1 Otum ny'ọyaabhagbe, ch'avaar ad-ayin mgbong, Devid ọtọhm Joab, ọmaana atọhmnọng p'ọvaarnọng, ọttara agbongnọng p'Israẹl maphyir egbong. Mad-akema anọng p'Ammọn maphyir, mabir akọbha obhon kw'Raba ake k'ettem. Okenaka, Devid oninga ny'Jẹrusalẹm.

2 K'ọsọhkawu wanẹ, Devid obina z'ebin, ozenga z'ipubhaang s'odimpa kwẹ, ọkọbha. Minna kw'oning ny'ipubhaang njo oze kwanọng wanẹ ch'od-ogbobha asi. Wa kwanọng nwo ojibhẹ mawuriji. 3 Devid ọtọhm ọnọng bẹ́, od-oror, ozonga ọnọng kw'kwanọng nwo ode. Ọnọng nwo oben-ẹ bẹ́, "Batshẹba azang nya, kw'ode nnwa kw'Eliyam, kwanọng kw'Uriya kw'ofon Hit o?" 4 Minna kw'Devid ọtọhm azeng-eden pẹ bẹ́, mad-atọk-ẹ achen-ẹ. Okwu nya o, Devid oyim-ẹ ábẹ̀. Pira kwanọng nwo nọkpa nnam z'ikẹ k'ọsọhm. (Wa ogbe otima obhira kw'kwanọng nwo ọwọr ofor.) 5 Ophe okponga kwanọng nwo, ọtọhm ẹkkaabha otek Devid bẹ́, "Kaam kk'ibhọr ntima e."

6 Ofona nya o, Devid ọtọhm ẹkkaabha ọnang Joab bẹ́, "Yerẹ Uriya kw'ofon Hit nang-m." Joab oyer-ẹ ochena Devid. 7 Ch'Uriya okwu okebh-ẹ, Devid ọbọbh-ẹ ose kw'Joab ọmaana agbongnọng maning, ọmaana ose kw'egbong ede. 8 Pira Devid noben Uriya bẹ́, "Zọhng gbobhọ mmo z'ikọ k'ọsọhm." Minna kw'Uriya obin ny'odimpa, matima ẹtaam ch'ọvaarnọng ọnang-ẹ, ayak-ẹ nnam. 9 Okenaka, Uriya oyima ny'ebhumma ch'odimpa ttara atọhmnọng p'otte kwẹ. Z'ọsọhm kwẹ kochin.

10 Matek Devid bẹ́, "Uriya z'ikẹ k'ọsọhm kọta e." Ofona nya, Devid ọbọbh Uriya bẹ́, "Yina azang kw'afon z'oden-bhir akwuna ma? Yen kw'ina z'ikọ k'ọsọhm abhan o?"

11 Uriya oben Devid bẹ́, "Ẹkkọhbhọ ch'Echekẹ ch'Ibinọkpaabyi, ọmaana anọng p'Israẹl, ọttara anọng p'Juda maning k'okkira. Atte kwaam Joab kw'ode oso kw'agbongnọng, ọmaana anọng p'ọvaarnọng kwaam mabhing k'ọyaankpa kw'mkpẹmẹ. Yen kw'kaam m'nchina z'ọsọhm nd-nchi ọttọhk, mgwo, mbir nyima kwanọng kwaam ábẹ̀ o? K'ose kw'arukọ akpen, kaam ọttọhkse mvo mìnsi!"

12 Nya o, Devid oben-ẹ bẹ́, "Bir ninga ma k'ewu madanẹ. Ophyinẹ kaam m'nttọ-ọ ọbọhk akpa nnam." Ofona nya, Uriya oninga ny'Jẹrusalẹm ny'ewu ndo ọttara ewu ndoza. 13 Devid oyer-ẹ, matọn achi ọttọhk, mabir agwo atuk. Devid ọnang-ẹ atuk maa, obuma. Okenaka, ny'ẹsọhka, Uriya otima obhurukpa kwẹ od-otor atọhmnọng p'otte mayima. Z'ikẹ k'ọsọhm kọbhan.

14 Ny'ekpebha, Devid ọkkẹr nnwẹr ọnang Uriya bẹ́, ochena Joab. 15 Ny'nnwẹr nwo ẹtaanga, ọkkẹr bẹ́, "Sok Uriya z'igbong-titika, za ch'egbong ẹgaangẹ mawuriji. Pira nnanyaangẹ arik-ẹ, ọfha mattẹ-ẹ, ope."

16 Nya o, ch'Joab kk'ebhondim ndo ọkọbha oke k'ettem, ọtọka Uriya osok z'ẹbhaakẹ ch'ozong bẹ́, akkikkaama p'awawunanọng pẹ p'agaang-ọgaangẹ, aning. 17 K'ogbe kw'ajinọng p'ebhondim ndo mayinẹ k'iyaan, marima Joab ábẹ̀, mafhọ Uriya kw'ofon Hit, ọttara agbongnọng banẹ p'Devid.

18 Joab ọtọhm ẹkkaabha, otek Devid odik kpenamkpen kw'oyinẹ z'egbong ndo. 19 Ọtọhn ozeng-eden nwo bẹ́, "Ó̱de íkk'ọvaarnọng ose kw'egbong nda ede agbaaka maphyir, 20 óde ettem epyibh-ẹ, ọbọbh-ọ bẹ́, ‘Osempira matima erima anyọma ebhondim ndo minna o? Oye bọnga nkazong bẹ́, bẹ mm'aninga ny'abaaka atta ayuk o? 21 Anyi wọ iwa ọfhọ Abimẹlẹk kw'Jerub-Bẹshẹt obhonọ o? Kwanọng azang oning z'ọbaaka ọbharẹ ẹtakpa ch'ẹfhẹ-ẹ z'Tẹbẹz o? Osempira manyọma etumọ minna o?’ Tek-ẹ bẹ́, ‘Nkk'Uriya kw'ode ọtọhmnọng kwọ kw'ofon Hit abir afha e.’ "

22 Minna kw'ozeng-eden nwo obin ozenga. Opyirẹ za o, otek Devid odik kpenamkpen kw'Joab ikk'ẹ ọtọhma bẹ́, ọgbaak-ẹ. 23 Ozeng-eden nwo oben Devid bẹ́, "Ajinọng mbo mana mina mkpaang. Mayinẹ akebh mina k'iyaan marima mina ábẹ̀. Okenaka, mokwubh bẹ maa, makpa nnam z'ebhumma ch'ebhondim. 24 Nya o, akkikkaama mbo matima ayuk aninga ny'abaaka, matta atọhmnọng pọ, mafhọ ajinọng banẹ p'ikọ ọvaarnọng. Odik kw'ọttar nya ode bẹ́, Uriya kw'ode ọtọhmnọng kwọ kw'ofon Hit kk'ọpa."

25 Devid oben ozeng-eden nwo bẹ́, "Ben Joab bẹ́, ‘Tte odik nwa oning-ọ odik ọyakẹ; ọnọng kw'egbong m'ẹfhọ, makpo azonga. Gaangẹ ifor rima ebhondim ndo maa, akema dẹ.’ Gbaak minna, atima ake Joab ettem."

26 K'ogbe kw'kwanọng kw'Uriya ọbhaang bẹ́, odim kwẹ kk'ọpa, obhom-ẹ, obir otima epokwa ch'odim. 27 Ọ́wọr epokwa ndo nya o, Devid otim-ẹ okwuna z'ikẹ k'ọsọhm, okwu ode kwanọng kwẹ, obir ọmaan-ẹ ojinọngnwa. Okenaka, wa osisi kw'Devid Ọvaar Ibinọkpaabyi ettem kolebhẹ.