1 K'ogbe kw'Devid ọbaabh, wa okwo fiden oning bẹ́ yẹrr k'icho minna ọttaan. Ofona nya, Devid ọd-ọbọbh Ọvaar Ibinọkpaabyi odik nwo. Ọvaar Ibinọkpaabyi ọpọhna bẹ́, "Odik nwo ofon k'epinẹ ch'Saul, ọmaana ẹsọhmmọr chẹ masi ch'mafhọ anọng p'Gibeọn."

2 Ọvaar Devid oyerẹ anọng p'Gibeọn, ọgbaak odik ọnang bẹ. Wa anọng p'Gibeọn m'Israẹl kafon. Bẹ made anọng p'Amọr p'egbong echi erik. Wa anọng p'Israẹl kk'acheka bẹ́, mm'atte bẹ ọbọhk maruk. Okenaka, Saul ọkam bẹ́, ọfhọ bẹ okurọ ettem ch'oyik k'Israẹl ọmaana Juda. 3 Devid ọbọbh anọng p'Gibeọn bẹ́, "Bọng-ọttọhk f'im'nsi nnang bọnga o? Yen kw'im'nsi efokọ, mfha bọnga masi anọng p'Ọvaar Ibinọkpaabyi ittabọhng o?"

4 Anọng p'Gibeọn apọhn-ẹ bẹ́, "Mina m'ẹfa koyen ch'mm'oben Saul ọmaana ẹsọhmmọr chẹ bẹ́, manang mina gol ọmaana silva. M'ẹfa kobir oyena bẹ́, mọfhọ ọnọng kpenamkpen kw'Israẹl."

Devid ọbọbh bẹ bẹ́, "Bọng-ọttọhk f'marorọ bẹ́, nsi nnang bọnga o?"

5 Mapọhna ọvaarnọng bẹ́, "Ṉ́nòde ọnọng nwo kw'ọfhọ mina, ochi mina ikwu bẹ́, odimẹ mina eche, mfha moning ibyi kpenamkpen m'Israẹl oyen, 6 tọka ajinọng achenọmfa p'afon ny'ikẹ k'ntaak nang mina m'ọfhọ, mọjaan aforbukọ pabẹ ny'ititika s'Ọvaar Ibinọkpaabyi, z'Gibea kw'ode obhon kw'Saul kw'Ọvaar Ibinọkpaabyi ikk'oteka."

Nya o, ọvaar Devid oben bẹ́, "Kaam m'ntte bẹ ọbọhk otte nnang bọnga."

7 Ọvaarnọng otte Mẹphiboshẹt kw'ode nnwa kw'Jonatan kw'Saul obhonọ ọbọhk bẹ́, oruk akpen, okurọ nwọhngọ s'iwa Devid ọmaana Jonatan matọk k'ititika s'Ọvaar Ibinọkpaabyi. 8 Okenaka, ọvaarnọng ọtọka Armọni, ọmaana Mẹphiboshẹt, p'ade iva afa p'Rizpa kw'ode ominanwa kw'Aiya ọmaanẹ ọnang Saul, ọttara ajinọngva achen p'Mẹrab kw'ode ominanwa kw'Saul ọmaanẹ ọnang Adriyẹl kw'Barzilayi kw'ofon Mẹhola, obhonọ. 9 Otte bẹ ọbọhk ọnang anọng p'Gibeọn. Mafhọ bẹ anọng nso njo ichenọmfa, matọka aforbukọ pabẹ arena k'egbe, majan ny'ititika s'Ọvaar Ibinọkpaabyi. Wa mafhọ bẹ ny'echedenwu ch'ipha osisi, nya ch'ipha s'barli id-itọm-ọtọma.

10 Rizpa kw'ode ominanwa kw'Aiya ọtọka ọbarabina ọjẹ k'ẹtakpa. Oninga nya ch'ipha njo itọm maa, ẹrọng etebh aforbukọ mbo, od-okwubh ọnọhn k'ẹya, k'erungọ okwubh mgbaten. 11 K'ogbe kw'matekẹ Devid ọttọhk f'oyok-nọng kw'Saul kw'ode Rizpa kw'Aiya ọmaanẹ ikk'ọsa, 12 obina od-okpokọ akọbhọ p'Saul ọmaana p'nnwa kwẹ Jonatan z'anọng p'Jabẹsh-Gilead. Wa anọng p'Jabẹsh-Gilead mafu aforbukọ mbo z'ẹbhaama ch'Bẹt-Shan, za ch'iwa aPhilistiya aren bẹ ch'nkk'bẹ afha z'Gilboa. 13 Devid okpokọ akọbhọ p'Saul ọmaana p'nnwa kwẹ Jonatan, ọttara p'ayok mboza p'uwa mafhọ arena nya, otima okwuna.

14 Manọhnga akọbhọ mbo p'Saul ọmaana p'nnwa kwẹ Jonatan z'epekwuk ch'Kish kw'obhonọ Saul, z'Zẹla kw'oning z'ẹkọma ch'Bẹnjamin, mabir asi ọttọhk kpenamkpen f'ọvaarnọng obenẹ. Macher nya o, Ibinọkpaabyi ọbhaanga njọm s'izek njo.

15 Wa egbong ch'aPhilistiya ọmaana anọng p'Israẹl ebir etto. Devid otima ajinọng pẹ od-orima aPhilistiya ábẹ̀ maa, ọkọhn-ẹ. 16 Wa ọnọng wanẹ kw'okpen Ishbi-Bẹnọb kw'ofon k'ntaak s'Rapha kw'ẹkọhnso chẹ ede bronz kw'adọhbhiji pẹ made ashẹkẹl arọbh ichi, obir ọdaabh ọkkangkkang ọbhakwẹ, oben bẹ́, m'ọfhọ Devid. 17 Okenaka, Abishayi nnwa kw'Zeruya ọkkaana Devid, ọfhọ oPhilistiyanọng nwo. Minna kw'ajinọng p'Devid machekẹ anang Devid bẹ́, "Ọdọk mina màtor moyin egbong, ọfha ottoringkkang kw'Israẹl oning odimẹ."

18 Otum k'ogbe, egbong ebir etto ẹmaana aPhilistiya z'Gọb. M'ogbe nwa, Sibẹkayi kw'ofon Hushat ọfhọ Saph kw'ofon k'ntaak s'Rapha.

19 Egbong ọdọk-ọdọk ebir etto ẹmaana aPhilistiya z'Gọb, Ẹlhanan kw'ode nnwa kw'Jair kw'ofon Bẹtẹlẹhẹm, ọfhọ ọgbaanọkka kw'Golayat kw'ofon Git, kw'ẹbọhk-bọka ch'ọkọhn fẹ ede mach'ẹbaanga ch'mad-atima ayok ekpo.

20 K'egbong danẹ ch'ebir etto z'Gat, oyen ojinọng wanẹ kw'ọbarẹ-iduka, omen nnọhna ichadanẹ z'mbọhk, ichadanẹ z'mmo. Kibung-kibungọ, omenẹ nnọhna ẹrọbh okwuma nna. Wa ojinọng nwo obir ofona k'ntaak s'Rapha. 21 Ojinọng nwo ọlọhkọ Israẹl. Jonatan nnwa kw'Shimeyi kw'ode ọgbaanọkka kw'Devid, ọfhẹ-ẹ.

22 Anọng mboma anna p'Devid ọmaana ajinọng pẹ mafhọ, wa mafon k'ntaak s'Rapha, z'Gat.