmaana Zalmọn kw'ofon Aho,

ọmaana Maharayi kw'ofon Nẹtophat,

29 ọmaana Hẹlẹd kw'ode nnwa kw'Baana kw'obira ofona Nẹtophat,

ọmaana Itayi kw'ode nnwa kw'Ribayi kw'ofon Gibea z'Bẹnjamin,

30 ọmaana Bẹnaya kw'ofon Piratọn,

ọmaana Hidayi kw'ofon ravins z'Gaash,

31 ọmaana Abi-Albọn kw'ofon Arbat,

ọmaana Azmavẹt kw'ofon Barhum,

32 ọmaana Eliyaba kw'ofon Shaalbọn,

ọmaana ajinọngva p'Jashẹn,

33 ọmaana Jonatan kw'ode nnwa kw'Shama kw'ofon Hara,

ọmaana Ahiyam kw'ode nnwa kw'Shara kw'obira ofona Hara,

34 ọmaana Ẹliphẹlẹt kw'ode nnwa kw'Ahasbayi kw'ofon Maakat,

ọmaana Ẹliyam kw'ode nnwa kw'Ahitophẹl kw'ofon Gilọn,

35 ọmaana Hẹzrọ kw'ofon Karmẹl,

ọmaana Paarayi kw'ofon Arbit,

36 ọmaana Igal kw'ode nnwa kw'Natan kw'ofon Zoba,

ọmaana ojinọngnwa kw'Hagri,

37 ọmaana Zẹlẹk kw'ofon Amọn,

ọmaana Naharayi kw'ofon Bẹrọt, kw'ode ọtọhk-egbongkpo py'Joab kw'Zeruya obhonọ,

38 ọmaana Ira kw'ofon Itri,

ọmaana Garẹb kw'obira ofona Itri,

39 ọttara Uriya kw'ofon Hit.

Kibung-kibungọ, wa obhik fabẹ ode ẹrọbh okwuma ichi kkamfa.