1 K'ogbe kw'uwa ọvaar Devid ikk'oruka z'ikẹ k'ọvaarter, Ọvaar Ibinọkpaabyi obir ọsẹ-ẹ oruk k'ẹmẹm ọmaana awawunanọng pẹ maphyir p'abaabh-ẹ ọbaabha, 2 Devid oben Natan kw'ode ọgbaak-ettem ch'Ibinọkpaabyi bẹ́, "Kaam nrukọ k'ọsọhm kw'matim agbaaka p'sida asi, Ẹkkọhbhọ ch'Ibinọkpaabyi etera eninga z'ikkira."

3 Natan ọpọhna ọvaar Devid bẹ́, "Zọhng, ad-asi ọttọhk kpenamkpen f'oning-ọ z'ettem; kirẹ Ọvaar Ibinọkpaabyi oning nya ọmaan-ọ."

4 Ny'orungiwu nwo, Ọvaar Ibinọkpaabyi ọtọhm ẹkkaabha ọnang Natan bẹ́,

5 "Zọhng ben Devid kw'ode ọtọhmnọng kwaam bẹ́, ‘Kaam Ọvaar Ibinọkpaabyi mbenẹ bẹ́, kọ azang m'asi ọsọhm kw'im'nruk. 6 Tọma za ch'nrọhbh anọng p'Israẹl z'Ijip maa, pyirẹ menda, kaam k'ọsọhm kinrukọ. Kaam nd-ntima ikkira nzenga mach'nzeng nya mach'iruk-byi saam. 7 K'ibyi kpenamkpen s'ikk'mkpaanga mmaana anọng p'Israẹl, ọbaabh kw'nke ẹfa bẹ́, ọbaabha anọng paam p'Israẹl kode kw'ikk'mbena bẹ́, Osempira ọsọhm kw'matim nchi s'sida kasi anang-m?’

8 "Ofona nya, tek Devid kw'ode ọtọhmnọng kwaam bẹ́, ‘Ọvaar Ibinọkpaabyi kw'Ẹfa maphyir obenẹ bẹ́, kaam ntọk-ọ z'ẹgba, za ch'ad-akkerẹ arọkimaan, nsọ-ọ ọbaabh kw'anọng paam, Israẹl. 9 Kaam kk'nninga mmaan-ọ k'ibyi kpenamkpen s'ata, mfhọ awawunanọng pọ maphyir p'ad-ayak-ọ odik. Nya o, kaam m'nsọ-ọ ayin eche mach'anọng p'ayinẹ eche ọtam m'iyagbin. 10 Kaam m'nnang anọng paam Israẹl ibyi s'mm'asi obhon kwabẹ, mfha mayena iruk-byi sabẹ, ọnọng oning ọdọk bẹ odik ọyakẹ. Abyibyanọng ọdọk bẹ irem mànang k'ose kw'uwa mad-asi bẹ z'ẹtọma, 11 mabir ad-asi tọma z'ogbe kw'ntek anọng bẹ́, mabaabha anọng paam Israẹl. Kaam m'mbir nsi awawunanọng pọ marọhbh-ọ ichen, ọfha aruk k'ẹmẹm.

" ‘Ọvaar Ibinọkpaabyi wọ od-ozeng mmo otek-ọ ma bẹ́, m'ottima ọsọhm ọnang-ọ. 12 K'ogbe kw'akpen pọ nkk'apyira k'ẹkpọka, ad-akebha ab'ttatta pọ z'offurabhon, nya kw'kaam m'nrọhbha nnwa wanẹ kw'obin ny'ntaak sọ, okwu ọtọka eninga chọ. Kaam m'nsi ẹvaar chẹ ettima. 13 Kẹ wọ im'osi ọsọhm ọnang-m. Kaam m'mbir nsi ẹvaar chẹ ettima ttattampe. 14 Kaam m'nde otte kwẹ, kẹ m'ode nnwa kwaam. K'ogbe kw'osi epinẹ, kaam m'mgbọbh-ẹ mach'otte ọd-ọgbọbhọ nnwa, ntima ayokinọng mgbọbh-ẹ. 15 Ṉ́nòde ọdaakẹ kwaam, kwuna ny'ikẹ k'ifor mọ̀sa, k'ose kw'uwa ọdaakẹ kw'nyen mmaana Saul ọsa, nnẹ-ẹ ẹvaar ny'ikọ k'ititika. 16 Echimma chọ, ọmaana ọvaarbhon kwọ m'obe ttattampe. Ẹvaar chọ m'ebir ettima ttattampe.’ "

17 Natan otek Devid idik maphyir s'imaan ẹyaakẹ nda.

18 Nya o, ọvaar Devid odim z'ẹtaanga kw'ikkira s'Ọvaar Ibinọkpaabyi, od-oninga ẹwọr ny'Ibinọkpaabyi k'ititika, oben bẹ́,

"O Ọvaar Ibinọkpaabyi kw'Ọyọhng. Kaam nde anyi, echimma chaam ebir ẹbanga k'ambọng, kw'achibhẹ ejibhase nda amaan-m o? 19 Kọ Ọvaar Ibinọkpaabyi kw'Ọyọhng, kk'asa minna maphyir, abir akpa nnam agbaak odik kw'im'oyin ọmaana echimma ch'kaam ọtọhmnọng kwọ z'ogbe ororo. O Ọvaar Ibinọkpaabyi kw'Ọyọhng, oyokinọng kw'ina ọttọhk áfẹ̀ ọbang, kẹ kw'agbaakẹ idik nja amaana!

20 "O Ọvaar Ibinọkpaabyi kw'Ọyọhng, bọng-odik kw'Devid m'obir ọgbaak-ọ, ch'ikọ atọm k'ẹtọma azonga ọtọhmnọng kwọ o? 21 Ọgbaakadik kwọ ọmaana ochibhẹ ọkkọkka kwọ kw'azeng ábẹ̀, asi ẹyaakẹ ch'odik katam nwa, anang kaam ọtọhmnọng kwọ.

22 "O Ọvaar Ibinọkpaabyi kw'Ọyọhng! Kọ abarẹ ẹfa mawuriji! Ọnọng za kode kw'ode mach'ikọ. Ibinọkpaabyi ọdọk-ọdọk kode kw'ọkpanẹ kọ, k'ose kw'nkk'ọtọhng famina otima ọbhaanga tọma z'ẹtọma. 23 Bọng-anọng bọ abir ade mach'anọng pọ p'ade, p'Israẹl o? Dẹ dọ ede ẹkọma manchenẹ m'iyagbin kibungọ ch'Ibinọkpaabyi ozeng mmo obhek ọnang ifor sẹ, ozenga nya osi eche, obir osi ikkikkonọdik ọmaana ijoradik siden ọnang bẹ, k'ogbe kw'okwubhọ nkọma njoza ọttara aka pabẹ ny'ititika s'anọng pẹ p'ọkkaan z'Ijip. 24 Kọ kk'anọng p'Israẹl asa mattima mach'anọng pọ oyenẹ, ttattampe. Kọ Ọvaar Ibinọkpaabyi akwu ade Ibinọkpaabyi kwabẹ.

25 "O Ọvaar Ibinọkpaabyi, m'ogbe nwa, nkwuk-ọ bẹ́, echekẹ ndo ch'asi anang kaam ọtọhmnọng kwọ, ọttara echimma chaam, ebe ttattampe. Ototo, si k'ose kw'achekẹ, 26 ọfha eche chọ ekpobha ttattampe. Nya kw'anọng min'ad-aben bẹ́, Ọvaar Ibinọkpaabyi kw'Ẹfa maphyir wọ ọbaabh Israẹl! Minna kw'ẹsọhmmọr ch'kaam Devid kw'nde ọtọhmnọng kwọ im'echina ororo ettima k'ititika sọ.

27 "O Ọvaar Ibinọkpaabyi kw'Ẹfa maphyir, Ibinọkpaabyi kw'Israẹl, kk'ẹyaakẹ ch'odik nwoma asa anang ọtọhmnọng kwọ, ch'aben-ẹ bẹ́, ‘Kaam m'nsi ọsọhm nnang-ọ.’ Nya wọ osi, ọtọhmnọng kwọ oyena ottemgaangẹ bẹ́, oze njọm njoma ọnang-ọ. 28 O Ọvaar Ibinọkpaabyi kw'Ẹfa maphyir, kọ wọ ade Ibinọkpaabyi. Obir ọbaan-ọbaana bẹ́, ọnọng okpobha ọgbaakadik kwọ. Kọ kk'idik nja acheka anang kaam ọtọhmnọng kwọ. 29 Ofona nya, nkwuk-ọ bẹ́, asi echimma ch'kaam ọtọhmnọng kwọ ittabọhng, mfha echina ororo eninga k'ititika sọ ttattampe. K'ose kw'ikọ Ọvaar Ibinọkpaabyi kw'Ẹfa maphyir ikk'agbaaka, ittabọhng sọ m'isi ẹsọhmmọr ch'kaam ọtọhmnọng kwọ, eyena ẹda ttattampe."